ວັນທີ1 ກໍລະກົດນີ້, ທີ່ຫ້ອງການສຳນັກງານສູນກາງແນວລາວສ້າງຊາດ(ສນຊ)ໄດ້ຈັດພິທີລົງນາມບົດບັນທຶກຄວາມເຂົ້າໃຈການຮ່ວມມືພັດທະນາແລະຍົກລະດັບວາລະສານລາວສ້າງຊາດລະຫວ່າງກົມໂຄສະນາສນຊກັບບໍລິສັດ Garuda Media ຈໍາກັດ ຂອງ ສປ ຈີນ,ໂດຍການໃຫ້ກຽດເຂົ້າຮວ່ມເປັນສັກຂີພິຍານຂອງທ່ານນາງ ອີນລາວັນ ແກ້ວບຸນພັນ ຮອງປະທານສນຊ ແລະທ່ານ ຊຸຍດຶງຄັງ ຫົວຫນ້າບໍລິສັດ ກາລຸດາ ມີເດຍ ຈໍາກັດ ພ້ອມດ້ວຍຄະນະຂອງສອງພາກສ່ວນເຂົ້າຮ່ວມ.
ການເຊັນສັນຍາຮ່ວມມືກັນຄັ້ງນີ້, ເປັນການຍົກລະດັບ ແລະປັບປຸງວາລະສານລາວສ້າງຊາດໄປສູ່ຄຸນນະພາບໃຫມ່ ແລະກ້າວສູ່ສາກົນເທື່ອລະກ້າວ ທັງເປັນການຜັນຂະຫຍາຍ 5 ແຜນງານໃນການພັດທະນາວຽກງານແນວລາວສ້າງຊາດ ໂດຍສະເພາະແມ່ນແຜນງານທີ 4 ວ່າດ້ວຍການຮ່ວມມືກັບອົງການພາຄີ ແລະການ ຮ່ວມມືສາກົນ.
ອາຍຸການຮ່ວມມືຕາມສັນຍາແມ່ນ 5 ປີ, ພາຍຫຼັງເຊັນສັນຍາ, ສອງຝ່າຍຈະໄດ້ຮ່ວມມືກັນທາງດ້ານເນື້ອໃນ (ຝ່າຍລາວສະໜອງຂ່າວ 50% ແລະຝ່າຍຈີນ 50%), ຮູບແບບ, ສີສັນ, ເພີ່ມເປັນ 3 ພາສາ (ລາວ, ຈີນ ແລະອັງກິດ) ແລະເປົ້າຫມາຍແຈກຢາຍ (ກໍານົດຈໍານວນພິມສະບັບຫນຶ່ງ 15,000 ຫົວ) ເພື່ອໂຄສະນາເຜີຍ ແຜ່ໃຫ້ທົ່ວສັງຄົມທັງພາຍໃນ ແລະຕ່າງປະເທດໄດ້ຮັບຮູ້, ເຂົ້າໃຈກ່ຽວກັບພາລະບົດບາດ, ຫນ້າທີ່ ແລະການເຄື່ອນໄຫວຂອງແນວລາວສ້າງຊາດ ແຕ່ລະຂັ້ນຫຼາຍຂຶ້ນກວ່າເກົ່າ ລວມເຖິງຂໍ້ມູນມູນຂ່າວສານຂອງສອງປະເທດ, ທັງເປັນການປະກອບສ່ວນເສີມຂະືຫຍາຍສາຍພົວພັນມິດຕະພາບ ແລະການຮ່ວມມືອັນເປັນມູນເຊື້ອຂອງສອງ ຊາດລາວ-ຈີນ ບົນຈິດໃຈ 4 ດີ ແລະຄູ່ຮ່ວມຊາຕາກໍາລາວ-ຈີນ.
ວາລະສານ ໄດ້ຮັບການສ້າງຕັ້ງຂຶ້ນໃນປີ 1997 ໃສ່ຊື່ວ່າ: ວາລະສານລາວສ້າງຊາດ, ຊຶ່ງໄດ້ພິມອອກເປັນລາຍເດືອນ, ມີ 60 ຫນ້າເປັນຫນ້າສີທັງຫມົດ, ພິມຄັ້ງຫນຶ່ງ 2.000 ຫົວຕໍ່ມາແຕ່ລະໄລຍະໄດ້ມີການປັບປຸງຫລາຍຄັ້ງ, ການພິມເປັນລາຍສອງເດືອນ ແລະເປັນພາສາລາວທັງຫມົດ.
