ການຝຶກອົບຮົມ ຂະບວນການສ້າງແຜນບຸລິມະສິດການສຳຫລວດ, ເກັບກູ້ ແລະ ທຳລາຍລະເບີດບໍ່ທັນແຕກ ທີ່ຕົກຄ້າງ ໃຫ້ພະນັກງານ ພະແນກການທີ່ກ່ຽວຂ້ອງຂອງແຂວງ ແລະ 5 ເມືອງ ຢູ່ແຂວງໄຊສົມບູນ ຈັດຂຶ້ນໃນວັນທີ 13 ສິງຫາ 2024 ທີ່ຫ້ອງວ່າການແຂວງໄຊສົມບູນ.
ການຝຶກອົບຮົມໃນຄັ້ງນີ້ ເພື່ອຍົກລະດັບຄວາມຮູ້ ຄວາມສາມາດ ໃຫ້ພະນັກງານ ຜູ້ທີ່ເຮັດວຽກງານກ່ຽວກັບລະເບີດບໍ່ທັນແຕກ ຢູ່ແຂວງໄຊສົມບູນ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ກ່ຽວກັບການກຳນົດສ້າງແຜນບຸລິມະສິດການສຳຫລວດ, ເກັບກູ້ ແລະ ທຳລາຍລະເບີດບໍ່ທັນແຕກທີ່ຕົກຄ້າງ ຢ່າງຖືກຕ້ອງ ແລະ ໃຫ້ການປະສານງານ ລະຫວ່າງ ຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງ ຢູ່ ສປປ ລາວ ກັບຂັ້ນແຂວງ ແລະ ບັນດາເມືອງ ກັບອົງການປະຕິບັດງານແກ້ໄຂບັນຫາລະເບີດບໍ່ທັນແຕກ ເພື່ອລົງເກັບກຳຂໍ້ມູນພື້ນທີ່ຕົວຈິງຢູ່ຂັ້ນບ້ານ ເພື່ອມາວາງແຜນກວດກູ້ ເນື່ອງຈາກປະເທດລາວ ເປັນປະເທດທີ່ມີລະເບີດຕົກຄ້າງ ຈາກສະໄໝສົງຄາມຈຳນວນຫລາຍ ເພື່ອຮັບປະກັນໃຫ້ວຽກງານ ແກ້ໄຂບັນຫາລະເບີດບໍ່ທັນແຕກ ໄດ້ຕອບສະໜອງແກ່ແຜນພັດທະນາ ເສດຖະກິດ-ສັງຄົມແຫ່ງຊາດ, ແຜນພັດທະນາຊົນນະບົດ ແລະ ລຶບລ້າງຄວາມທຸກຍາກ ແລະ ຫລຸດຜ່ອນຈາກລະເບີດບໍ່ທັນແຕກ ທັງເປັນການອຳນວຍຄວາມສະດວກ ໃຫ້ປະຊາຊົນ ສາມາດດຳລົງຊີວິດ ໂດຍສະເພາະ ໃນການທຳການຜະລິດ ໃຫ້ມີຄວາມປອດໄພ ຈາກລູກລະເບີດບໍ່ທັນແຕກ.
ທ່ານ ດວງສີ ທຳມະວົງ ຮອງຫົວໜ້າຫ້ອງການ ຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ, ໜ່ວຍງານຄຸ້ມຄອງຄຸ້ມຄອງສຳຫລວດ-ເກັບກູ້ ໄດ້ກ່າວວ່າ: ການຝຶກອົບຮົມໃນຄັ້ງນີ້ ບັນດາສຳມະນາກອນ ຈະໄດ້ຮຽນຮູ້ກ່ຽວກັບການສ້າງແຜນການສຳຫລວດ, ເກັບກູ້ ແລະ ທຳລາຍລະເບີດບໍ່ທັນແຕກ ທີ່ຕົກຄ້າງ, ຂະບວນການວາງແຜນ, ຄັດເລືອກບຸລິມະສິດ ສຳລັບໜ້າວຽກເກັບກູ້ລະເບີດບໍ່ທັນແຕກ, ການຄຸ້ມຄອງຖານຂໍ້ມູນ, ກົນໄກການພົວພັນປະສານງານ ລະຫວ່າງອົງການປົກຄອງທ້ອງຖິ່ນ ກັບຂະແໜງການແກ້ໄຂບັນຫາລະເບີດບໍ່ທັນແຕກ, ບົດບາດຍິງ-ຊາຍ ໃນຂະແໜງການລະເບີດບໍ່ທັນແຕກ, ຂະບວນການສ້າງແຜນບຸລິມະສິດການກວດກູ້ລະເບີດຂອງອົງການ, ວິທີການຄົ້ນຄວ້າຂະບວນການເກັບກຳຂໍ້ມູນ ເພື່ອສ້າງແຜນບຸລິມະສິດໜ້າວຽກສຳຫລວດ ແລະ ກວດກູ້ລະເບີດບໍ່ທັນແຕກ. ນອກຈາກນີ້, ຜູ້ເຂົ້າຮ່ວມ ຍັງໄດ້ຟັງການນຳສະເໜີກ່ຽວກັບເປົ້າໝາຍການພັດທະນາແບບຍືນຍົງ-18 ກ່ຽວກັບວຽກງານກວດກູ້ລະເບີດບໍ່ທັນແຕກ, ແຜນຍຸດທະສາດແຫ່ງຊາດ ວ່າດ້ວຍການແກ້ໄຂບັນຫາລະເບີດບໍ່ທັນແຕກ ປີ 2021-2030, ແຜນຍຸດທະສາດແຫ່ງຊາດ ຂະແໜງການລະເບີດບໍ່ທັນແຕກ 5 ປີ ຄັ້ງທີ IX (2021-2025), ຄຳສັ່ງວ່າດ້ວຍການເພີ່ມທະວີວຽກງານແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ລາວ ແລະ ຜົນການຈັດຕັ້ງປະຕິບັດວຽກງານແກ້ໄຂບັນຫາລະເບີດບໍ່ທັນແຕກ ຢູ່ສູນກາງ ແລະ ທ້ອງຖິ່ນ ພ້ອມນີ້ ຍັງຈະໄດ້ແບ່ງກຸ່ມ ລົງຝຶກຫັດຕົວຈິງ ຮ່ວມກັບອົງການຈັດຕັ້ງບ້ານພູຫົວຊ້າງຕື່ມອີກ.
ຂ່າວ: ພຸດທະສອນ ເວດສະວົງ
