ຈາກກໍລະນີທີ່ມີສື່ສັງຄົມອອນລາຍເຜີຍແຜ່ຂ່າວວ່າ: ພົບບັນຫານາຍໜ້າຮັບແລ່ນເອກະສານເພື່ອຂໍປ່ຽນປ້າຍລົດຈາກກໍາແພງນະຄອນມາເປັນນະຄອນຫລວງວຽງຈັນ ພາຍຫລັງເລີ່ມຕົ້ນຈັດຕັ້ງປະຕິບັດຢ່າງເປັນທາງການນັບແຕ່ວັນທີ 1 ມີນາ ປີ 2024 ເປັນຕົ້ນມາ.
ຕໍ່ຂ່າວດັ່ງກ່າວ, ທ່ານ ບຸນປອນ ບຸນສົມຫວັງ, ຫົວໜ້າກອງຄຸ້ມຄອງພາຫະນະ ແລະ ການຂັບຂີ່ນະຄອນຫລວງວຽງຈັນ ໄດ້ຊີ້ ແຈງຕໍ່ສື່ມວນຊົນໃນວັນທີ 13 ມີນານີ້ວ່າ: ຕາມທີ່ສື່ສັງຄົມອອນລາຍອອກຂ່າວ ເຮັດໃຫ້ສັງຄົມເຂົ້າໃຈວ່າມີພະນັກງານຢູ່ກອງຄຸ້ມຄອງພາຫະນະ ແລະ ການຂັບຂີ່ນະຄອນຫລວງວຽງຈັນ ບາງຄົນ ເປັນນາຍໜ້າແລ່ນເອກະສານເພື່ອຂໍປ່ຽນປ້າຍລົດດັ່ງກ່າວ. ຕໍ່ບັນຫານີ້ແມ່ນບໍ່ມີມູນຄວາມຈິງແຕ່ຢ່າງໃດ ເພາະຈາກຈໍານວນພະນັກ ງານຂອງກອງມີຈໍານວນໜ້ອຍ ແຕ່ປະລິມານວຽກທີ່ເຮັດຢູ່ໃນປັດຈຸບັນມີຫລາຍ ເຮັດໃຫ້ບໍ່ມີພະນັກງານຄົນໃດຈະມີເວລາໄປເປັນນາຍໜ້າຄືທີ່ສັງຄົມເຂົ້າໃຈ. ແຕ່ຢ່າງໃດກໍຕາມ ປະຕິເສດບໍ່ໄດ້ວ່າມີຜູ້ຮັບຜິດຊອບແລ່ນເອກະສານ (ຊິບປິງ) ຊຶ່ງມີ 2 ປະເພດ ຄື: ຊິບປິງ ຂອງບໍລິສັດທີ່ມາແລ່ນເອກະສານໃຫ້ລູກຄ້າ ແລະ ຊິບປິງ ຈາກພາຍນອກທີ່ມາຮັບເອກະສານໃຫ້ຜູ້ທີ່ມາໃຊ້ບໍລິການເພື່ອແລ່ນຂໍປ່ຽນປ້າຍ ຊຶ່ງປະເພດນີ້ມີຫລາຍ ແລະ ບໍ່ສາມາດເກັບກໍາໄດ້ເພາະບໍ່ຮູ້ຈັກເຂົາເຈົ້າ.
ເພື່ອແກ້ໄຂບັນຫາທີ່ເກີດຂຶ້ນໄດ້ຫລຸດຂັ້ນຕອນການແລ່ນເອກະສານລົງ, ພ້ອມທັງໄດ້ຕິດປ້າຍທີ່ກຳນົດລາຄາຄ່າບໍລິການຕາມລະບຽບການທີ່ໄດ້ກຳນົດໄວ້. ນອກຈາກນີ້ ແມ່ນມີພະນັກງານໃສ່ຊຸດ ແລະ ມີປ້າຍພະນັກງານຂອງກອງເພື່ອໃຫ້ຄໍາແນະນໍາໃນການແລ່ນເອກະສານແກ່ຜູ້ມາໃຊ້ບໍລິການຂຶ້ນໃບທະບຽນ ແລະ ປ່ຽນປ້າຍ. ຢ່າງໃດກໍຕາມ ໃນໄລຍະຜ່ານມາມີຜູ້ມາໃຊ້ບໍລິການບາງຄົນມັກສະດວກສະບາຍຈຶ່ງໃຊ້ບໍລິການຊິບປິງຕາມລາຄາທີ່ຕົກລົງກັນ.
ທ່ານໃຫ້ຮູ້ຕື່ມວ່າ: ໃນໄລຍະຜ່ານມາ ເຄີຍຮຽກກຸ່ມຊິບປິງມາໂອ້ລົມອະທິບາຍໃນການປະຕິບັດໜ້າທີ່ເພື່ອບໍ່ໃຫ້ມີສຽງວິພາກວິຈານຈາກສັງຄົມ ແຕ່ຊິບປິງທີ່ມາແລ່ນເອກະສານແມ່ນມີການປ່ຽນຄົນເຂົ້າ-ຄົນອອກຢ່າງຕໍ່ເນື່ອງ ເຮັດໃຫ້ບໍ່ສາມາດກໍາໄດ້ແນ່ນອນ. ຢ່າງໃດກໍຕາມ ກອງຄຸ້ມຄອງພາຫະນະ ແລະ ການຂັບຂີ່ນະຄອນຫລວງວຽງຈັນ ມີແຜນແກ້ໄຂໃຫ້ຈໍານວນຊິບປິງຫລຸດລົງດ້ວຍການຕັດຂັ້ນຕອນການແລ່ນເອກະສານລົງຕື່ມອີກ.
ສໍາລັບການປ່ຽນປ້າຍຈາກກໍາແພງນະຄອນມາເປັນນະຄອນຫລວງວຽງຈັນ ນັບແຕ່ວັນທີ 1 ມີນາ ຫາ ວັນທີ 12 ມີນາ 2024 ສາມາດປ່ຽນຊື່ປ້າຍທະບຽນ ທັງລົດເກົ່າ ແລະ ລົດໃໝ່ໄດ້ ທັງໝົດ 4.375 ຄັນ. ໃນນັ້ນ, ຂຶ້ນທະບຽນລົດໃໝ່ 1.875 ຄັນ ແລະ ປ່ຽນຊື່ປ້າຍ 2.451 ຄັນ.
ໃນໂອກາດນີ້, ທ່ານຍັງໄດ້ຮຽກຮ້ອງມາຍັງຜູ້ທີ່ມີໃບທະບຽນລົດບໍ່ທັນໝົດກໍາໜົດເທື່ອບໍ່ຄວນມາປ່ຽນເທື່ອໃນຕອນນີ້ ເພື່ອຫລຸດຜ່ອນຄວາມແອອັດຂອງຜູ້ມາໃຊ້ບໍລິການ, ສ່ວນຜູ້ທີ່ໃບທະບຽນລົດໝົດອາຍຸແລ້ວໃຫ້ມາປ່ຽນທະບຽນ ແລະ ປ່ຽນປ້າຍດ້ວຍຕົນເອງ ຊຶ່ງນອກຈາກສາມາດປ່ຽນຢູ່ກອງຄຸ້ມຄອງພາຫະນະ ແລະ ການຂັບຂີ່ນະຄອນຫລວງວຽງຈັນ ບ້ານທົ່ງປົ່ງ, ເມືອງສີໂຄດຕະບອງ ຍັງສາມາດໄປປ່ຽນຢູ່ 3 ສາຂາໃກ້ບ້ານຂອງຕົນ ຄື: ສາຂາ ເມືອງຫາດຊາຍຟອງ ຕັ້ງຢູ່ບ້ານດົງໂພສີ, ສາຂາເມືອງໄຊທານີ ຕັ້ງຢູ່ຫລັກ 16 ແລະ ສາຂາເມືອງນາຊາຍທອງ ຕັ້ງຢູ່ນ້ຳຊວງ.
ຂ່າວ, BT ວິທະຍຸແຫ່ງຊາດລາວ.
ພາບ: ທະນູທອງ
