ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຈາກກໍລະນີທີ່ມີບາງສື່ອອນລາຍ (ເຟສບຸກ) ໄດ້ລາຍງານຂ່າວເມື່ອບໍ່ດົນມານີ້ວ່າ: ມີປາຢູ່ໜອງຂອງປະຊາຊົນບ້ານນາຍາງ, ເມືອງນາຊາຍທອງ, ນະຄອນຫລວງວຽງຈັນ ຕາຍຟູນໍ້າເປັນຈໍານວນຫລາຍ ໂດຍສັນນິຖານວ່າມີສາເຫດມາຈາກສານເຄມີທີ່ນໍາໃຊ້ຢູ່ສວນກ້ວຍຂອງນັກລົງທຶນຈີນທີ່ຢູ່ຫ່າງກັນປະມານ 400 ແມັດ ໄຫລລົງມາໃສ່ໜອງ.
ຕໍ່ບັນຫານີ້, ທ່ານ ພູວອນ ພົງລາດແກ້ວ ຮອງເຈົ້າເມືອງນາຊາຍທອງ ໄດ້ອະທິ ບາຍຊີ້ແຈງຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງຊາດລາວ ໃນວັນທີ 15 ທັນວາ 2023 ນີ້ວ່າ: ເມື່ອບໍ່ດົນມານີ້ ມີບາງບຸກ ຄົນສະເໜີວ່າ ປາທີ່ຕົນເອງທີ່ລ້ຽງໄວ້ໃນໜອງ ຊຶ່ງມີຂະໜາດປະມານ 10×10ແມັດ ຫລື ເທົ່າກັບ 100 ຕາແມັດ ຈໍານວນໜຶ່ງຕາຍຟູນໍ້າ ໂດຍກ່າວອ້າງວ່າອາດເກີດຈາກສານເຄມີຈາກສວນກ້ວຍຂອງນັກລົງທຶນຈີນທີ່ຢູ່ຫ່າງກັນປະມານ 400 ແມັດ ໄຫລຕາມຫ້ວຍທໍາມະຊາດລົງມາໃສ່ ເພາະໜອງຂອງຜູ້ກ່ຽວມີຫ້ວຍທໍາມະຊາດໄຫລຜ່ານ. ຢ່າງໃດກໍຕາມ ເຈົ້າຂອງໜອງກໍບໍ່ໄດ້ແຈ້ງອົງການປົກຄອງບ້ານ ແລະ ອົງການປົກຄອງເມືອງກ່ຽວຂ້ອງຢ່າງເປັນທາງການ.
ຕໍ່ເຫດການທີ່ເກີດຂຶ້ນໜ່ວຍງານທີ່ກ່ຽວຂ້ອງ ໄດ້ໄປກວດກາແລ້ວເຫັນວ່າ: ສິ່ງແວດລ້ອມທໍາມະຊາດທີ່ຢູ່ໃກ້ຄຽງສວນກ້ວຍຂອງນັກລົງທຶນຈີນ ແລະ ຫ້ວຍທໍາມະຊາດທີ່ນໍ້າໄຫລຜ່ານແມ່ນບໍ່ມີຜົນກະທົບ ຫລື ມີສະພາບປາ ແລະ ສັດນໍ້າຕາຍເກີດ ຂຶ້ນ, ທຸກຢ່າງແມ່ນຢູ່ໃນສະພາບປົກກະຕິ ແລະ ປະຊາຊົນຍັງໄປຫາຢູ່ຫາກິນຕາມປົກກະຕິ, ແຕ່ມີພຽງປາໃນໜອງຂອງປະຊາຊົນທີ່ລ້ຽງໄວ້ໃນໜອງຢູ່ຫ່າງກັນປະມານ 400 ແມັດ ເທົ່ານັ້ນທີ່ຕາຍ.
ທ່ານຮອງເຈົ້າເມືອງກ່າວຕື່ມວ່າ: ຕໍ່ບັນຫານີ້ ພາກສ່ວນກ່ຽວຂ້ອງຂອງເມືອງຈະໄດ້ກວດກາຄືນຕື່ມວ່າປາໃນໜອງຂອງປະຊາຊົນທີ່ຕາຍເກີດຫຍັງແທ້, ຊຶ່ງອາດເກີດຈາກເຕັກນິກໃນການປ່ອຍປາຂອງປະຊາຊົນບໍ່ຖືກຕ້ອງຕາມເຕັກ ນິກການລ້ຽງທີ່ຖືກຕ້ອງຈິ່ງເຮັດໃຫ້ປາຕາຍ. ຕ້ອງໄດ້ສືບຕໍ່ກວດກາ ແລະ ເບິ່ງບັນຫາໃຫ້ຈະແຈ້ງ ແລະ ເຂົ້າໃຈນໍາກັນເພື່ອໃຫ້ຄວາມຍຸຕິທໍາຕໍ່ທຸກຝ່າຍ ໂດຍການເອົາປາທີ່ຕາຍ ແລະ ສະພາບນໍ້າໃນໜອງໄປວິເຄາະວິໄຈໃຫ້ລະອຽດວ່າເປັນແນວ ໃດແທ້ເພື່ອຊອກຫາຄວາມຈິງຢ່າງລະອຽດ, ລວມເຖິງກວດກາເບິ່ງສະພາບຕົວຈິງກ່ອນການຂຸດໜອງຂອງປະຊາຊົນ, ລວມເຖີງເບິ່ງຄືນປາທີ່ປະຊາຊົນເອົາມາລ້ຽງແມ່ນເອົົາມາຈາກໃສຊຶ່ງພວມຢູ່ໃນຂັ້ນຕອນກວດກາໃຫ້ລະອຽດ.
ຢ່າງໃດກໍຕາມ, ກ່ອນໜ້ານີ້ ຄື: ໃນວັນທີ 14 ທັນວາ 2023 ນີ້, ຫ້ອງການຊັບພະຍາກອນທໍາມະຊາດ ແລະ ສິ່ງແວດ ລ້ອມ ເມືອງນາຊາຍທອງ ນະຄອນຫລວງວຽງຈັນ ໄດ້ລາຍງານ ສະພາບການກ່ຽວກັບ ປາຕາຍຢູ່ເຂດບ້ານນາຍາງ ເມືອງນາຊາຍທອງ ທີ່ໄດ້ເຜີຍແຜ່ຜ່ານສື່ສັງຄົມອອນລາຍ (ເຟສບຸກ) ໃນວັນທີ 9 ທັນວາ 2023 ຜ່ານມາ ແມ່ນບໍ່ມີມູນຄວາມຈິງ.
ຕໍ່ກັບບັນຫາດັ່ງກ່າວ, ການຈັດຕັ້ງບ້ານນາຍາງ ໄດ້ລາຍງານຕໍ່ຫ້ອງການຊັບພະ ຍາກອນທຳມະຊາດ ແລະ ສິ່ງ ແວດລ້ອມ ເມືອງນາຊາຍທອງ ວ່າ: ເບື້ອງຕົ້ນ ທ່ານ ບຸນສະຫວາດ ພັນທະວົງ ໄດ້ມາຊື້ດິນຈັດສັນຢູ່ເຂດຫ້ວຍຊຳປາເຕີຍ. ຈາກນັ້ນ, ກໍຕັນຫ້ວຍດັ່ງກ່າວ ເພື່ອເຮັດເປັນໜອງປາຂະໜາດ 10×10 ເທົ່າກັບ 100 ຕາແມັດ, ມີນໍ້າໄຫລຜ່ານ. ມາຮອດວັນທີ 2-3 ທັນວາ 2023 ເຈົ້າຂອງໜອງປາດັ່ງກ່າວ ກໍ່ອ້າງວ່າປາຢູ່ໜອງຂອງຜູ້ກ່ຽວຕາຍ ຍ້ອນສານເຄມີໄຫລມາຈາກສວນກ້ວຍຈີນ, ແຕ່ວ່າການຈັດຕັ້ງບ້ານນາຍາງ ແລະ ບໍລິສັດສວນກ້ວຍຈີນ ກໍບໍ່ໄດ້ຮັບຮູ້ນໍາ ເຊິ່ງໄລຍະຫາງຈາກໜອງປາຂອງຜູ້ກ່ຽວຫາສວນກ້ວຍ ແລະ ເຮືອນພັກ(ແຄ້ມ)ກຳມະກອນຈີນ ປະມານ 400 ແມັດ, ສາຍຫ້ວຍຊຳປາເຕີຍ ປັດຈຸບັນນໍ້າຍັງໄຫລ ຜ່ານໜອງປາຂອງຜູ້ກ່ຽວ ແລ້ວໄຫລລົງມາໃສ່ໜອງອຸ່ມ ແລະ ໄຫລລົງສູ່ສາຍຫ້ວຍຊົ້ວ (ຝາຍນໍ້າລົ້ນຫ້ວຍຊົ້ວ), ຖ້າມີສານເຄມີແທ້ ນ້ຳໄຫລເຂົ້າສູ່ອ່າງເກັບນໍ້າຫ້ວຍຊົ້ວ, ປາຈໍານວນຫລາຍທີ່ອາໄສຢູ່ເຂດນັ້ນກໍຈະຕາຍໝົດຄືກັນ.
ຕາມການພິສູດຫລັກຖານຕົວຈິງຂອງຄະນະກຳມະການ ເມືອງນາຊາຍທອງ ເຫັນວ່າການຕາຍຂອງປາຢູ່ໜອງຂອງຜູ້ກ່ຽວນັ້ນ ຍ້ອນວ່າ: ຜູ້ກ່ຽວເອົາປາມາປ່ອຍໃໝ່, ປາມີການຕື່ນນໍ້າ, ຊັອກນໍ້າ ແລະ ປາບໍ່ແຂງແຮງ ຈຶ່ງເຮັດໃຫ້ປາຕາຍ ຊຶ່ງບໍ່ກ່ຽວກັບ ສານເຄມີຈາກສວນກ້ວຍແຕ່ຢ່າງໃດ.
ສະນັ້ນ, ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມ ເມືອງນາຊາຍທອງ ຈຶ່ງໄດ້ແຈ້ງມາຍັງ ທຸກພາກສ່ວນ ແລະ ສັງຄົມ ເພື່ອຮັບຊາບ, ພ້ອມທັງຮຽກ ຮ້ອງມາຍັງສັງຄົມ ຜູ້ບໍລິໂພກຂໍ້ມູນຂ່າວສານຈົ່ງໃຊ້ວິຈາລະນະຍານ, ມີສະຕິໃນການບໍລິໂພກສື່ ແລະ ຫລີກລ້ຽງການເຜີຍແຜ່ຂໍ້ມູນຂ່າວສານ ທີ່ບໍ່ໄດ້ຮັບການຢັ້ງຢືນຈາກເຈົ້າໜ້າທີ່ ແລະ ພາກສ່ວນທີ່ກ່ຽວຂ້ອງ ເພື່ອບໍ່ໃຫ້ສັງຄົມເກີດຄວາມສັບສົນວຸ້ນວາຍ ແລະ ແຕກຕື່ນ.
May be an image of fishing