ອີງຕາມການລາຍງານຂອງທ່ານ ເບີ້ຍ ເກດສີທອງ ຫົວໜ້າຫ້ອງການກະສິກໍາ ແລະ ປ່າໄມ້ເມືອງຊຽງຮ່ອນ ໄດ້ລາຍງານການຈັດຕັ້ງປະຕິບັດ ການປູກພືດລະດູຝົນຢູ່ເມືອງ ຊຽງຮ່ອນ ແຂວງໄຊຍະບູລີ ມາຮອດປັດຈຸບັນການປູກພືດລະດູຝົນແລ້ວສຳເລັດແລ້ວ 40% ໃນປີນີ້ເຫັນວ່າການປູກພືດລະດູຝົນຂອງຊາວກະສິກອນຢູ່ເມືອງຊຽງຮ່ອນ ໄດມີຂະບວນການຢ່າງກວ້າງຂວາງ ເປັນຕົ້ນແມ່ນ: ການປັກດຳເຂົ້ານາປີສໍາເລັດແລ້ວ 45% ໃນເນື້ອທີ່ 1.511 ເຮັກຕາ ໃນນັ້ນມີການປູກເປັນສິນຄ້າຕາມແຜນການໃນເນື້ອທີ່ 1.100 ເຮັກຕາ, ປູກຄໍ້າປະກັນສະບຽງອາຫານ 2.248 ເຮັກຕາ, ປູກເປັນແນວພັນໃນເນື້ອທີ່ 10 ເຮັກຕາ ແລະ ການປູກເຂົ້າເນີນສູງ (ເຂົ້າໄຮ່) ໃນເນື້ອທີ່ 1.000 ເຮັກຕາ. ການປູກພືດເສດຖະກິດຕາມແຜນການໃນເນື້ອທີ່ 5.500 ເຮັກຕາ ເປັນຕົ້ນແມ່ນ ສາລີ ໃນເນື້ອທີ່ 400 ເຮັກຕາ, ໝາກເດືອຍ ໃນເນື້ອທີ່ 1.000 ເຮັກຕາ, ມັນຕົ້ນ ໃນເນື້ອທີ່ 4.000 ເຮັກຕາ ແລະ ຖົ່ວດິນ ໃນເນື້ອທີ່ 30 ເຮັກຕາ. ປູກພືດຜັກໄວ້ບໍລິໂພກຕ່າງໆ ໃນເນື້ອທີ່ 400 ເຮັກຕາ. ການປູກໝາກໄມ້ກິນໝາກ ໃນເນື້ອທີ່ 162 ເຮັກຕາ ແລະ ການປູກໄມ້ອຸດສາຫະກຳ ໃນເນື້ອທີ່ 6.902 ເຮັກຕາ ເປັນຕົ້ນແມ່ນ: ຢາງພາລາ ໃນເນື້ອທີ່ 6.817 ເຮັດຕາ ແລະ ໄມ້ອຸດສາຫະກຳອື່ນໆຈຳນວນ 100 ເຮັກຕາ. ນອກຈາກການຊຸກຍູ້ສົ່ງເສີມການປູກພືດຂອງຊາວກະສິກອນພາຍໃນເມືອງແລ້ວ ທາງອົງການປົກຄອງເມືອງ ແລະ ຂະແໜງການທີ່ກ່ຽວຂ້ອງຍັງໄດ້ຊຸກຍູ້ສົ່ງເສີມໃຫ້ນັກລົງທຶນພາຍໃນ ແລະ ຕ່າງປະເທດເຂົ້າມາລົງທຶນເຂົ້າໃນການປູກພືດອຸດສາຫະກຳຫຼາຍຂຶ້ນ ເປັນຕົ້ນແມ່ນຢາງພາລາ ທັງໝົດນີ້ກໍເພື່ອເປັນການສ້າງວຽກເຮັດງານທຳ, ສ້າງລາຍຮັບໃຫ້ປະຊາຊົນຈາກການເຊົ່າທີ່ດິນ, ຄ່າແຮງງານກໍາມະກອນ ແລະ ອື່ນໆ ເເນໃສ່ຍົກສູງຊີວິດການເປັນຢູ່ຂອງຊາວກະສິກອນ ໃນເມືອງຊຽງຮ່ອນ ແລະ ມີຊີວິດການເປັນຢູ່ດີຂຶ້ນເປັນກ້າວໆ.
ຂ່າວ: ດອນ ຂຽວພະນາ
