ສະມາຄົມໂຮງແຮມ ແລະ ຮ້ານອາຫານລາວ ໄດ້ຈັດພິທີແນະນຳສະໂມສອນເຊຟລາວ ພ້ອມແນະນຳວິທີປຸງແຕ່ງອາຫານລາວ ແລະ ສາກົນ ຈາກຄູສອນຜູ້ມີປະສົບການພາຍໃຕ້ການເປັນປະທານທ່ານ ປະກາສິດ ຈັນທະປັນຍາ ປະທານສະມາຄົມໂຮງແຮມ ແລະ ຮ້ານອາຫານລາວ.
ທ່ານ ປະກາສິດ ຈັນທະປັນຍາ ກ່າວວ່າ: ສະມາຄົມໂຮງແຮມ ແລະ ຮ້ານອາຫານລາວ ໄດ້ມີປະຫວັດອັນຍາວນານ ໃນການສົ່ງເສີມອຸດສາຫະກຳການບໍລິການ ແລະ ການທ່ອງທ່ຽວຂອງລາວ ເພື່ອເປັນການສົ່ງເສີມນະໂຍບາຍທີ່ເປັນປະໂຫຍດ ແລະ ຍົກລະດັບມາດຕະຖານໃນຂະແໜງການດັ່ງກ່າວ ເຊິ່ງການແນະນຳສະໂມສອນເຊຟລາວຄັ້ງນີ້ ເປັນອີກບາດກ້າວໜຶ່ງໃນການພັດທະນາ ເພື່ອຮວບຮວມພໍ່ຄົວ ແລະ ແມ່ຄົວທີ່ມີຄວາມສາມາດ ສົ່ງເສີມການແລກປ່ຽນຄວາມຮູ້ ແລະ ທັກສະສ້າງໂອກາດໃໝ່ໆສໍາລັບຜູ້ທີ່ມີຄວາມກະຕືລືລົ້ນໃນດ້ານການປຸງແຕ່ງອາຫານ.
ທ່ານ ສຸດາລັດ ພັນພູທອນ ອາຈານສອນເຊຟລາວ ທັງເປັນຜູ້ກໍ່ຕັ້ງສະໂມສອນເຊຟລາວກ່າວວ່າ: ການຈັດງານຄັ້ງນີ້ເພື່ອສົ່ງເສີມ ແລະ ແນະນໍາອາຊີບປຸງແຕ່ງອາຫານ ໃຫ້ໄດ້ຮັບການຍອມຮັບທຽບເທົ່າກັບມາດຕະຖານຂອງພໍ່ຄົວແມ່ຄົວ ໃນລະດັບສາກົນ ໂດຍຈະນໍາສະເໜີ ອາຫານພື້ນເມືອງ ລວມທັງການນໍາໃຊ້ວັດຖຸດິບປະຈໍາທ້ອງຖິ່ນ ມາປະກອບເປັນອາຫານແບບມືອາຊີບ ເພື່ອຮັບຕ້ອນແຂກນາໆຊາດທີ່ກຳລັງໃຫ້ຄວາມສົນໃຈ ແລະ ເຂົ້າມາທ່ອງທ່ຽວໃນ ສປປ ລາວ.
ໃນພິທີ, ຍັງມີການລົງນາມຮ່ວມກັນເພື່ອເປັນການສົ່ງເສີມການປະກອບອາຊີບ ການປຸງແຕ່ງອາຫານລາວ ໃຫ້ເປັນທີ່ຍອມຮັບໃນບັນດາຮ້ານອາຫານ ໂຮງແຮມ ແລະ ພັດຕະຄານລະດັບແຖວໜ້າຂອງລາວ. ພ້ອມນັ້ນຈະຈັດກິດຈະກຳຝຶກອົບຮົມ ແລະ ມອບໃບຢັ້ງຢືນເພື່ອເປັນຕົວແທນໃຫ້ແກ່ປະເທດລາວ ເຂົ້າຮ່ວມງານມະຫາກໍາອາຫານອາຊຽນນາໆຊາດທີ່ຈັດຂຶ້ນທຸກໆປີ.
ຂ່າວ: ວຽງຈັນໃຫມ່
