ໃນອາທິດຜ່ານມານີ້, ທີ່ຫ້ອງວ່າການແຂວງສະຫວັນນະເຂດ, ທ່ານ ຄໍາສິດ ພົມມະຈັນ ຫົວໜ້າ ສູນຝຶກອົບຮົມສອນ ເປົ່າແຄນໄດ້ ນໍາພາອາຈານ ອຸດອນສັກ ແພງຍະລາດ ຊ່າງແຄນດີເດັ່ນແຫ່ງຊາດ ແລະຄູສອນດົນຕີມະໂຫລີພື້ນ ເມືອງເຂົ້າຢ້ຽມຂໍ່ານັບ ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ໂດຍມີ ທ່ານຜູ້ຕາງໜ້າສະມາຄົມນັກທຸລະກິດຍິງ ແຂວງ, ທີມງານຈາກວິທະຍາໄລ ສິລະປະດົນຕີແຫ່ງຊາດ ແລະ ຊາວໝຸ່ມ-ໄວໜຸ່ມໝໍແຄນຮຸ່ນສືບທອດພາຍໃນສູນເຂົ້າຮ່ວມ.
ໂອກາດນີ້, ທາງສູນຝຶກເປົ່າແຄນ, ຜະລິດແຄນ ແລະດົນຕີພື້ນບ້ານ ກໍ່ໄດ້ລາຍງານເຖິງແຜນ ການຝຶກອົບຮົມຊຸດທີ 3 ໂດຍ ຈະມີການຝຶກສອນຢູ່ 3 ວຽກຄື: ສອນຜະລິດລີ້ນແຄນເງິນ ແລະ ທອງນາກ ໃຫ້ຊ່າງສືບທອດຮຸ່ນ ໜຸ່ມ, ສອນດົນຕີມະໂຫລີພື້ນເມືອງ ແລະສອນເປົ່າແຄນ ໂດຍມີຄູຝຶກ ຈາກສູນກາງ ເພື່ອສາມາດສ້າງຊາວໜຸ່ມ-ໄວໜຸ່ມຮຸ່ນສືບທອດ ທາງດ້ານສິລະປະຂອງລາວເຮົາ ແລະເພື່ອຮັບໃຊ້ສັງຄົມ.
ສຳລັບຊຸດອົບຮົມຄັ້ງນີ້ມີຜູ້ມາສະໝັກແລ້ວ 45 ຄົນ, ໃນນີ້ ຝຶກອົບຮົມຊ່າງແຄນສືບທອດ ຈຳນວນ 10 ຄົນ, ຝຶກອົບຮົມດົນຕີມະໂຫລີພື້ນເມືອງໃຫ້ກັບຊາວໜຸ່ມ, ເຍົາວະຊົນ 15 ຄົນ ແລະສອນເປົ່າ ແຄນໃຫ້ກັບນັກຮຽນຊັ້ນມັດທະຍົມພາຍໃນເທສະບານນະຄອນ ໄກສອນພົມວິຫານ 20 ຄົນ. ສຳລັບທ່ານໃດທີ່ມີຄວາມສົນໃຈ ທີ່ຢາກຈະມາຮຽນ ຫຼື ຢາກນຳເອົາ ລູກຫຼານມາຮຽນກໍ່ສາມາດມາລົງທະບຽນຮຽນໄດ້ທີ່ສູນຝຶກອົບຮົມຄູສອນເປົ່າແຄນ, ຜະລິດແຄນ ແລະ ດົນຕີພື້ນບ້ານແຂວງສະຫວັນນະເຂດ ເລີ່ມແຕ່ວັນທີ 1 ຫາວັນທີ 15 ສິງຫານີ້(ໂດຍບໍ່ເສຍຄ່າ)
ໂອກາດດັ່ງກ່າວ, ທ່ານເຈົ້າ ແຂວງສະຫວັນນະເຂດ ກໍ່ໄດ້ຍ້ອງຍໍຊົມເຊີຍມາຍັງສູນດັ່ງກ່າວ ທີ່ຈັດຕັ້ງປະຕິບັດໂຄງການສືບຕໍ່ຊຸດທີ 3 ໂດຍສະເພາະການຜະລິດລີ້ນແຄນເງິນ ແລະທອງນາກ ທີ່ບໍ່ມີຜູ້ຜະລິດແລ້ວໃຫ້ໄດ້ກັບຄືນມາ ເພາະແມ່ນມູນມໍລະດົກວັດທະນະທໍາອັນລໍ້າຄ່າຂອງຊາດລາວ ເພື່ອໃຫ້ຢູ່ຄຽງຄູ່ກັບຊາດລາວ-ຄົນ ລາວຕະຫຼອດໄປ ເພາະການເສຍວັດທະນະທໍາກໍ່ປຽບເໝືອນການເສຍຊາດ, ທ່ານໄດ້ເນັ້ນໃຫ້ທາງສູນຂຸ້ນຂ້ຽວໃນການຜະລິດແຄນ ທີ່ມີໂລໂກ້ເປັນເອກະລັກຂອງແຂວງ ພ້ອມແທ່ນຕັ້ງ ເພື່ອສ້າງປະດັບເອ້ຢ້ອງໃນຫ້ອງປະຊຸມໃຫຍ່ ຂອງແຕ່ລະພະແນກການ, ສໍານັກງານ, ກົມກອງອ້ອມຂ້າງພາຍໃນ ແຂວງ ເພື່ອສື່ເຖິງສັນຍາລັກສຽງແຄນລາວຂອງຄົນລາວ.
