ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສະຖາບັນວິຈິດສິນແຫ່ງຊາດ, ກະຊວງຖະແຫລງຂ່າວ, ວັດ ທະນະທໍາ ແລະ ທ່ອງທ່ຽວ ໄດ້ຮັບກຽດເປັນເຈົ້າ ພາບຈັດຊຸດສໍາມະນາຊ່ວຍໂລກ: ຊາວໜຸ່ມອາຊຽນຮ່ວມມືກັນໃນການລິເລີ່ມມີວັດທະນະທໍາຕໍ່ການຮັບຜິດຊອບນໍາໃຊ້ຖົງຢາງພາສຕິກ ໃນວັັນທີ 12-13 ທັນວາ 2023 ທີ່ໂຮງແຮມແລນມາກ, ນະຄອນຫລວງວຽງຈັນ ໂດຍມີຊາວໜຸ່ມທີ່ຕາງໜ້າຂະແໜງການກ່ຽວຂ້ອງຈາກປະເທດສະມາຊິກອາຊຽນ (ຍົກເວັ້ນ ບຼູໄນ ແລະ ສິງກະໂປ) ເຂົ້າ ຮ່ວມ.
ທ່ານ ຄຳສຸກ ແກ້ວວົງໄຊ ຜູ້ອຳນວຍການສະຖາບັນ ວິຈິດສິນແຫ່ງຊາດ ໃຫ້ຮູ້ໃນໂອກາດກ່າວເປີດກອງປະຊຸມຄັ້ງນີ້ວ່າ: ກິດຈະກໍາໃນຄັ້ງນີ້ ເປັນສ່ວນໜຶ່ງຂອງກິດຈະກຳພາຍໃຕ້ການຊີ້ນຳຂອງຄະນະກຳມະການວັດທະນະທຳ ແລະ ຂໍ້ມູນຂ່າວສານອາຊຽນ (COCI) ໂດຍໄດ້ຮັບທຶນສະໜັບສະໜູນຈາກກອງທຶນວັດທະ ນະທຳອາຊຽນ. ໂຄງການນີ້ໄດ້ຖືກ​ຮັບ​ການ​ຮັບຮອງ​ຈາກ​ກອງ​ປະ ຊຸມ​ອາ​ຊຽນ-COCI ຄັ້ງ​ທີ 55 ​ຈັດ​ຂຶ້ນ​ໃນ​ວັນ​ທີ 14 ກັນຍາ 2020 ທີ່​ປະເທດສິງກະ​ໂປ ໄດ້ຮັບກຽດ​ເປັນ​ເຈົ້າພາບ. ເປົ້າ​ໝາຍ​ຂອງ​ໂຄງການ ​ເພື່ອ​ແນ​ໃສ່​ຊຸກຍູ້ສົ່ງເສີມ, ປ້ອງກັນ ​ແລະ ປົກ​ປັກ​ຮັກສາ​ໂລກສີຂຽວ​ທີ່​ປອດ​ໄພ ​ແລະ ຍືນ​ຍົງ​ໃຫ້​ແກ່​ຄົນ​ຮຸ່ນຫຼັງ, ລວມເຖີງເພີ່ມ​ທະວີ​ຄວາມ​ຮັບ​ຮູ້​ດ້ານ​ສິ່ງ​ແວດ​ລ້ອມ ​ແລະ ຮັກສາ​ຄວາມ​ຍືນ​ຍົງ​ຂອງ​ສິ່ງ​ແວດ​ລ້ອມ​ເພື່ອສຸຂະພາບ​ດີ. ນອກຈາກການເອົາໃຈໃສ່ດ້ານສິ່ງແວດລ້ອມ, ຍັງລວມເຖີງການຈັດຕັ້ງປະຕິ ບັດ ແຜນຍຸດທະສາດດ້ານວັດທະນະທຳ ແລະ ສິລະປະອາຊຽນ 2016-2025 ແລະ ແຜນແມ່ບົດດ້ານວັດທະນະທໍາ ແລະ ສັງຄົມອາຊຽນ 2025.
ຜູ້ອຳນວຍການສະຖາບັນ ວິຈິດສິນແຫ່ງຊາດ ໃຫ້ຮູ້ຕື່ມວ່າ: ຊຸດສໍາມະນາຄັ້ງນີ້ ເປັນໂອກາດດີໃຫ້ຜູ້ເຂົ້າຮ່ວມໄດ້ມີໂອກາດແລກ ປ່ຽນ ແລະ ນໍາສະເຫນີການປະຕິບັດທີ່ດີທີ່ສຸດ, ແລກປ່ຽນທັກ ສະ, ຄວາມຮູ້ ແລະ ປະສົບການດ້ານການຜະລິດຄວາມຫຼາກຫຼາຍທາງດ້ານວັດທະນະທໍາຂອງແຕ່ລະປະເທດສະມາຊິກອາຊຽນ.
ທັັງໝົດນີ້ ເພື່ອແນໃສ່ແນວຄວາມຄິດໃຫ້ໄວໜຸ່ມ ໃນການນໍາໃຊ້ສິ່ງເສດເຫລືອເພື່ອໃຫ້ເກີດປະໂຫຍດ, ເປັນສິນຄ້າ, ເປັນຜະລິດ ຕະພັນທາງດ້ານສິລະປະ ໂດຍຈະມີຜູ້ຊ່ຽວຊານທາງດ້ານສິ່ງເສດເຫລືອມາໃຫ້ຄວາມຮູ້ໃນການປະຍຸກໃຊ້ໃຫ້ເກີດປະໂຫຍດສູງສຸດ.
Cr: BT