ພະແນກກະສິກຳ ແລະ ປ່າໄມ້ ແຂວງຊຽງຂວາງ ຈັດພິທີປ່ອຍປາຄືນສູ່ແຫລ່ງນໍ້າທຳມະຊາດ ເນື່ອງໃນໂອກາດວັນປ່ອຍປາ ແລະ ສັດນ້ຳແຫ່ງຊາດ ໃນວັນທີ 12 ກໍລະ ກົດ 2024 ທີ່ວັງສະຫງວນນໍ້າໂຄ້ ບ້ານນາຄູນ ເມືອງແປກ ໂດຍການເຂົ້າຮ່ວມ ທ່ານ ບົວເງິນ ຫຸມໄຊຍະພົມ ຮອງເຈົ້າແຂວງໆຊຽງຂວາງ ພ້ອມດ້ວຍພະແນກການກົມກອງ, ພະນັກງານ-ລັດຖະກອນ, ມ່ວນຊົນ ແລະ ນັກທຸລະກິດເຂົ້າຮ່ວມ.
ຈຸດປະສົງຂອງກິດຈະກຳຄັ້ງນີ້ ເພື່ອເຮັດໃຫ້ຂະບວນການສະເຫລີມສະຫລອງວັນດັ່ງກ່າວ ໃນຂອບເຂດທົ່ວແຂວງ ໃຫ້ເປັນຂະບວນຟົ້ດຟື້ນ ທັງເປັນການຄືນຄວາມອຸດົມສົມບູນ ໃຫ້ຊັບພະຍາກອນສັດນໍ້າ ພ້ອມນີ້ຍັງເປັນການເຜີຍແຜ່ວຽກງານອະນຸລັກ, ປົກປັກຮັກສາ, ພັດທະນາ ແລະ ນໍາໃຊ້ສັດນໍ້າແບບຍືນຍົງ, ເຊິ່ງເປັນວຽກງານທີ່ສໍາຄັນ ແລະ ມີຄວາມຈໍາເປັນສໍາລັບຊີວິດການເປັນຢູ່ຂອງປະຊາຊົນບັນດາເຜົ່າ. ປາທີ່ນຳມາປ່ອຍໃນຄັ້ງນີ້ 22.000 ກວ່າໂຕ ປະກອບມີ ປານິນ, ປາປາກ, ປາຂີນ, ປາອິນເດຍ, ປາໄນ ແລະ ປາກິນຫຍ້າ.
ໂອກາດນີ້, ທ່ານ ບົວເງິນ ຫຸມໄຊຍະພົມ ໄດ້ຍົກໃຫ້ຄວາມໝາຍຄວາມສຳຄັນ ຂອງວັນດັ່ງກ່າວ ເຊິ່ງແມ່ນວັນໜຶ່ງທີ່ມີຄວາມໝາຍຄວາມສຳຄັນທີ່ພັກ ແລະ ລັດຖະບານ ໄດ້ຖືເອົາວຽກງານການປະມົງເປັນໜ້າວຽກມທີ່ສໍາຄັນ. 13 ກໍລະກົດ ຂອງທຸກໆ ປີ ເປັນວັນປ່ອຍປາ ການປ່ອຍສັດນໍ້າ ຄືນສູ່ທໍາມະຊາດ ແລະ ທັງເປັນການລະນຶກເຖິງວັນເກີດຂອງປະທານສຸພານຸວົງ ຜູ້ນໍາແສນເຄົາລົບຮັກຂອງປວງຊົນລາວບັນດາເຜົ່າ ເຊິ່ງເປັນຜູ້ນຳຮຸ່ນທຳອິດ ທີ່ມີຄຸນງາມຄວາມດີ ແລະ ຜົນງານອັນຍິ່ງໃຫຍ່ຂອງປະທານ ສຸພານຸວົງ ທີ່ໄດ້ອຸທິດຕົນ ແກ່ພາລະກິດແຫ່ງການຕໍ່ສູ່ກູ້ຊາດ ກໍຄືການປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາ ໃນໄລຍະຜ່ານມາ ທັງເປັນການປູກຈິດສໍານຶກໃຫ້ອະນຸຊົນ, ເຍົາວະຊົນ ແລະ ປະຊາຊົນບັນດາເຜົ່າພາຍໃນຊາດ ໃຫ້ມີສະຕິໃນການອະນຸລັກປົກປັກຮັກສາ ຫວງແຫນສັດນໍ້າ ແລະ ສັດປ່າ ທັງເປັນການປຸກລະດົມໃຫ້ປວງຊົນ ມີສ່ວນຮ່ວມໃນການຄຸ້ມຄອງ, ປົກປັກຮັກ, ພັດທະນາ ແລະ ນໍາໃຊ້ສັດນໍ້າແບບຍືນຍົງ. ພ້ອມທັງຮຽກຮ້ອງໃຫ້ທຸກພາກສ່ວນໃນສັງຄົມ ຈົ່ງເຫັນໄດ້ເຖິງຄວາມສຳຄັນຂອງປາ ແລະສັດນໍ້າ ແລະ ພ້ອມກັນມີສ່ວນຮ່ວມໃນການປົກປັກຮັກສາ ໃຫ້ມີຄວາມຍືນຍົງ
ຂ່າວ-ພາບ: ແສງມາລີຕິກ
