ມື້ນີ້, ວັນທີ 18 ກໍລະກົດ ແມ່ນວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ເຊີ່ງປີນີ້ ຄົບຮອບ 45 ປີ ພໍດີ ເຊີ່ງແມ່ນໜຶ່ງໃນຈໍານວນສອງວັນປະຫວັດສາດທີ່ມີຄວາມໝາຍສໍາຄັນໃນໂອກາດແຫ່ງການສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ 2022.
ຕະຫລອດໄລຍະ 45 ປີ ຜ່ານມາ, ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິ ເສດ ແລະ ການຮ່ວມມືຮອບດ້ານ ລາວ-ຫວຽດນາມ ນັບມື້ໄດ້ຮັບການເສີມຂະຫຍາຍເຂົ້າສູ່ລວງກວ້າງ ແລະ ລວງເລິກ, ມີປະສິດທິຜົນ ແລະ ແທດເໝາະກັບສະພາບຕົວຈິງໃນແຕ່ລະຂົງເຂດ ແລະ ແຕ່ລະໄລຍະ. ສອງຝ່າຍໃຫ້ຄຳໝັ້ນສັນຍາຮ່ວມມືຢ່າງຮອບດ້ານ ເພື່ອພ້ອມກັນພັດທະນາ ແລະ ມີຊີວິດວັດທະນາຖາວອນ ໂດຍໄດ້ເປີດກວ້າງການພົວພັນໃນທຸກຂົງເຂດ ທັງທາງດ້ານການ ເມືອງ, ປ້ອງກັນຊາດ-ປ້ອງກັນຄວາມສະຫງົບ, ການພົວພັນຕ່າງປະເທດ, ດ້ານເສດຖະກິດ, ວັດ ທະນະທໍາ-ສັງຄົມ ແລະ ອື່ນໆ, ໃນນັ້ນ, ການຮ່ວມມືດ້ານເສດຖະກິດ ຍາມໃດກໍມີບົດບາດສໍາຄັນໃນແຖວໜ້າ ແລະ ເປັນກຳລັງສໍາຄັນທີ່ຊຸກຍູ້ການພັດທະນາການຮ່ວມມືດ້ານອື່ນໆ ໂດຍສອງຝ່າຍໄດ້ສົມທົບກັນຢ່າງແໜ້ນແຟ້ນ ເພື່ອຍົກສູງປະສິດທິຜົນ, ຄວາມສາມາດ ແລະ ທ່າແຮງບົ່ມຊ້ອນຂອງສອງປະເທດ.
ມາຮອດປັດຈຸບັນ, ລາວເຮົາ ໄດ້ອະນຸຍາດໃຫ້ວິສາຫະກິດຫວຽດນາມລົງທຶນຢູ່ລາວ ທັງໝົດ 417 ໂຄງການ, ມູນຄ່າການລົງທຶນ 4 ຕື້ 300 ລ້ານໂດລາສະຫະລັດ, ຈັດຢູ່ອັນດັບທີ 3 ໃນ ຈໍານວນ 54 ປະເທດ ແລະ ເຂດແຄ້ວນທີ່ລົງທຶນຢູ່ລາວ, ມູນຄ່າການຄ້າຂອງສອງປະເທດໃນປີ 2021 ຜ່ານມາ ບັນລຸ 1 ຕື້ 370 ລ້ານໂດລາສະຫະລັດ, ເພີ່ມຂຶ້ນຫລາຍກວ່າ 33% ເມື່ອທຽບໃສ່ປີ 2020. ສອງຝ່າຍ ໄດ້ພ້ອມກັນສຶກສາຄົ້ນຄວ້າ ແລະ ຊຸກຍູ້ຊອກຫາແຫຼ່ງທຶນເພື່ອຜັນຂະຫຍາຍບັນດາໂຄງການທີ່ສຳຄັນ ເປັນຕົ້ນ: ໂຄງການກໍ່ສ້າງເສັ້ນທາງດ່ວນວຽງຈັນ-ຮ່າໂນ້ຍ ແລະ ພວມຢູ່ໃນຂັ້ນຕອນການເຈາລະຈາໂອນຮຸ້ນໃຫ້ຝ່າຍລາວຄຸ້ມຄອງຈາກ 20% ຂຶ້ນເປັນ 60% ຂອງທ່າ ເຮືອຫວຸງອ້າງ 1, 2 ແລະ 3 ຄາດວ່າຈະສາມາດເຂົ້າໄປພັດທະນາທ່າເຮືອນີ້ໄດ້ໃນໄວໆ ນີ້, ສ່ວນໂຄງການເສັ້ນທາງລົດໄຟລາວ-ຫວຽດນາມ ກຸ່ມບໍລິສັດ FLC ຂອງຫວຽດນາມ ໄດ້ພົບປະ-ປຶກສາຫາລືກັບ ບໍລິສັດ ປີໂຕຼເທຮດເຊິ່ງສອງຝ່າຍ ແລະ ໄດ້ລົງນາມໃນບົດບັນທຶກຄວາມເຂົ້າໃຈການຮ່ວມມືພັດທະນາໂຄງການນີ້ໃນ ເດືອນມີນາ ຜ່ານມານີ້.
ຝ່າຍລາວ ໄດ້ເຊັນສັນຍາຊື້-ຂາຍໄຟຟ້າ ກັບລັດວິສາຫະກິດໄຟຟ້າຫວຽດນາມ ທັງໝົດມີ 18 ສັນຍາ, ມີ 25 ໂຄງການ, ລວມກໍາລັງຕິດຕັ້ງ 2.180 MW. ສ່ວນການສ້າງຊັບພະຍາກອນມະນຸດ, ປັດຈຸບັນ ນັກສຶກສາລາວກໍາລັງສຶກສາຢູ່ຫວຽດນາມ 14.000 ຄົນ: ໃນນີ້ ສະເພາະປີນີ້ , ລັດຖະ ບານຫວຽດນາມ ໃຫ້ທຶນການສຶກສາແກ່ລາວ 1.100 ທຶນ ແລະ ລັດຖະບານລາວ ໃຫ້ທຶນການສຶກສາແກ່ພະນັກງານ ແລະ ນັກສຶກສາຫວຽດນາມ ມາຮຽນ ຢູ່ລາວ 60 ທຶນ. ສ່ວນການຊ່ວຍເຫຼືອລ້າຂອງຫວຽດນາມແກ່ລາວ, ໃນປີ 2021 ມີ 719 ຕື້ 300 ລ້ານດົ່ງ ແລະ ເພີ່ມຂຶ້ນເປັນ 733 ຕື້ 660 ລ້ານດົ່ງ ໃນປີນີ້. ນອກຈາກນີ້ ສອງຝ່າຍ ຍັງໄດ້ປະສານສົມທົບກັນຢ່າງແໜ້ນແຟ້ນໃນການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ຢ່າງມີປະສິດທິຜົນດີ.
ຕະຫລອດໄລຍະ 4 ທົດສະວັດເຄີ່ງຜ່ານມານີ້ ຍ້ອນບັນດາຜູ້ນໍາຫຼາຍຮຸ່ນຂອງສອງພັກ, ສອງລັດ ແລະ ປະຊາຊົນສອງຊາດ ມີຄວາມຮັບຜິດຊອບຮ່ວມກັນຖະໜຸຖະໜອມ ແລະ ເພີ່ມພູນຄູນສ້າງຈິ່ງເຮັດໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາ ມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ທີ່ມີ ປະທານໂຮ່ຈິມິນ ຜູ້ນໍາທີ່ຍິ່ງໃຫຍ່, ປະທານໄກ ສອນພົມວິຫານ ແລະ ປະທານສຸພານຸວົງ ທີ່ແສນເຄົາລົບຮັກຮ່ວມກັນກໍ່ຕັ້ງຂຶ້ນໃນເມື່ອກ່ອນ ໄດ້ຮັບການເສີມຂະຫຍາຍເຂົ້າສູ່ລວງກວ້າງ ແລະ ລວງເລິກໃນທຸກຂົງເຂດວຽກງານ ບົນພື້ນຖານການເສີມຂະຫຍາຍຈິດໃຈຄວາມເປັນເອກະລາດ, ເປັນເຈົ້າຕົນເອງ, ຮ່ວມມືຢ່າງສະເໝີພາບ ແລະ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງປະເທດນັບມື້ເພີ່ມຂຶ້ນຢ່າງບໍ່ຢຸດຢັ້ງ.
ຢ່າງໃດກໍ່ຕາມ ໃນເງື່ອນໄຂປັດຈຸບັນທີ່ສະພາບການຂອງໂລກ ແລະ ພາກພື້ນທີ່ມີການຜັນແປໄປຢ່າງສັບສົນ, ບວກກັບຄວາມທ້າທາຍທີ່ເກີດຂຶ້ນຢູ່ພາຍໃນຂອງແຕ່ລະປະເທດ ເຮັດໃຫ້ສົ່ງຜົນກະທົບທັງທາງກົງ ແລະ ທາງອ້ອມຕໍ່ການພັດທະນາເສດຖະກິດ-ສັງຄົມຂອງ ລາວ ແລະຫວຽດ ນາມ. ດັ່ງນັ້ນ, ເພື່ອເພີ່ມທະວີການພົວພັນຮ່ວມມືຮອບດ້ານຂອງສອງປະເທດໃຫ້ກ້າວຂຶ້ນສູ່ລະດັບສູງໃໝ່, ສອງຝ່າຍຕ້ອງສືບຕໍ່ເພີ່ມເຕີມ, ບູລະນະບັນດາກົນໄກ, ນະໂຍບາຍ ແລະ ການຈັດຕັ້ງຊີ້ນຳປະຕິບັດຢ່າງມີປະສິດທິຜົນຕໍ່ບັນດາຂໍ້ຕົກລົງແລະບັນດາເປົ້າໝາຍຍຸດທະສາດທີ່ໄດ້ໄວ້ໄວ້ ດ້ວຍວິໄສທັດກວ້າງກວ່າເກົ່າ, ຮອບດ້ານແລະຍາວນານກວ່າເກົ່າ. ເຖິງວ່າພົບຄວາມຫຍຸ້ງຍາກລຳບາກປານໃດກໍ່ຕາມ ຕ້ອງຕັດສິນໃຈເສີມຂະຫຍາຍສາຍພົວພັນທີ່ເປັນມູນເຊື້ອອັນດີງາມຂອງສອງປະເທດເໝືອນດັ່ງຮັກສາແກ່ນຕາຂອງຕົນ ເພື່ອກ້າວເຂົ້າສູ່ຍຸກສະໄໝໃໝ່ຢ່າງເຂັ້ມແຂງ, ເຮັດໃຫ້ຄວາມມຸ້ງມາດປາດຖະໜາຂອງບັນດາຜູ້ນຳຮຸ່ນກ່ອນເປັນຄວາມຈິງ ແລະ ເຮັດໃຫ້ການພັດທະນາເສດຖະກິດ-ສັງຄົມຂອງສອງຊາດລາວ-ຫວຽດນາມ ນັບມື້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ, ດັ່ງປະທານ ໂຮຈີມິນ ໄດ້ກ່າວເປັນບົດກອນໄວ້ ວ່າ:
ຮັກຫອມກັນໝາຍໝັ້ນ ຫຼາຍສັນພູກໍ່ປີນໄຕ
ຫຼາຍນໍ້າໃຫຍ່ ແລະ ໂຄກຄ້ອຍ ຂວາງຂັ້ນກໍ່ດຸ່ງໄປ
ສອງຊາດຫວຽດ – ລາວ ໄດ້ ຝັງຄວາມຮັກຢູ່ໃນໃຈ ຮົ່ງຮາທັງແມ່ຂອງບໍ່ເລິກປູນປານໄດ້
ແລະ ຄຳກ່າວຕັກເຕືອນຂອງປະທານ ໄກສອນ ພົມວິຫານ ທີ່ວ່າ: “ເຖີງວ່າພູຈະຖືກເຊາະເຈື່ອນ, ແມ່ນ້ຳລຳເຊຈະເຫືອດແຫ້ງ, ແຕ່ສາຍພົວພັນມິດຕະພາບ ລາວ – ຫວຽດນາມ ຈະໝັ້ນຄົງຂະໜົງແກ່ນຊົ່ວກາລະນານ”.
ຊົມເຊີຍວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ
ວັນທີ 18 ກໍລະກົດ ຄົບຮອບ 45 ປີ ຢ່າງສຸດໃຈ!
Cr: ບຸນຕຽງ ຈັນທະວົງ