ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ແຫລ່ງຂ່າວຈາກ ແຂວງສະຫວັນນະເຂດ ໃຫ້ຮູ້ວ່າ: ຄະນະບໍລິຫານງານຊາວໜຸ່ມແຂວງສະຫວັນນະເຂດ ຮ່ວມກັບຄະນະໂຄສະນາແຂວງ ຈັດປາຖະກະຖາ ຫວນມູນເຊື້ອແຫ່ງການເຕີບໃຫຍ່ຂະຫຍາຍຕົວ ຂອງຄະນະຊາວໜຸ່ມປະຊາຊົນປະຕິວັດລາວ (ຊປປລ) ຄົບຮອບ 69 ປີ (14 ເມສາ 1955-14 ເມສາ 2024) ໃນວັນທີ 09 ເມສາ 2024 ທີ່ຫ້ອງວ່າການປົກຄອງແຂວງ ເພື່ອໃຫ້ສະມາຊິກພັກ-ພະນັກງານ, ສະມາຊິກຊາວໜຸ່ມ ຕະຫລອດຮອດນັກຮຽນນັກສຶກສາ ໄດ້ຮັບຮູ້ ແລະ ເຊື່ອມຊຶມ.
ການປາຖະກະຖາຄັ້ງນີ້ໂດຍ ທ່ານ ສົມຈັນ ຈວງໃບຄຳ ອະດີດ ເລຂາຄະນະບໍລິຫານງາຍຊາວໜຸ່ມປະຊາຊົນປະຕິວັດລາວແຂວງສະຫວັນນະເຂດ ໂດຍໄດ້ຍົກໃຫ້ເຫັນເຖິງປະຫວັດຄວາມເປັນມາ, ບົດບາດ ທີ່ຕັ້ງຍຸດທະສາດ ແລະ ມູນເຊື້ອອັນອົງອາດກ້າຫານ ຂອງຊາວໜຸ່ມປະຊາຊົນ ປະຕິວັດລາວ ເຊິ່ງຕິດພັນກັບມູນເຊື້ອຂອງຊາດ ຂອງພັກປະຊາຊົນ ປະຕິວັດລາວ ໃນແຕ່ລະໄລຍະ ໂດຍຊາວໜຸ່ມປະຊາຊົນປະຕິວັດລາວ ໄດ້ສ້າງຜົນງານ, ສ້າງວິລະກຳແຫ່ງການຕໍ່ສູ້ກູ້ຊາດ ຕ້ານຈັກກະພັດຜູ້ຮຸກຮານ ຍອມເສຍສະຫລະເລືອດເນື້ອ ຂອງຊາວໜຸ່ມບັນດາເຜົ່າ, ທັບມ້າງແອກປົກຄອງ ແລະ ທຸກກົນອຸບາຍຂອງພວກລ່າເມືອງຂຶ້ນ ເພື່ອກອບກູ້ເອົາຜືນແຜ່ນດິນອັນຄົບຖ້ວນ ນຳເອົາຄວາມເປັນເອກະລາດ ປະຊາທິປະໄຕ ມາສູ່ປວງຊົນລາວທັງຊາດ. ມາໃນວັນທີ 22 ມີນາ 1955 ພັກປະຊາຊົນປະຕິວັດລາວ ໄດ້ຮັບການສ້າງຕັ້ງຂຶ້ນ, ດ້ວຍຄວາມເຊື່ອໝັ້ນໃນກຳລັງແຮງ ຄວາມສາມາດ ແລະ ນ້ຳໃຈອົງອາດກ້າຫານຂອງຊາວໜຸ່ມ ໃນພາລະກິດປົດປ່ອຍຊາດ ພັກໄດ້ຖືເອົາວຽກງານຂົນຂວາຍຈັດຕັ້ງນຳພາວຽກງານຊາວໜຸ່ມເປັນພາກສ່ວນໜຶ່ງທີ່ສຳຄັນ ໃນວຽກງານກໍ່ສ້າງກຳລັງປະຕິວັດປົດປ່ອຍຊາດ ສະນັ້ນ, ພັກຈຶ່ງຕົກລົງສ້າງຕັ້ງອົງການຈັດຕັ້ງຊາວໜຸ່ມຕະລຸມບອນຂຶ້ນ ໃນຖັນແຖວກຳລັງປະກອບອາວຸດ ໃນວັນທີ 14 ເມສາ 1955, ອົງການຈັດຕັ້ງຊາວໜຸ່ມໄດ້ກາຍເປັນໃຈກາງ ໃນທຸກສະໜາມຮົບ ດ້ວຍມານະຈິດທີ່ວ່າ: ຍອມຕາຍດີກວ່າເສຍເອກະລາດ ເດັດຂາດບໍ່ຍອມໃຫ້ປະເທດຊາດຖືກຕັດແບ່ງ ແລະ ຄວາມປອງດອງຖືກທຳລາຍ, ເພາະວ່າຄະນະຊາວໜຸ່ມ ປະຊາຊົນປະຕິວັດລາວ ແມ່ນພັກປະຊາຊົນ ປະຕິວັດລາວ ເປັນຜູ້ຈັດຕັ້ງນໍາພາໂດຍກົງ ເປັນບ່ອນເຕົ້າໂຮມກໍາລັງແຮງຊາວໜຸ່ມລາວບັນດາເຜົ່າ, ສຶກສາອົບຮົມ ແລະ ຝຶກຝົນຫລໍ່ຫລອມຊາວໜຸ່ມກາຍເປັນກໍາລັງປະຈັນບານ ທີ່ຈົງຮັກພັກດີ ໃນພາລະກິດ ຂອງພັກ, ຂອງຊາດລາວເຮົາ; ເປັນໂຮງຮຽນກໍ່ສ້າງຄົນຮຸ່ນໜຸ່ມ ເພື່ອສະໜອງກໍາລັງໃຫ້ແກ່ພັກຢ່າງບໍ່ມີວັນເຫືອດແຫ້ງ, ຄະນະຊາວໜຸ່ມປະຊາຊົນປະຕິວັດລາວ ແມ່ນອົງການຈັດຕັ້ງການເມືອງ-ສັງຄົມ ເຮັດໜ້າທີ່ພາລະບົດບາດຕົ້ນຕໍ ໃນການສ້າງຊາວໜຸ່ມ ໃຫ້ກາຍເປັນແຂນຂວາຂອງພັກ ແລະ ເປັນກະດູກສັນຫລັງທີ່ແຂງແກ່ນຂອງປະເທດຊາດ.
ທ່ານກ່າວຕື່ມວ່າ: ປະຫວັດສາດຂອງຊາດລາວ ແຕ່ດຶກດຳບັນມາເຖິງປັດຈຸບັນ ມີບາງໄລຍະກໍ່ຮຸ່ງເຮືອງເຫລືອງເຫລື້ອມ, ມີບາງໄລຍະກໍ່ຫຍຸ້ງຍາກສັບສົນລະອິດລະອ້ຽວ ແລະ ຖືກການຮຸກຮານຂອງຕ່າງຊາດ ຊຶ່ງແຕ່ລະໄລຍະປະຫວັດສາດນັ້ນ ບັນດາບັນພະບູລຸດ ແລະ ຊາວໜຸ່ມລາວທີ່ຮັກຊາດຫລາຍທ່ານ ໄດ້ອຸທິດຊີວິດໄວໜຸ່ມ, ອຸທິດເລືອດເນື້ອເຫື່ອແຮງ ແລະ ສະຕິປັນຍາ ເພື່ອປົກປັກຮັກສາ ແລະ ກອບກູ້ເອົາຜືນແຜ່ນດິນອັນແສນຮັກຂອງຕົນ ນໍາເອົາເອກະລາດ, ສິດເສລີພາບ ແລະ ອະທິປະໄຕກັບຄືນມາ. ໃນອະນາຄົດຕໍ່ໜ້າກໍຢືນຢັນ ແລະ ເຊື່ອໝັ້ນຢ່າງໜັກແໜ້ນວ່າ ຊາວໜຸ່ມລາວ ຈະຍັງສືບຕໍ່ ແລະ ຕັ້ງໜ້າຮັກສາ 5 ມູນເຊື້ອ ຄື: ມູນເຊື້ອຮັກຊາດ, ມູນເຊື້ອພິລະອາດຫານ, ຄວາມຈົງຮັກພັກດີຕໍ່ພັກ ຕໍ່ປະເທດຊາດ, ມູນເຊື້ອສາມັກຄີຮັກແພງ, ມູນເຊື້ອ ອອກແຮງງານ, ດຸໝັ່ນຂະຫຍັນພຽນ ແລະ ມູນເຊື້ອຝຶກຝົນຫລໍ່ຫລອມຕົນເອງ.
ຂ່າວຈາກ: ຂປລ.