ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຍຶດຖືອາຊີບ ລ້ຽງໝູ ເປັນສິນຄ້າ ພາຄອບຄົວພົ້ນທຸກ

ນາງ ເກດມະນີ ວິໄລສອນ ປະຈຸ​ບັນ​ຢູ່​ບ້ານ​ເມືອງ​ຫານ, ​ເມືອງ​ຫົງ​ສາ, ​ແຂວງ​ໄຊ​ຍະ​ບູລີ, ເປັນຄອບຄົວຕົວແບບໃນການລ້ຽງໝູເປັນສິນຄ້າ​ ໄດ້ເລົ່າສູ່ຟັງວ່າ: ພາຍໃນຄອບຄົວຂອງຂ້າພະເຈົ້າມີຈໍານວນພົນ 5 ຄົນ, ຍິງ 4 ຄົນ, ມີແຮງງານຕົ້ນຕໍ 2 ແຮງງານ, ໂດຍປະຕິບັດຕາມແຜນພັດທະນາເສດຖະກິດ-ສັງຄົມຂອງເມືອງ ແລະ ການປຸກລະດົມຊຸກຍູ້ຂອງຫ້ອງການກະສິກໍາ ແລະ ປ່າໄມ້ເມືອງ ຕິດພັນກັບຄວາມຮຽກຮ້ອງຕ້ອງການຂອງການບໍລິໂພກຊີ້ນໝູ ເປັນຈໍານວນຫຼາຍໃນແຕ່ລະວັນ, ແຕ່ພາຍໃນເມືອງ ຫົງສາ ແມ່ນບໍ່ສາມາດຕອບສະໜອງໄດ້ຕາມຄວາມຕ້ອງການ, ຈໍາຕ້ອງໄດ້ນຳໝູເຂົ້າຈາກຕ່າງເມືອງ, ຕ່າງແຂວງ ແລະ ຕ່າງປະເທດເປັນຈຳນວນຫຼາຍ, ເພາະວ່າເມືອງ ຫົງສາ ເປັນເມືອງທີ່ມີໂຄງການຂະໜາດໃຫຍ່ຕັ້ງຢູ່ ກໍ່ຄືໂຮງງານໄຟຟ້າຫົງສາ ເຊິ່ງມີພະນັກງານຈຳນວນຫຼາຍເຮັດວຽກຢູ່ໂຮງງານດັ່ງກ່າວ, ດັ່ງນັ້ນຈຶ່ງໄດ້ເລີ່ມລ້ຽງໝູແຕ່ທ້າຍປີ 2011-2012 ເປັນຕົ້ນມາ ໂດຍໄດ້ນໍາເອົາໝູນ້ອຍຈໍານວນໜຶ່ງເຂົ້າມາລ້ຽງເປັນໝູຂຸນຊີ້ນຂາຍ ເຫັນວ່າໄດ້ຂາຍດີ ແລະ ມີກຳໄລ, ແຕ່ວ່າການຊອກຫາໝູນ້ອຍມາລ້ຽງແຕ່ລະຄັ້ງ ແມ່ນມີຄວາມຫຍຸງຍາກ ບໍ່ໄດ້ຕາມຄວາມຕ້ອງການ ແລະ ກຳນົດເວລາ ເຮັດໃຫ້ການລ້ຽງບໍ່ຕໍ່ເນື່ອງ, ຈົນມາຮອດປີ 2013 ນາງ ເກດມະນີ ວິໄລສອນ ຈຶ່ງໄດ້ເພາະພັນໝູນ້ອຍເອງ, ເນື່ອງຈາກລາຄາໝູນ້ອຍແມ່ນມີລາຄາສູງ ແລະ ບໍ່ສາມາດຕອບສະໜອງໃຫ້ແກ່ຜູ້ລ້ຽງໝູຊີ້ນໄດ້, ໂດຍໄດ້ຊອກຫາວິທີເພາະພັນໝູນ້ອຍ ຈາກຄົນຮູ້ຈັກ ຜູ້ທີ່ເຄີຍລ້ຽງຜ່ານມາ ແລະ ສຶກສານໍາສື່ຕ່າງໆເຊັ່ນ: ປື້ມຕຳລາ, ວາລະສານ ແລະ ອິນເຕີເນັດຕ່າງໆ ໂດຍສະເພາະແມ່ນ ຄີບແນະນຳການລ້ຽງໝູຈາກອິນເຕີເນັດ, ເບື້ອງຕົ້ນແມ່ນໄດ້ນຳແມ່ພັນພໍ່ພັນ ເຂົ້າມາລ້ຽງຈຳນວນ 10 ໂຕ ເພື່ອເພາະພັນເອົາລູກໝູ (ໝູນ້ອຍ) ຂາຍໃຫ້ກັບຜູ້ລ້ຽງໝູຊີ້ນພາຍໃນເມືອງ ເຫັນວ່າມີຜົນກຳໄລຫຼາຍຂື້ນ ແລະ ໝູນ້ອຍກໍ່ບໍ່ພໍຂາຍ, ຈົນມາຮອດທ້າຍປີ 2014 ຈຶ່ງໄດ້ເພີ່ມພໍ່ແມ່ພັນຂຶ້ນຕື່ມເປັນ 30 ໂຕ ແຕ່ກໍ່ຍັງບໍ່ພໍຂາຍ ເນື່ອງຈາກວ່າ ຂ້າພະເຈົ້າໄດ້ຊອກຫາຕະຫຼາດໃນການຕອບສະໜອງໝູນ້ອຍເພີ່ມຂຶ້ນ ໂດຍສະເພາະແມ່ນຕ່າງເມືອງ ຕ່າງແຂວງເຊັ່ນ: ເມືອງຮຸນ, ເມືອງໄຊ ແຂວງ ອຸດົມໄຊ, ຈາກນັ້ນເລີ່ມແຕ່ທ້າຍປີ 2017 ເປັນຕົ້ນມາ ຈົນເຖິງປະຈຸບັນແມ່ນໄດ້ເພີ່ມພໍ່, ແມ່ພັນຂຶ້ນເປັນ 80 ກວ່າໂຕ ພ້ອມທັງລ້ຽງໝູຊີ້ນເພີ່ມຂຶ້ນ ໂດຍການເອົາໝູນ້ອຍທີ່ຕົນເອງຜະລິດໄດ້ ມາຕໍ່ຍອດສ້າງກຳໄລເພີ່ມ ເພື່ອສ້າງລາຍຮັບໃຫ້ແກ່ຄອບຄົວເພີ່ມຂື້ນ, ປະຈຸບັນມີໝູຊີ້ນທັງໝົດ ນັບແຕ່ນ້ຳໜັກ 15 ກິໂລຂຶ້ນໄປ ທີ່ເອົາລົງຄອກຂຸນ ມີ 500 ກວ່າໂຕ ສາມາດຕອບສະໜອງ ຫຼື ຂາຍປ້ອນຕະຫຼາດປະມານ 80-100 ​ໂຕຕໍ່​ເດືອນ, ສ້າງ​ລາຍ​ຮັບ​ໃຫ້​ແກ່​ຄອບຄົວ ຫຼັງ​ຫັກ​ຄ່າ​ໃຊ້​ຈ່າຍ​ຕ່າງໆ​ແລ້ວຈະ​ໄດ້​ກຳ​ໄລ​ຢູ່​ປະມານ 20 ລ້ານ​ກວ່າ​ກີບຕໍ່ເດືອນ, ນອກຈາກ​ນີ້​ ຍັງ​ໄດ້​ລ້ຽງ​ປາ ​ແລະ ສັດ​ປີກ​ອີກ​ຈຳ​ນວນ​ໜຶ່ງເຮັດໃຫ້ຊີວິດການເປັນຢູ່ຂອງຄອບຄົວນັບມື້ດີຂຶ້ນເທື່ອລະກ້າວ.

ນາງ ເກດມະນີ ວິໄລສອນ ຍັງໃຫ້ຮູ້ຕື່ມອີກວ່າ: ຂໍ້​ສະດວກໃນການລ້ຽງໝູແມ່ນພັກ-ລັດ​ກໍ່​ຄື​ຫ້ອງການ​ກະສິກຳ ​ແລະ ປ່າ​ໄມ້​ໃຫ້ການ​ຊຸກຍູ້​ສົ່ງ​ເສີມ, ​​ແນະນຳ ​ແລະ ອຳ​ນວຍ​ຄວາມ​ສະດວກ​ດ້ານຕ່າງໆ​ເປັນ​ຢ່າງ​ດີ, ສາມາດ​ຜະລິດ​ແນວ​ພັນ ຫຼື​ ໝູ​ນ້ອຍ​ລ້ຽງ​ຂຸນ​ເອງ ​ເຮັດ​ໃຫ້​ຕົ້ນ​ທຶນ​ການ​ຜະລິດ​ຫຼຸດ​ລົງ,ສາມາດ​ປະສົມ​ອາຫານ​ດ້ວຍ​ຕົນ​ເອງ ​ເຮັດ​ໃຫ້​ຕົ້ນ​ທຶນ​ອາຫານ​ຫຼຸດ​ລົງ, ມີ​ສະຖານ​ທີ່​ເໝາະ​ສົມ ​ແລະ ປະສົບ​ການ​ໃນ​ການ​ລ້ຽງ​ໝູ.

ນັກຂ່າວ: ຫ້ອງວ່າການແຂວງ ໄຊຍະບູລີ

ໂດຍ: ອຸ່ນເຮືອນ ໂພທິລັກ