ໃຫ້ກຽດເຂົ້າຮ່ວມໂດຍພະນະທ່ານ ສົມເດັດ ຮຸ່ນເຊນ ນາຍົກລັດຖະມົນຕີ ຣາຊະອານາຈັກ ກຳປູເຈຍ ແລະ ບັນດາການນຳຂັ້ນສູງຈາກບັນດາປະເທດໃນອາຊຽນ ໂດຍສະເພາະແມ່ນຕາງໜ້າສປປ ລາວແມ່ນທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ທັງເປັນປະທານຄະນະກຳມະການະາຣາແລມປິກແຫ່ງຊາດລາວ.
ສ່ວນນຳພາທັບນັກກິລາຄົນພິການລາວຍ່າງເຂົ້າສະໜາມແມ່ນທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ ທັງເປັນຮອງປະທານ ແລະ ເລຂາທິການ ຄະນະກຳມະການພາຣາແລມປິກແຫ່ງຊາດລາວ, ຫົວໜ້າຄະນະນຳພານັກກິລາຄົນພິການລາວ ພ້ອມດ້ວຍຄະນະ ແລະ ຮັບກຽດຖືທຸງຊາດລາວ ແມ່ນ ນາງ ລັດສະໝີ ສີປະເສີດ ນັກກິລາຍົກນໍ້າໜັກຄົນພິການທີມຊາດລາວ ເຈົ້າຂອງ 2 ຫລຽນເງິນ ອາຊຽນພາຣາເກມ ຄັ້ງທີ 11.
ງານກິລາອາຊຽນພາຣາເກມ ຄັ້ງນີ້ ມີຄະນະນຳ, ຄູຝຶກ ແລະ ນັກກິລາເຂົ້າຮ່ວມ 2.692 ຄົນ ຈາກ 11 ຊາດໃນອາຊຽນ ສະເພາະ ສປປ ລາວ ສົ່ງເຂົ້າຮ່ວມ 89 ຄົນ, ຍິງ 36 ຄົນ ຮ່ວມແຂ່ງຂັນໃນ 7 ປະເພດກິລາ ຈາກທັງໝົດ 14 ປະເພດກິລາທີ່ເຈົ້າພາບບັນຈຸແຂ່ງຂັນຄື: ບານເຕະຄົນພິການຕາ (5 ຄົນ), ໂກນບານ, ບັອກເຊຍ, ບານບ້ວງລໍ້ເລື່ອນທີມຍິງ, ລອຍນໍ້າ, ຍົກນໍ້າໜັກ ແລະ ແລ່ນ-ລານ. ງານຄັ້ງນີ້ ຈະແຂ່ງຂັນໃນລະຫວ່າງວັນທີ 3-9 ມິຖຸນານີ້.
