ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຊ່ຽວຊານໂຄງການ ພັດທະນາຊົນນະບົດ ( KfW) ສສ ເຢຍລະມັນ ເຄື່ອນໄຫວເຮັດວຽກຢູ່ແຂວງຜົ້ງສາລີ

ເພື່ອກະກຽມໂຄງການເບື້ອງຕົ້ນຢູ່ບັນດາແຂວງທີ່ສະເໜີຂໍງົບປະມານ ຈາກລັດຖະບານເຢຍລະມັນ ເພື່ອກໍ່ສ້າງເສັ້ນທາງຊົນນະບົດ ຢູ່ ແຂວງຫົວພັນ, ແຂວງຊຽງຂວາງ, ແຂວງຫຼວງພະບາງ ແລະ ແຂວງຜົ້ງສາລີ ເພື່ອກະກຽມໂຄງການ, ເບິ່ງສະພາບທາງໃນປະຈຸບັນ, ບຸລິມະລິດຂອງແຂວງ ວ່າມີຄວາມຈໍາເປັນຕ່າງໆນັ້ນ. ວັນທີ 17 ກຸມພາ 2020 ນີ້ ຊ່ຽວຊານໂຄງການ ພັດທະນາຊົນນະບົດ ( KfW) ສສ ເຢຍລະມັນ ນຳໂດຍ ທ່ານ ນາງ ອາເລັກຊັນດາ ຊ່ຽວຊານໂຄງການ ພັດທະນາຊົນນະບົດ ( KfW) ສສ ເຢຍລະມັນ ພ້ອມດ້ວຍຜູ້ຕາງໜ້າຈາກ ກະຊວງ ໂຍທາທິການ ແລະ ຂົນສົ່ງ ໄດ້ມາເຄື່ອນໄຫວເກັບກຳຂໍ້ມູນເພື່ອກຽມໂຄງການຢູ່ແຂວງຜົ້ງສາລີ ເຊິ່ງກ່ອນອື່ນທາງທີມງານໄດ້ເຂົ້າພົບ ທ່ານ ບົວທອງ ອູແສງຄຳ ຮອງເລຂາພັກແຂວງ ປະທານສະພາປະຊາຊົນແຂວງຜົ້ງສາລີ ທີ່ຫ້ອງຮັບແຂກຫ້ອງວ່າການແຂວງ ຢູ່ເທດສະບານໃຫມ່ຂອງແຂວງ ທີ່ເມືອງບູນເຫນືອ. ກ່ອນອື່ນ ທ່ານ ຮອງເລຂາພັກແຂວງຜົ້ງສາລີໄດ້ລາຍງານສະພາບການພັດທະນາເສດຖະກິດ-ສັງຄົມ ແລະ ການກໍ່ສ້າງພື້ນຖານໂຄງລ່າງຂອງແຂວງຜົ້ງສາລີໃຫ້ຄະນະໄດ້ຮັບຊາບ, ແຂວງຜົ້ງສາລີ ເປັນແຂວງພູດອຍ ພ້ອມທັງເຫວເລິກພູສູງກວມ 90% ສະນັ້ນ, ຈິ່ງເຮັດໃຫ້ການກໍ່ສ້າງພື້ນຖານໂຄງລ່າງ, ການພັດທະນາເສດຖະກິດ-ສັງຄົມມີຄວາມຫຍຸ້ງຍາກ,ການດຶງດູດນັກລົງທຶນເຂົ້າມາລົງທຶນຍັງຈຳກັດ, ການລົງທຶນຍັງມີຄວາມສ່ຽງ, ເຮັດໃຫ້ຊິວິດການເປັນຢູ່ຂອງປະຊາຊົນພົບຄວາມຫຍຸ້ງຍາກ.

ຈາກນັ້ນ ທ່ານ ນາງ ອາເລັກຊັນດາ ຊ່ຽວຊານໂຄງການ ພັດທະນາຊົນນະບົດ ( KfW) ສສ ເຢຍລະມັນ ໄດ້ສະແດງຄວາມຂອບໃຈທີ່ໄດ້ຮັບການຕ້ອນຮັບຢ່າງອົບອຸ່ນ ແລະ ໄດ້ລາຍງານຈຸດປະສົງຂອງການມາຢ້ຽມຢາມ ແລະ ເຮັດວຽກໃນຄັ້ງນີ້ໃຫ້ທ່ານເຈົ້າແຂວງພ້ອມຄະນະໄດ້ຮັບຮູ້, ການມາເຮັດວຽກໃນຄັ້ງນີ້ກໍເພື່ອ ລົງເກັບກໍາຂໍ້ມູນ ກ່ຽວກັບການກໍ່ສ້າງພື້ນຖານໂຄງລ່າງພັດທະນາຊົນນະບົດຢູ່ແຂວງຜົ້ງສາລີເປັນຕົ້ນແມ່ນ ຂົງເຂດວຽກງານ ໂຍທາທິການ ແລະຂົນສົ່ງ, ວຽກງານສຶກສາທິການ ແລະ ກິລາ, ວຽກງານສາທາລະນາສຸກ, ວຽກງານກະສິກໍາ ເພື່ອນໍາສະເໜີໃຫ້ລັດຖະບານເຢຍລະມັນໃຫ້ທຶນຊ່ວຍເຫຼືອໃນການພັດທະນະພື້ນຖານໂຄງລ່າງເຂດຊົນນະບົດ ແລະ ເພື່ອແກ້ໄຂຄວາມທຸກຍາກຂອງແຂວງຜົ້ງສາລີໃຫ້ດີຂຶ້ນເທື່ອລະກ້າວ.

ພ້ອມນີ້ທ່ານ ນາງ ອາເລັກຊັນດາ ຊ່ຽວຊານໂຄງການ ພັດທະນາຊົນນະບົດ ( KfW) ສສ ເຢຍລະມັນ ຍັງເປັນປະທານຮ່ວມກັບ ທ່ານ ບຸນທະວີ ສໍສຸກັນ ກຳມະການພັກແຂວງ, ຫົວຫນ້າພະແນກໂຍທາທິການ ແລະ ຂົນສົ່ງແຂວງຜົ້ງສາລີ ຮ່ວມເປີດກອງປະຊຸມປຶກສາຫາລືລະຫວ່າງຊ່ຽວຊານໂຄງການ ພັດທະນາຊົນນະບົດ ( KfW) ສສ ເຢຍລະມັນ ກັບ ພະແນກການທີ່ກ່ຽວຂ້ອງໂດຍມີພະແນກໂຍທາທິການ ແລະຂົນສົ່ງ, ພະແນກສຶກສາທິການ ແລະ ກິລາ, ພະແນກສາທາສາທາລະນາສຸກ, ພະແນກກະສິກໍາ-ປ່າໄມ້ ເພື່ອກຽມຂໍ້ມູນສະເຫນີຂໍທຶນຈາກໂຄງການດັ່ງກ່າວ.

ໂອກາດນີ້ຄະນະຍັງໄດ້ລົງເບິ່ງຕະຫລາດ, ສຸກສາລາ ກຸ່ມບ້ານຕ້າງ, ສຳຫລວດເບິ່ງເສັ້ນທາງແຕ່ແຍກສຸກສາລາບ້ານຕ່າລິຊຸ ຫາ ບ້ານລາວແມ້ວ ແລະ ບ້ານຊຽວລີຊູ, ແຕ່ແຍກສຸກສາລາບ້ານຕ່າລິຊຸ ຫາ ບ້ານສີນຈ້າຍ ແລະ ຈົນຮອດເຂດບ້ານມາລີເທົາ ເມືອງຍອດອູ ແລະ ທາງທີມງານຍັງຈະໄດ້ເຄື່ອນໄຫວຢູ່ເມືອງຜົ້ງສາລີ ແລະ ເມືອງສຳພັນຕື່ມອີກ.

ເຊິ່ງການເຄື່ອນໄຫວເຮັດວຽກ ຂອງຄະນະໃນນີ້ຈະໃຊ້ເວລາ 2 ວັນຈິ່ງສໍາເລັດ.

ຂ່າວ: ສົມຄິດ ແກ້ວນວນລາ (ແຂວງຜົ້ງສາລີ)