ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ປີ 2023, ຈີນໄດ້ສົ່ງອອກລົດຍົນໃນຈໍານວນ 4.910.000 ຄັນ, ເພີ່ມຂຶ້ນ 57,9% ເມື່ອທຽບໃສ່ໄລຍະດຽວກັນຂອງປີ 2022, ໃນນັ້ນ, ລົດພະລັງງານໃໝ່ໄດ້ສົ່ງອອກ 1.203.000 ຄັນ, ເພີ່ມຂຶ້ນ 77,6% ເມື່ອທຽບໃສ່ໄລຍະດຽວກັນຂອງປີ 2022, ເຮັດໃຫ້ຈີນໄດ້ກາຍເປັນປະເທດທີ່ມີຍອດປະລິມານສົ່ງອອກດ້ານລົດຍົນຫຼາຍອັນດັບໜຶ່ງໃນໂລກເປັນເທື່ອທໍາອິດ ພ້ອມທັງໄດ້ກາຍເປັນພະລັງແຮງອັນສໍາຄັນໃນການຊຸກຍູ້ການຫັນປ່ຽນຂອງອຸດສາຫະກໍາລົດຍົນໃນໂລກ.
ອຸດສາຫະກໍາລົດຍົນຂອງຈີນໄດ້ຮັບການພັດທະນາຢ່າງວ່ອງໄວ ແລະ ໝັ້ນທ່ຽງບົນເສັ້ນທາງແຫ່ງການບັນລຸການພັດທະນາດ້ວຍຄຸນນະພາບສູງ, ສິ່ງນີ້ໄດ້ສ່ອງແສງໃຫ້ເຫັນເຖິງພະລັງຊີວິດແຫ່ງການປະດິດສ້າງດ້ານເຕັກໂນໂລຊີ, ຄວາມໜຽວແໜ້ນຂອງຕ່ອງໂສ້ອຸດສາຫະກໍາ ແລະ ຕ່ອງໂສ້ການສະໜອງ ກໍຄືໂອກາດການຕະຫຼາດຂອງຂະແໜງການຕ່າງໆຂອງຈີນ.
ພາຍຫຼັງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກຄອມມູນິດຈີນເປັນຕົ້ນມາ, ສູນກາງພັກຄອມມູນິດຈີນທີ່ມີສະຫາຍ ສີຈິ້ນຜິງ ເປັນແກນນໍານັ້ນ ໄດ້ສະເໜີທິດສະດີຕ່າງໆຢ່າງມີຫົວຄິດປະດິດສ້າງ ເຊັ່ນ: ການປະດິດສ້າງເປັນແຮງຂັບເຄື່ອນອັນດັບໜຶ່ງ, ຈັດຕັ້ງປະຕິບັດຍຸດທະສາດນໍາໃຊ້ການປະດິດສ້າງຂັບເຄື່ອນການພັດທະນາຢ່າງຮອບດ້ານ, ສ້າງເປັນປະເທດທີ່ເຂັ້ມແຂງດ້ານວິທະຍາສາດເຕັກໂນໂລຊີໃນໂລກ, ເລັ່ງລັດຊຸກຍູ້ການເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງດ້ານວິທະຍາສາດເຕັກໂນໂລຊີ ເປັນຕົ້ນ, ເຮັດໃຫ້ຈີນກ້າວເຂົ້າສູ່ຖັນແຖວປະເທດແຫ່ງການປະດິດສ້າງ. ທິດສະດີອັນສໍາຄັນຂອງທ່ານ ສີຈິ້ນຜິງ ກ່ຽວກັບການເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງດ້ານວິທະຍາສາດເຕັກໂນໂລຊີນັ້ນ, ໄດ້ບັນຍາຍເປົ້າໝາຍຍຸດທະສາດ, ໜ້າທີ່ຈຸດສຸມ, ມາດຕະການສໍາຄັນ ແລະ ຄວາມຮຽກຮ້ອງພື້ນຖານໃນການຊຸກຍູ້ການປະດິດສ້າງດ້ານວິທະຍາສາດເຕັກໂນໂລຊີຂອງຈີນຢ່າງເປັນລະບົບ.
ໃນຊຸມປີມໍ່ໆມານີ້, ຈີນໄດ້ລົງເລິກຈັດຕັ້ງຜັນຂະຫຍາຍແນວຄິດການພັດທະນາແບບໃໝ່, ຊຸກຍູ້ການພັດທະນາດ້ວຍຄຸນນະພາບສູງຢ່າງເດັດດ່ຽວໜຽວແໜ້ນບໍ່ຫວັ່ນໄຫວ, ເຮັດໃຫ້ການເຕີບໂຕຂອງເສດຖະກິດຈີນຍິ່ງສ່ອງແສງໃຫ້ເຫັນເຖິງລັກສະນະສີຂຽວຕື່ມອີກ ເຊິ່ງການພັດທະນາອຸດສາຫະກໍາລົດຍົນຂອງຈີນແມ່ນໄດ້ສ່ອງແສງໃຫ້ເຫັນເຖິງແນວຄິດການພັດທະນາແບບນີ້.
ອະນາຄົດ, ຈີນຈະສືບຕໍ່ຮັດແໜ້ນພື້ນຖານດ້ານການປະດິດສ້າງເພີ່ມທາດແທ້ແບບສີຂຽວໃຫ້ຫຼາຍຂຶ້ນ ແລະ ເປີດກວ້າງທ່ວງທ່າການເປີດປະຕູສູ່ພາຍນອກ ເພື່ອເພີ່ມພະລັງແຮງອັນໃຫຍ່ຫຼວງກວ່າເກົ່າເຂົ້າໃນການບັນລຸການພັດທະນາແບບປະດິດສ້າງ, ການພັດທະນາແບບສີຂຽວ ແລະ ການພັດທະນາແບບເປີດກວ້າງຂອງໂລກ.