ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຊົມເຊີຍ! ຊາວໜຸ່ມ 6.500 ຄົນ ເຂົ້າຮ່ວມຂະບວນຊາວໜຸ່ມອາສາສະມັກຕະລຸມອະນາໄມຢູ່ນະຄອນຫລວງວຽງຈັນ

ຕອນເຊົ້າວັນທີ 22 ສິງຫາ 2020 ສູນກາງຊາວໜຸ່ມ ປະຊາຊົນ ປະຕິວັດລາວ ໄດ້ນຳພາຊາວໜຸ່ມຈາກບັນດາກະຊວງ ແລະ ຂະແໜງການຕ່າງຯ ທົ່ວນະຄອນຫລວງວຽງຈັນ ຈຳນວນ 6.500 ຄົນ ເພືອພ້ອມກັນເຂົ້າຮ່ວມຂະບວນຊາວໜຸ່ມອາສາສະມັກຕະລຸມອະນາໄມ ຈຳນວນ 9 ຈຸດ ພາຍໃນ 9 ຕົວເມືອງທົ່ວນະຄອນຫລວງວຽງຈັນ ຢ່າງຟົດຟື້ນ ແລະເປັນຄັ້ງປະຫວັດສາດ ດ້ວຍການເກັບມ້ຽນຂີ້ເຫຍື່ອ, ຕັດຫຍ້າ, ຕັດງ່າໄມ້, ຊ້ວນດິນເປີະເປື້ອນຕາມຫນ້າທາງອອກ, ອະນາໄມຮ່ອງລະບາຍນໍ້າ ແລະອື່ນຯ.
ທ່ານ ອາລຸນໄຊ ສູນນະລາດ, ກໍາມະການສໍາຮອງສູນ ກາງພັກ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ໃຫ້ສໍາພາດວ່າ: ການອະນາໄມຄັ້ງນີ້ ແມ່ນເນັ້ນໃສ່ບັນດາຈຸດທີ່ເປັນສະຖານທີ່ທ່ອງທ່ຽວ ແລະ ສະຖານທີ່ສໍາຄັນ ເປັນຕົ້ນ: ເຂດແຄມຂອງໜ້າສວນສາທາລະນະເຈົ້າອານຸວົງ, ເດີ່ນທາດຫລວງ, ເດີ່ນຫນ້າເຂດສະພາແຫ່ງຊາດ ແລະ ຈຸດສໍາຄັນອື່ນຯ ໂດຍມີຈຸດປະສົງເພື່ອສະເຫລີມສະຫລອງວັນຢຶດອໍານາດ ວັນທີ 23 ສິງຫາ ຄົບຮອບ 45 ປີ, ສ້າງຂະບວນການເພື່ອຂໍ່ານັບຮັບຕ້ອນກອງປະຊຸມໃຫຍ່ຜູ້ແທນຊາວຫນຸ່ມລາວ ທົ່ວປະເທດ ຄັ້ງທີ VIII. ນອກຈາກນີ້ ຍັງເປັນການປະຕິບັດ ສ ສະອາດ ທີ່ນະຄອນຫລວງວຽງຈັນ ວາງອອກ ເພື່ອເຮັດໃຫ້ນະຄອນ ຫລວງວຽງຈັນ ມີຄວາມສະອາດງາມຕາ, ຫນ້າຢູ່-ຫນ້າທ່ຽວຊົມ ແລະ ສົມກັບເປັນນະຄອນຫລວງຂອງປະເທດ. ຂະນະດຽວກັນ ຍັງເປັນການປູກຈິດສຳນຶກໃຫ້ຊາວໜຸ່ມ ກໍຄື ທົ່ວສັງຄົມ ເຫັນໄດ້ຄວາມສຳຄັນຂອງສິ່ງແວດລ້ອມທີ່ມີຕໍ່ສຸຂະພາບຂອງຄົນເຮົາ ແລະ ສິ່ງທີ່ມີຊີວິດຕ່າງຯ.
ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ໃຫ້ຮູ້ຕື່ມວ່າ: ນອກຈາກຂະບວນຊາວໜຸ່ມອາສາສະມັກຕະລຸມອະນາໄມ ຈຳນວນ 9 ຈຸດ ພາຍໃນ 9 ຕົວເມືອງທົ່ວນະຄອນຫລວງວຽງຈັນ ແລ້ວ, ໃນວັນດຽວ ກັນນີ້ ພະນັກງານຂອງສູນກາງຊາວໜຸ່ມ ປະຊາຊົນ ປະຕິ ວັດລາວ ທີ່ລົງຮາກຖານ ປະຈຳການ 3 ຈຸດ ຄື: ບ້ານເຕົາໄຫ, ເມືອງສັງທອງ, ບ້ານນາຄວາຍໃຕ້, ເມືອງໄຊເສດຖາ, ນະຄອນຫລວງວຽງຈັນ ແລະ ຊາວໜຸ່ມທີ່ລົງຮາກຖານຢູ່ເຂດຫນອງກອກ, ເມືອງຄໍາເກີດ ແຂວງບໍລິຄຳໄຊ ໄດ້ນໍາພາຂະບວນຊາວໜຸ່ມອອກແຮງງານອະນາໄມໃນເຂດທີ່ຕົນຮັບຜິດຊອບຢ່າງເປັນຂະບວນຟົດຟື້ນເຊັ່ນດຽວກັນ.
ຂ່າວ: ບຸນຕຽງ ຈັນທະວົງ
ພາບ: ສູນກາງຊາວໜຸ່ມ ປະຊາຊົນ ປະຕິວັດລາວ