ປີ 2023 ຜ່ານມານີ້, ຍອດມູນຄ່າການຄ້າດ້ານສິນຄ້າ ລະຫວ່າງອາຊຽນ ແລະ ຍີ່ປຸ່ນ ມີມູນຄ່າ 239.5 ຕື້ໂດລາສະຫະລັດ, ກວມເອົາ 6.8% ຂອງມູນຄ່າການຄ້າທັງ ໝົດຂອງອາຊຽນ, ເຮັດໃຫ້ຍີ່ປຸ່ນເປັນຄູ່ຄ້າອັນດັບທີ 4 ຂອງອາຊຽນ. ພ້ອມນີ້, ມູນຄ່າການລົງທຶນໂດຍກົງ (FDI) ຂອງນັກລົງທຶນຈາກຍີ່ປຸ່ນຢູ່ບັນດາປະເທດສະມາຊິກອາຊຽນ ມີປະມານ 14.5 ຕື້ໂດລາສະຫະລັດ, ກວມເອົາ 6.3% ຂອງມູນຄ່າການລົງທຶນໂດຍກົງຈາກຕ່າງປະເທດຢູ່ໃນອາຊຽນໃນປີ 2023 ເຮັດໃຫ້ຍີ່ປຸ່ນ ເປັນອັນດັບທີ 5 ຂອງບັນດາປະເທດທີ່ມີມູນຄ່າການລົງທຶນຫຼາຍຢູ່ໃນອາຊຽນ.
ຂໍ້ມູນດັ່ງກ່າວໄດ້ຮັບການເປີດເຜີຍຢູ່ກອງປະຊຸມປຶກສາຫາລືລະຫວ່າງລັດຖະມົນ ຕີເສດຖະກິດອາຊຽນ ແລະ ກະຊວງເສດຖະກິດ, ການຄ້າ ແລະ ອຸດສາຫະກໍາຍີ່ປຸ່ນ ຄັ້ງທີ 30 ຈັດຂຶ້ນໃນວັນທີ 21 ກັນຍາ 2024 ທີ່ນະຄອນຫລວງວຽງຈັນ ພາຍໃຕ້ການເປັນປະທານຮ່ວມຂອງ ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກໍາ ແລະ ການຄ້າ, ສປປ ລາວ ແລະ ທ່ານ ໂຢຊິດະ ໂນບຸຮິໂລ ຮອງລັດຖະມົນຕີກະ ຊວງເສດຖະກິດ, ການຄ້າ ແລະ ອຸດສາຫະກໍາປະເທດ ຢີ່ປຸ່ນ.
ກອງປະຊຸມຄັ້ງນີ້ ໄດ້ເນັ້ນໃສ່ທົບທວນຄືນຄວາມຄືບໜ້າຂອງການຈັດຕັ້ງປະຕິ ບັດສັນຍາການຮ່ວມມືທາງເສດຖະກິດຮອບ ດ້ານ ແລະ ແຜນການຮ່ວມມືທາງເສດ ຖະກິດ ໂດຍສະເພາະການຈັດຕັ້ງປະຕິບັດແຜນສົ່ງເສີມນະວັດຕະກໍາ ແລະ ພັດທະນາເສດຖະກິດແບບຍືນຍົງລະຫວ່າງ ອາຊຽນ ແລະ ຍີ່ປຸ່ນ. ນອກຈາກນີ້ ໄດແລກປ່ຽນທັດສະນະ ຕໍ່ກັບຂໍ້ສະເໜີຂອງສະພາການຄ້າ ແລະ ອຸດສາຫະກໍາຂອງຍີ່ປຸ່ນ ແລະ ຮັບຟັງການລາຍງານກ່ຽວກັບການກະກຽມກອງປະຊຸມສຸດຍອດ ລະຫວ່າງອາຊຽນ ແລະ ຍີ່ປຸ່ນ ຄັ້ງທີ 27.
ທ່ານ ມະໄລທອງ ກົມມະສິດ ໃຫ້ຮູ້ວ່າ: ປີຜ່ານມາ ອາຊຽນ-ຍິ່ປຸ່ນ ໄດ້ປຶກສາຫາລືໃນຫຼາຍບັນຫາທີ່ຕິດພັນກັບການຮ່ວມມື ລະຫວ່າງອາຊຽນ ແລະ ຍີ່ປຸ່ນ ເຊິ່ງໃນນັ້ນໄດ້ປຶກສາຫາລືກ່ຽວກັບ ແຜນງານການຮ່ວມມືລະຫວ່າງ ອາຊຽນ ແລະ ຢີ່ປຸ່ນ, ການພັດ ທະນາເສດຖະກິດແບບຍືນຍົງ, ການນໍາໃຊ້ເຕັກໂນໂລຊີເຂົ້າໃນວຽກງານການຄ້າ ແລະ ການລົງທຶນ ແລະ ການສ້າງຄວາມເຂັ້ມແຂງແກ່ຕ່ອງໂສ້ການສະໜອງ.
ສອງຝ່າຍ ຍັງໄດ້ຮັບຮອງເອົາແຜນສົ່ງເສີມນະວັດຕະກໍາ ແລະ ພັດທະນາເສດຖະ ກິດແບບຍືນຍົງລະຫວ່າງອາຊຽນ ແລະ ຍີ່ປຸ່ນ ໄລຍະປີ 2023-2033, ໄດ້ຮັບຊາບກ່ຽວກັບຄວາມຄືບໜ້າຂອງການສ້າງຕັ້ງສູນນະວັດຕະກໍາດີຈີຕອນ ແລະ ເສດຖະ ກິດແບບຍືນຍົງຂອງສະຖາບັນຄົ້ນຄວ້າເສດຖະກິດອາຊຽນ ແລະ ອາຊີຕາເວັນອອກ (ERIA).
