ການແຂ່ງຂັນລາຍການນີ້ ຈັດຂຶ້ນລະຫວ່າງວັນທີ 2-4 ກຸມ ພາ 2024 ທີ່ນະຄອນ ຫລວງບາງກອກ, ປະເທດໄທ ໂດຍມີນັກກິລາ 900 ກວ່າຄົນ ຈາກ 14 ປະເທດເຂົ້າຮ່ວມຄື: ສປປ ລາວ, ບຣູໄນ, ກຳປູເຈຍ, ຮົງກົງ (ຈີນ), ອິນເດຍ, ອິນໂດເນເຊຍ, ຄາຊັກສະຖານ, ກີກິສຖານ, ມາເລເຊຍ, ມົງໂກລີ, ມຽນມາ, ຟີລິບປິນ, ຫວຽດນາມ ແລະ ໄທ ເຈົ້າພາບ. ນາງ ວິນເນີ້ ແລະ ທ້າວ ວິນນີ້ ເປັນຕົວແທນຈາກ ໂຮງຮຽນນາໆຊາດ ຮິດຟິວ (HIS) ນະຄອນຫລວງວຽງຈັນ.
ນາງ ວິພະດາ ພັນທະຈັກ ຫລື ນ້ອງ ວິນນີ້ ອາຍຸ 7 ປີ ໄດ້ມາທັງໝົດ 6 ຫລຽນ ຄື: 3 ຫລຽນເງິນ ແລະ 3 ຫລຽນທອງ. ສໍາລັບ 3 ຫລຽນເງິນ ໄດ້ຈາກລອຍທ່າ ຟຣີສະຕາຍ ຄິກ 50 ແມັດ, ຟຣີສະຕາຍທົ່ວໄປ 50 ແມັດ ແລະ ຟຣີສະຕາຍທົ່ວໄປ 100 ແມັດ, ສ່ວນ 3 ຫລຽນທອງ ໄດ້ຈາກລອຍທ່າແມງກະເບື້ອ ຄິກ 50 ແມັດ, ທ່າແມງກະເບື້ອທົ່ວໄປ 50 ແມັດ ແລະ ທ່າລອຍຫງາຍ 50 ແມັດ.
ສ່ວນ ທ້າວ ສຸກພະໄຊ ພັນທະຈັກ ຫລື ນ້ອງ ວິນເນີ້ ອາຍຸ 9 ປີ ໄດ້ 1 ຫລຽນທອງຈາກລອຍທ່າ ຟຣີສະຕາຍທົ່ວໄປ 50 ແມັດ.
ນີ້ເປັນຄັ້ງທຳອິດທີ່ ວິນເນີ້ ແລະ ວິນນີ້ ໄດ້ເຂົ້າຮ່ວມແຂ່ງຂັນລະດັບນາໆຊາດ.
ດຣ. ອາກຸສຕີນັສ ເຮີມີໂນ້ (ເຮັນຣີ້) ຄູຝຶກລອຍນໍ້າລະດັບສາກົນຊາວອິນໂດເນເຊຍ ເຊິ່ງເປັນນັກກິລາລອຍນໍ້າມາຣາທອນ (Open Water Swimming) ໃຫ້ຮູ້ວ່າ: ວິນເນີ້ ແລະ ວິນນີ້ ເປັນນັກກິລາທີ່ມີພອນສະຫວັນ ແລະ ພອນສະແຫວງ ເຫັນໄດ້ຈາກການຝຶກຊ້ອມ ມີສະຖິຕິທີ່ດີສາມາດຍາກແຍ່ງຫລຽນລາງ ວັນໄດ້ໃນລະດັບນາໆຊາດ ທາງໂຮງຮຽນ ກໍຄືຜູ້ປົກຄອງ ແລະ ຄູຝຶກ ຈຶ່ງຕັດສິນໃຈສົ່ງນ້ອງທັງສອງໄປທົດສອບຄວາມສາມາດ ຫາປະສົບການໃໝ່.
ຄູຝຶກຊາວອິນໂດເນເຊຍ ຫວັງຈະສົ່ງເສີມ ວິນເນີ້ ແລະ ວິນນີ້ ໃຫ້ກາຍເປັນນັກກິລາທີມຊາດໃນອະນາຄົດ, ສຳລັບການແຂ່ງຂັນຕໍ່ໄປ ທາງຄູຝຶກຈະພາ ວິນເນີ້ ແລະ ວິນນີ້ ເຂົ້າຮ່ວມລາຍການ Vientiane International School, Jakarta Open, Malaysia Open ແລະ Indonesia Open ໃນປີ 2024 ນີ້.
