ໃນວັນທີ 23 ກັນຍາ 2022 ນີ້, ໄດ້ມີການພົບປະເເລກປ່ຽນດ້ານວິຊາການລະຫວ່າງ ຊາວໜຸ່ມ ປະຊາຊົນ ປະຕິວັດລາວ ກະ ຊວງພາຍໃນ ແລະ ກະຊວງການຕ່າງປະເທດ ໂດຍມີ ທ່ານ ນ. ລີວົງ ລາວລີ, ຄະນະປະຈໍາພັກກະຊວງ, ຮອງລັດຖະ ມົນຕີກະຊວງພາຍໃນ, ທ່ານ ອາໂນລັກ ສິດທິເດດ, ເລຂາຄະນະບໍລິຫານງານຊາວໜຸ່ມກະຊວງພາຍໃນທ່ານ ດວງມະນີ ຍອດສີອຸດົມ, ເລຂາຄະນະບໍລິຫານງານຊາວໜຸ່ມກະຊວງການຕ່າງປະເທດ, ມີບັນດາສະມາຊິກຊາວຫນຸ່ມ ຂອງກະຊວງພາຍໃນ ເເລະ ຕາງຫນ້າຊາວຫນຸ່ມຈາກກະຊວງການຕ່າງປະເທດເຂົ້າຮ່ວມ ຈຳນວນ 250 ສະຫາຍ.
ໃນໂອກາດດັ່ງກ່າວ, ທ່ານ ນ. ລີວົງ ລາວລີ, ຄະນະປະຈໍາພັກກະຊວງ, ຮອງລັດ ຖະມົນຕີກະຊວງພາຍໃນ ໄດ້ໃຫ້ກຽດກ່າວເປີດກອງປະຊຸມຢ່າງເປັນທາງການ ເຊິ່ງຖືເປັນຄັ້ງທໍາອິດ ທີ່ຊາວຫນຸ່ມກະ ຊວງພາຍໃນ ແລະ ກະຊວງການຕ່າງປະເທດ ໄດ້ຈັດຕັ້ງເເລກປ່ຽນບົດຮຽນດ້ານວິຊາການໃນວຽກງານພາຍໃນ ເເລະ ວຽກງານການຕ່າງປະເທດ ຮ່ວມກັນໃນຫົວຂໍ້ຕ່າງໆ. ຈຸດປະສົງ ເພື່ອພົບປະສ້າງຄວາມລຶ້ງເຄີຍຮັກແພງ, ຮັດເເຫນ້ນຄວາມສາມັກຄີລະຫວ່າງຊາວຫນຸ່ມສອງກະຊວງໃຫ້ເເຫນ້ນເເຟ້ນຂຶ້ນຕື່ມ, ທັງເປັນການແລກປ່ຽນບົດຮຽນ, ປະສົບການ ແລະ ສ້າງຄວາມເຂັ້ມແຂງ ໃຫ້ຊາວຫນຸ່ມຂອງສອງກະຊວງ ເພື່ອໃຫ້ສາມາດປະ ຕິບັດວຽກງານຂອງຕົນ ໃຫ້ເກີດດອກອອກຜົນຍິ່ງໆຂຶ້ນ.
ຈາກນັ້ນ, ຕາງໜ້າຊາວໜຸ່ມທັງສອງກະ ຊວງ ໄດ້ຜັດປ່ຽນກັນຂຶ້ນບັນຍາຍຫົວຂໍ້ທີ່ຕິດພັນກັບຂົງເຂດວຽກງານຂອງຕົນຮັບຜິດຊອບ ຄື: ການກຳນົດຕຳແໜ່ງງານ ໂດຍມີຜູ້ຕາງໜ້າຈາກກະຊວງພາຍໃນ ຂຶ້ນບັນຍາຍໂດຍໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນກ່ຽວກັບວຽກງານກໍານົດຕໍາແໜ່ງງານ ຕາມທິດຫັນກົງຈັກການຈັດຕັ້ງ ໃຫ້ມີຄວາມກະທັດຮັດ ແຕ່ຮັບປະກັນປະສິດທິພາບ ແລະ ປະສິດທິຜົນໃນການປະຕິບັດວຽກງານຂອງລັດຖະກອນ. ນອກຈາກນັ້ນຕາງໜ້າຈາກຊາວໜຸ່ມກະຊວງການຕ່າງປະເທດ ກໍ່ໄດ້ຂຶ້ນບັນຍາຍກ່ຽວກັບສະພາບການພາກພື້ນ ແລະ ສາກົນ ທີ່ເກີດຂຶ້ນໃນປະຈຸບັນ ທີ່ເຫັນວ່າມີການຜັນແປໄປຢ່າງສະຫຼັບຊັບຊ້ອນ ແລະ ຍາກແກ່ການຄາດເດົາ ພ້ອມທັງໄດ້ຍົກໃຫ້ເຫັນບົດບາດຂອງຊາວໜຸ່ມໃນສະພາບການພາກພື້ນ ແລະ ສາກົນ ທີ່ມີຄວາມສັບສົນ ແລະ ໃນສະ ພາບທີ່ ສປປ ລາວ ກຳລັງປະສົບບັນຫາຄວາມຫຍຸ້ງຍາກທາງເສດຖະກິດໃນເວລານີ້. ພ້ອມດຽວກັນນັ້ນ, ສະມາຊິກຊາວໜຸ່ມສອງກະຊວງ ໄດ້ສົນທະນາ, ແລກປ່ຽນ ແລະ ຖາມ-ຕອບ ບັນຫາທີ່ມີຄວາມສົນໃຈ ເຊິ່ງເຕັມໄປດ້ວຍບັນຍາ ກາດຟົດຟື້ນ ແລະ ມີເນື້ອໃນທີ່ເລິກເຊິ່ງ. ສັງລວມແລ້ວ, ກອງປະຊຸມພົບປະແລກ ປ່ຽນດ້ານວິຊາການໃນຄັ້ງນີ້ ຖືເປັນໂອ ກາດທີ່ມີຄວາມໝາຍສຳຄັນ ໃນການສ້າງເງື່ອນໄຂເປີດກວ້າງການແລກປ່ຽນຄວາມຮູ້ດ້ານວິຊາສະເພາະເຊິ່ງກັນ ແລະ ກັນ ໃຫ້ແກ່ສະມາຊິກຊາວໜຸ່ມທັງສອງກະຊວງເພື່ອນໍາໄປໝູນໃຊ້ໃນວຽກງານຕົວຈິງ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ
