ສື່ມວນຊົນຫລາຍກວ່າ 30 ຄົນ ຈາກ 9 ປະເທດ ທີ່ເຂົ້າຮ່ວມໂຄງການ ໜຶ່ງແລວ ໜຶ່ງເສັ້ນທາງ (BRI) ລວມມີ: ລາວ, ຫວຽດນາມ, ເກາະໂຊໂລໂມນ, ກູຢານາ, ເນປານ, ໂມຊັມບິກ, ກົງໂກ, ກາໂບນ ແລະ ກາຣິບາຕິ ໄດ້ເຂົ້າຮ່ວມການສໍາມະນາ ພາຍໃຕ້ຫົວຂໍ້ “ອົງການຈັດຕັ້ງສື່ມວນຊົນ ແລະ ສື່ໃໝ່ສໍາລັບປະເທດ BRI” ຈັດຂຶ້ນທີ່ມະຫາວິທະຍາໄລ ສ້າງຄູ ເຈີ້ຈ່ຽງ, ແຂວງຢຸນນານ, ສປ ຈີນ ໃນລະຫວ່າງ ວັນທີ 18-31 ກໍລະກົດ 2024.
ການສຳມະນາຄັ້ງນີ້ ສໍາມະນາກອນຈະໄດ້ຮຽນຮູ້ກ່ຽວກັບສະພາບການພັດທະນາເສດຖະກິດ-ສັງຄົມ ທີ່ພົ້ນເດັ່ນຂອງຈີນ, ລວມເຖິງແນວທາງການຕ່າງປະເທດຂອງຈີນ ໂດຍສະເພາະແນວຄິດກ່ຽວກັບ ໜຶ່ງແລວ ໜຶ່ງເສັ້ນທາງ ຂອງທ່ານ ສີ ຈິ້ນຜິງ, ເຊິ່ງວິໄສທັດໃນການສ້າງ “ ໜຶ່ງແລວ ໜຶ່ງເສັ້ນທາງ” ແມ່ນເພື່ອສ້າງເສັ້ນທາງເພື່ອສັນຕິພາບ, ໜຶ່ງເສັ້ນທາງເພື່ອການພັດທະນາ, ໜຶ່ງເສັ້ນທາງເພື່ອການເປີດກວ້າງຂຶ້ນ, ໜຶ່ງເສັ້ນທາງເພື່ອນະວັດຕະກຳ ແລະ ໜຶ່ງເສັ້ນທາງເພື່ອການເຊື່ອມຈອດກັບຄວາມສີວິໄລທີ່ແຕກຕ່າງກັນ. ໜຶ່ງແລວ ໜຶ່ງເສັ້ນທາງ ແມ່ນລວມຍອດຜະລິດພັນຂອງຍຸກສະໄໝ ທີ່ປະຊາຄົມໂລກມີຄວາມປາດຖະໜາມາຕັ້ງແຕ່ດົນນານ ເພື່ອນຳພາຄວາມສີວິໄລຮັ່ງມີຜາສຸກມາໃຫ້ມວນມະນຸດໃນໂລກນີ້ ເພື່ອເຮັດໃຫ້ການພົວພັນ, ໄປມາຫາສູ່ກັນ ມີຄວາມສະດວກສະບາຍ ແລະ ຫລຸດຜ່ອນການສິ້ນເປື້ອງເວລາການເດີນທາງ ກໍຄືການຂົນສົ່ງສິນຄ້າມີຄວາມວ່ອງໄວ, ສະດວກສະບາຍຍິ່ງຂຶ້ນ.
ນອກຈາກນີ້ ສໍາມະນາກອນທີ່ເຂົ້າຮ່ວມການສໍາມະນາຍັງຈະໄດ້ຮຽນຮູ້ກ່ຽວກັບການພັດທະນາສື່ໃໝ່ ໃນຂົງເຂດສື່ມວນຊົນຂອງຈີນ, ລວມເຖິງໄດ້ແລກປ່ຽນບົດຮຽນ ແລະ ປະສົບການຮ່ວມກັນໃນການປະຕິບັດວຽກງານຕົວຈິງ ແລະ ອື່ນໆ.
ສຳລັບຂໍ້ລິເລີ່ມ ໜຶ່ງແລ້ວ ໜຶ່ງເສັ້ນທາງ ມາຮອດປີ 2023 ຜ່ານມາ ເຊິ່ງເປັນປີຄົບຮອບ 10 ປີແຫ່ງການຮ່ວມກັນສ້າງ “ໜຶ່ງແລວ ໜຶ່ງເສັ້ນທາງ”. ປະເທດຈີນ ໄດ້ເຊັນເອກະສານຮ່ວມມື 200 ກວ່າສະບັບ ໃນການຮ່ວມກັນສ້າງ “ໜຶ່ງແລວ ໜຶ່ງເສັ້ນທາງ” ກັບ 150 ກວ່າປະເທດ ແລະ 30 ກວ່າອົງການຈັດຕັ້ງສາກົນ.
ສ່ວນສໍາມະນາໃນຄັ້ງນີ້ແມ່ນຈັດຂຶ້ນໂດຍມະຫາວິທະຍາໄລ ສ້າງຄູ ເຈີ້ຈ່ຽງ, ແຂວງຢຸນນານ, ສປ ຈີນ ໂດຍໄດ້ຮັບການສະໜຸກສະໜູນຈາກ ກະຊວງການຄ້າ ແຫ່ງ ສປ ຈີນ.
