ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຊ້າງນ້ອຍ ຄອງແຊ້ມ ການແຂ່ງຂັນບານເຕະ ລາວລີກ ຍິງ ປະຈຳປີ 2023
ການແຂ່ງຂັນເຕະບານ ລາວລີກ ປະຈຳປີ 2023 ເປັນຄັ້ງທໍາອິດ ທີ່ຈັດເປັນແບບລະບົບລີກ ເພື່ອເປັນການສົ່ງ ເສີມກິລາບານເຕະຍິງ ໄດ້ມີເວທີເຄື່ອນໄຫວຝຶກແອບແຂ່ງຂັນຢ່າງຕໍ່ເນື່ອງ ໂດຍງົບປະມານຫຼັກໃນການຈັດຄັ້ງນີ້ ໄດ້ຮັບການສະໜັບສະ ໜູນຈາກ ສະຫະພັນບານເຕະນາໆຊາດ ຫຼື (FIFA) ເພື່ອຈັດການແຂ່ງຂັນແບບຍືນຍົງ ແລະ ຈັດຂຶ້ນທຸກໆ ປີ ເພື່ອພັດທະນານັກກີລາ ທັງເປັນການຄັດເລືອກນັກກິລາສູ່ທີມຊາດ ເຊິ່ງນັບແຕ່ປີ 2023 ເປັນຕົ້ນໄປ ລີກບານເຕະທີມຍິງ ຈັດໃຫ້ຄຽງຄູ່ກັບທີມຊາຍ ແລະ ຈະເພີ່ມຈໍານວນທີມເຂົ້າຮ່ວມຂຶ້ນເລື້ອຍໆ ຕາມມາດຖານເງື່ອນໄຂ ແລະ ຈະມີການພິຈາລະນາວ່າຈະໃຫ້ມີການຕົກຊັ້ນເລື່ອນຊັ້ນໃນອະນາຄົດ.
ສໍາລັບການແຂ່ງຂັນເຕະບານ ລາວລີກ ປະຈຳປີ 2023 ເລີ່ມແຂ່ງຂັນມາແຕ່ວັນທີ 21 ຕຸລາ ແລະ ໄດ້ສຳເລັດວັນທີ 10 ທັນວາ 2023 ໂດຍມີ 8 ທີມເຂົ້າຮ່ວມ ຄື: ຊ້າງນ້ອຍ, ມາສເຕີ ເຊເວັ້ນ, ເອສຣາ, ກອງທັບ, ຫຼວງພະບາງ, ຈຳປາສັກ, ນໍ້າທາ ແລະ ວຽງຈັນ.
ພິທີປິດການແຂ່ງຂັນໄດ້ມີຂຶ້ນຢູ່ທີ່ສະຫນາມສູນຝຶກ ສະຫະພັນບານເຕະແຫ່ງຊາດລາວ ໃນວັນທີ 10 ທັນວາ 2023 ໂດຍເປັນກຽດເຂົ້າຮ່ວມຂອງ ທ່ານ ຄຳໄພ ປຣະເສີດ ຮອງປະທານ ສະຫະພັນບານເຕະແຫ່ງຊາດລາວ, ພ້ອມດ້ວຍຄະນະບໍລິຫານງານສະ ຫະພັນບານເຕະແຫ່ງຊາດ, ຕະຫລອດຮອດຄູຝຶກ,ນັກກິລາ,ແຟນບານ ແລະ ສື່ມວນຊົນ ເຂົ້າຮ່ວມ.
ຜົນການແຂ່ງຂັນບານເຕະ ລາວລີກຍິງ ປະຈຳປີ 2023
– ຊະນະເລີດ ແມ່ນທີມຊ້າງນ້ອຍ ໄດ້ຮັບຂັນ, ຫລຽນຊະນະເລີດ ແລະ ໄດ້ຮັບເງິນລາງວັນ 100 ລ້ານກີບ ໂດຍລົງສະຫນາມ 14 ນັດ ຊະນະ 13 ນັດ ເສຍ 1 ນັດ ມີ 39 ຄະແນນ
– ຮອງຊະນະເລີດອັນດັບ ແມ່ນ ມາສເຕີ້ ເຊເວັ້ນ ໄດ້ຮັບເງິນ 50 ລ້ານກີບ ລົງສະຫນາມ 14 ນັດ ຊະນະ 8 ນັດ ສະເຫມີ 4 ນັດ ເສຍ 2 ນັດ ມີ 28 ຄະແນນ.
– ອັນດັບ 3 ມາສເຕີ້ ເຊເວັ້ນ ໄດ້ຮັບເງິນ 20 ລ້ານກີບ ລົງສະຫນາມ 14 ນັດ ຊະນະ 9 ນັດ ສະເຫມີ 1 ນັດ ເສຍ 4 ນັດ ມີ 28 ຄະແນນ ເທົ່າກັບ ມາສເຕີ້ ເຊເວັ້ນ, ແຕ່ສະຖິຕິການພົບກັນຂອງສອງທີມ ມາສເຕີ້ ເຊເວັ້ນ ເຮັດໄດ້ດີກວ່າ.
ຂະນະ ທີ່ ລາງວັນປະເພດບຸກຄົນ ຄູຝຶກດີເດັ່ນຕົກເປັນຂອງ ພຸດປະສົງ ແສງດາລາວົງ ຄູຝຶກ ຈາກສະໂມສອນ ຊ້າງນ້ອຍ, ລາງວັນຜູ້ຮັກສາປະຕູດີເດັ່ນ ບັງອອນ ພອນໄຊ ຈາກ ສະໂມສອນ ກິລາບານເຕະຊ້າງນ້ອຍ ລົງສະຫນາມ 11 ນັດ ເສຍພຽງ 7 ປະຕູ, ລາງວັນນັກກິລາດີເດັ່ນ ວິລິນທອນ ວົງແສງທອງ ຈາກ ສະໂມສອນ ຊ້າງນ້ອຍ ລົງສະຫນາມ 14 ນັດ ຍິງໄດ້ 2 ປະຕູ ແລະ ລາງວັນຜູ້ຍິງປະຕູສູງສຸດ ໃຈຄຳ ໄຊຍະປະເສິດ ຈາກ ສະໂມສອນ ມາສເຕິ້ ເຊເວັ້ນ ລົງສະ ຫນາມ 14 ນັດ ຍິງໄດ້ 31 ປະຕູ.
ການແຂ່ງຂັນຄັ້ງນີ້ແມ່ນໄດ້ຮັບການສະຫນັບສະຫນູນຫຼັກຈາກ ສະຫະພັນບານເຕະນາໆຊາດ ຫຼື ຟີຟາ, ບໍລິສັດລາວໂທລະຄົມມະຫາຄົມ ຈຳກັດ, ວຽງຈັນໄອສ໌, ບໍລິສັດ ວາຣິິ ແລະ ບໍລິສັດ ອີໂວ ສະຕໍ.
Cr: ສຕລ