ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຊຸດອົບຮົມໂຄງການ: ສ້າງຄວາມເຂັ້ມແຂງ ແລະ ປັບປຸງຜະລິດຕະພາບໃນຂະບວນການຜະລິດໃຫ້ກຸ່ມຜູ້ ຜະລິດກະສິກຳເປັນສິນຄ້າ (ໂສມ) ຈັດຂຶ້ນວັນທີ 7 ກຸມພາ 2024 ,ທີ່ເມືອງດາກຈຶງ ແຂວງເຊກອງ ໂດຍການເປັນປະທານຂອງທ່ານ ນາງ ວິລະຄອນ ບັນທະເວີ ຮອງຫົວໜ້າພະແນກອຸດສະຫະກຳ ແລະ ການຄ້າແຂວງ, ຜູ້ຊີ້ນຳຂະແໜງວຽກງານສົ່ງເສີມການຄ້າພາຍໃນ, ທ່ານ ສະເຫຼີມໄຊ ຫຼ່ຽມຜີ ຮອງອຳນວຍການສຳນັກງານສົ່ງເສີມຈຸນລະວິສາຫະກິດ,ວິສາຫະກິດຂະໜາດນ້ອຍ ແລະກາງ, ມີຫົວໜ້າຫ້ອງການອຸດສາຫະກຳ ແລະການຄ້າເມືອງ ພ້ອມດ້ວຍຜູ້ປະກອບການ ແລະສຳມະນາກອນມາ 2 ບ້ານຄື: ບ້ານດາກວໍ ແລະບ້ານດາກຣັນເຂົ້າຮ່ວມ.
ທ່ານ ນາງ ວິລະຄອນ ບັນທະເວີ ກ່າວວ່າ: ຊຸດຝຶກອົບຮົມຄັ້ງນີ້ ແມ່ນມີຄວາມໝາຍ, ຄວາມສໍາຄັນຫລາຍ ເນື່ອງຈາກຜົນຜະລິດທີ່ດີໃຫ້ໄດ້ທັງປະລິມານ ແລະຄຸນນະພາບນັ້ນ ຕ້ອງໄດ້ຜ່ານດ້ານເຕັກນິກ,ຂະບວນການຂັ້ນຕອນການປູກ,ການເກັບກ່ຽວ,ຜົນຜະລິດທີ່ຖືກວິທີ,ວັດຖຸດິບປະເພດໂສມທີ່ມີຄຸນນະພາບຈະເຮັດໃຫ້ຜູ້ນຳມາແປຮູບ,ຜະລິດປຸງແຕ່ງໄດ້ສິນຄ້າທີ່ມີຄຸນນະພາບສາມາດແຂ່ງຂັນກັບຕະຫລາດພາຍໃນ ແລະພາຍນອກຫລາຍຂຶ້ນ, ຄືດັ່ງທີ່ພວກເຮົາຮູ້ນຳກັນແລ້ວວ່າ ຜົນຜະລິດ ກະສິກຳ ປະເພດໂສມ ສາມາດນຳມາຜະລິດປຸງແຕ່ງໄດ້ຫລາກຫລາຍຜະລິດຕະພັນ ເຊິ່ງປະຈຸບັນ ແຂວງເຊກອງພວກເຮົາມີສິນຄ້າທີ່ພົ້ນເດັ່ນຄື: ໂສມສະກັດ,ຊາໂສມ, ເຫລົ້າດອງໂສມ. ພວກເຮົາຍັງມີແຜນຊຸກຍູ້ສົ່ງເສີມຫົວໜ່ວຍທຸລະກິດຜູ້ປະກອບການຜະລິດໃຫ້ໄດ້ຫລາຍຜະລິດຕະພັນໃໝ່ຈາກໂສມ. ຫວັງຢ່າງຍິງວ່າ ການເຝິກອົບຮົມໃນຄັ້ງນີ້ ຈະໄດ້ຄວາມຮູ້ໃໝ່ເພິ່ມຕື່ມ ເພຶ່ອນຳໄປໝູນໃຊ້ ເຂົ້າໃນແຕ່ລະຂະບວນການ ໃຫ້ໄດ້ຮັບທັງປະລິມານ ແລະຄຸນນະພາບເພິ່ມຂຶ້ນ ໄປພ້ອມໆກັບຄວາມຢືນຢົງຫມັ້ນຄົງຕະຫຼອດໄປ.
ຊຸດເຝິກອົບຮົມຈະໄດ້ພ້ອມກັນຮັບຟັງການບັນຍາຍຈາກຄູຝຶກທີ່ມີຄວາມຮູ້-ຄວາມສາມາດ, ມີປະ ສົບການ ເຊັ່ນ: ເຕັກນິກການປູກ, ຂະບວນການສັງເກດ ແລະ ການເກັບກູ້ໂສມໃຫ້ຖືກວິທີ ແລະ ມີຄຸນນະພາບ ; ການພັດທະນາທຸລະກິດຊຸມຊົນ ແລະ ການຜະລິດທີ່ດີ ໂດຍການນໍາໃຊ້ກິດຈະກໍາ 5 ສ ຄື: ສະສາງ, ສະອາດ, ສະດວກ, ສຸຂາອະນາໄມ ແລະ ສ້າງນິໄສ; ການນໍາໃຊ້ເຕັກນິກ ແລະ ວິທີການຜະລິດ ຫຼື ແປຮູບໂສມເປັນຜະລິດຕະພັນ;ຄວາມສໍາຄັນໃນການຈົດຖິ່ນກຳເນີດໂສມດາກຈຶ່ງ;ບົດບາດຄະນະຂົນຂວາຍ ແລະ ການສ້າງຕັ້ງສະມາຄົມ ແລະ ບົດຮຽນອື່ນໆ ໂດຍຈະດໍາເນີນໄປເປັນເວລາ 03 ວັນຈຶງຈະສຳເລັດ.
ຂ່າວ: ສະໄໝ ບົວລະພາ