ສະພາແຫ່ງຊາດ (ສພຊ) ຈັດຝຶກອົບຮົມຍົກສູງຂີດຄວາມສາມາດ ໃນການກະກຽມເນື້ອໃນຕ່າງໆ ແລະ ທັກສະໃນການຮ່າງບົດລາຍງານຫຍໍ້ ບົດບັນທຶກ ບົດສັງລວມຂໍ້ມູນ ການຕີພິມ (Track-Changes) ແລະ ອື່ນໆ ໃຫ້ແກ່ວິຊາການໃນການກະກຽມຄວາມພ້ອມຮັບໃຊ້ກອງປະຊຸມສະມັດຊາໃຫຍ່ ລັດຖະສະພາ ລະຫວ່າງຊາດອາຊຽນ (AIPA) ຄັ້ງທີ 45 ໃນວັນທີ 1-2 ຕຸລາ 2024 ທີ່ເມືອງວັງວຽງ ແຂວງວຽງຈັນ ເປັນປະທານຂອງ ທ່ານ ນາງ ວັນດີ ບຸດທະສະວົງ ຮອງປະທານກໍາມາທິການການຕ່າງປະເທດ ມີວິທະຍາກອນ ສຳມະນາກອນ ແລະ ຂະແໜງການກ່ຽວຂ້ອງເຂົ້າຮ່ວມ.
ທ່ານ ນາງ ວັນດີ ບຸດທະສະວົງ ກ່າວວ່າ ການຝຶກອົບຮົມຄັ້ງນີ້ເປັນໂອກາດທີ່ດີໃຫ້ແກ່ຜູ້ເຂົ້າຮ່ວມໄດ້ຮຽນຮູ້ ແລກປ່ຽນປະສົບການ ຖອດຖອນບົດຮຽນນຳຊ່ຽວຊານມາຈາກຫຼາຍປະເທດ ຫຼາຍສາຂາວິຊາ ທີ່ຈະສົ່ງຄວາມຮູ້ໃຫ້ເພື່ອນຳໄປໃຊ້ເຂົ້າໃນວຽກງານຕົວຈິງ ໂດຍສະເພາະແມ່ນບັນດາໜ້າວຽກທີ່ຈະໄດ້ກະກຽມຄວາມພ້ອມ ກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ທີ່ຈະເປີດຂຶ້ນໃນມໍ່ໆມານີ້.
ການຝຶກອົບຮົມຄັ້ງນີ້ໄດ້ເນັ້ນໃສ່ຫຼາຍບັນຫາສໍາຄັນເຊັ່ນ ການດຳເນີນກອງປະຊຸມ AIPA ຄັ້ງທີ 45 ວາລະການປະຊຸມ ຂັ້ນຕອນ ປະເດັນເຫດການທີ່ສຳຄັນ ພາບລວມຂອງຄະນະກຳມະການ ຂໍ້ມູນເບື້ອງຕົ້ນກ່ຽວກັບກອງປະຊຸມສະມັດຊາໃຫຍ່ໄອປາ (ຄວາມເປັນມາຂອງ AIPA, ໜ້າທີ່ ກົດລະບຽບ ແລະ ແນວທາງໃນການປະຕິບັດ) ຄູ່ມືການຮ່າງບົດລາຍງານຫຍໍ້ ການບັນທຶກ ການສັງລວມຂໍ້ມູນ ການຕີພິມບົດລາຍງານຂອງກອງປະຊຸມກຳມາທິການ ແລະ ກອງປະຊຸມພົບປະກັບປະເທດສັງເກດການ ຂັ້ນຕອນ ແລະ ເຫດການຕ່າງໆ ການກະກຽມກອງປະຊຸມສາກົນໂດຍເນັ້ນໜັກການກະກຽມຄວາມພ້ອມ ແລະ ການດຳເນີນກອງປະຊຸມ ພາລະບົດບາດ-ໜ້າທີ່ຂອງພະນັກງານຮັບໃຊ້ການທົບທວນຄືນ ແລະ ປັບປຸງເອກະສານ ການເຂົ້າເຖິງຂໍ້ມູນ ການກະກຽມຄວາມພ້ອມໃຫ້ແກ່ກອງປະຊຸມ ກຳມາທິການຕ່າງໆ ຂັ້ນຕອນການກະກຽມຮ່າງມະຕິ ແລະ ການຄົ້ນຄວ້າປະກອບຄຳເຫັນຂອງຄະນະຜູ້ແທນ ການກະກຽມເອກະສານສຳລັບກອງປະຊຸມພົບປະ ລະຫວ່າງ ຜູ້ນຳອາຊຽນ-ໄອປາ ໜ້າທີ່ຄວາມຮັບຜິດຊອບ ແລະ ບັນຫາອື່ນໆທີ່ກ່ຽວຂ້ອງ ຊຸດຝຶກອົບຮົມຄັ້ງນີ້ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກສະເຕັບສ໌ ໂດຍຜ່ານ ICPMS ສົມທົບກັບງົບປະມານຂອງຄະນະເລຂາທິການສະພາແຫ່ງຊາດ.
ທີ່ມາ: ວຽງຈັນໃໝ່
