ໃນໄລຍະ 6 ເດືອນທ້າຍປີ 2024 ນີ້, ແຂວງຊຽງຂວາງ ຈະຕັ້ງໜ້າສູ້ຊົນປະຕິບັດເປົ້າໝາຍ ດ້ານສາທາລະນະສຸກໃຫ້ດີຂຶ້ນ, ເອົາໃຈໃສ່ປະຕິບັດວຽກງານສາທາລະນະສຸກ ຕາມແຜນງານທີ່ວາງອອກ ແລະ ສະໜອງການບໍລິການສຸຂະພາບ ຢູ່ເຂດຫ່າງໄກໃຫ້ໄດ້ຢ່າງທົ່ວເຖິງພ້ອມທັງຍົກສູງ, ມີຄຸນນະພາບເປັນສຳຄັນດ້ວຍການຍົກລະດັບຄວາມຮູ້ ຄວາມສາມາດຂອງແພດໝໍ ແລະ ປັບປຸງຕາໜ່າງສາທາລະນະສຸກນັບທັງຂັ້ນແຂວງ ລົງເຖິງຂັ້ນຮາກຖານ, ແຂວງຈະສຸມໃສ່ຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ SDGs ຂອງຂະແໜງສາທາລະນະສຸກຄື: ເຮັດໃຫ້ອັດຕາເດັກນ້ອຍລຸ່ມ 5 ປີທີ່ມີນໍ້າໜັກຕ່ຳກ່ວາມາດຕະຖານໃຫ້ບັນລຸໄດ້ 16,30%, ເດັກນ້ອຍລຸ່ມ 5 ປີທີ່ມີລວງສູງຕ່ຳກ່ວາມາດຕະຖານໃຫ້ບັນລຸໄດ້ 27,90%, ອັດຕາການຕາຍຂອງເດັກນ້ອຍລຸ່ມ 1 ປີໃຫ້ຢູ່ໃນລະດັບ 19/1,000 ຄົນ, ການຕາຍຂອງເດັກນ້ອຍລຸ່ມ 5 ປີໃຫ້ຢູ່ໃນລະດັບ 25/1,000 ຄົນ, ການຕາຍຂອງແມ່ໃຫ້ຢູ່ໃນລະດັບ 120/100,000 ຄົນ, ການເກີດລູກທີ່ມີແພດຊ່ວຍໃຫ້ບັນລຸໄດ້ 84%, ການສັກຢາກັນພະຍາດໃນເດັກນ້ອຍລຸ່ມ 1 ປີໃຫ້ບັນລຸໄດ້ 93,70%, ອັດຕາຊົມໃຊ້ນ້ຳສະອາດໃຫ້ບັນລຸຫຼາຍກວ່າ 92.20% ຂຶ້ນໄປ, ອັດຕາຊົມໃຊ້ວິດຖ່າຍໃນຄົວເຮືອນໃຫ້ບັນລຸຫຼາຍກວ່າ 98,20% ຂຶ້ນໄປ, ອັດຕາການປົກຄຸມປະກັນສຸຂະພາບໃຫ້ບັນລຸຫຼາຍກວ່າ 95,50% ຂຶ້ນໄປ ແລະ ອັດຕາຮັບຮອງບ້ານສາທາລະນະສຸກແບບຢ່າງ ໃຫ້ບັນລຸຫຼາຍກວ່າ 83,50% ຂຶ້ນໄປ.
ຂ່າວ: ວັນໄຊ ຕະວິນຍານ
