ຍົກສູງຄຸນນະພາບການຕິດຕາມກວດກາ ຂອງແນວລາວສ້າງຊາດ ແລະ ອົງການຈັດຕັ້ງມະຫາຊົນ

ທ່ານ ນາງ ອາລິຍາວັນ ອັກຄະວົງ ຮອງປະທານຄະນະບໍລິ ຫານງານສູນກາງສະຫະພັນກຳມະບານລາວ ໄດ້ເຂົ້າຮ່ວມກອງປະຊຸມສຳມະນາຍົກສູງຄຸນນະພາບການຕິດຕາມກວດກາຂອງແນວລາວສ້າງຊາດ ແລະ ອົງການຈັດຕັ້ງມະຫາຊົນຕໍ່ການເຄື່ອນ ໄຫວວຽກງານ ຂອງສະພາແຫ່ງຊາດ ໃນວັນທີ 28-29 ສິງຫາ 2024 ໂດຍການເປັນປະທານຂອງທ່ານ ຄຳຈັນ ໂສດາປະເສີດ ປະທານກຳມາທິການບັນດາເຜົ່າ ສະພາແຫ່ງຊາດ.

ທ່ານ ຄຳຈັນ ໂສດາປະເສີດ ໄດ້ກ່າວວ່າ: ໂດຍປະຕິບັດຕາມລັດຖະທໍາມະນູນແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ສະບັບປັບປຸງ ປີ 2015 ມາດຕາ 07 ກໍານົດວ່າ: ແນວລາວສ້າງຊາດ, ສະຫະພັນນັກຮົບເກົ່າ, ສະຫະພັນກໍາມະບານລາວ, ສະ ຫະພັນແມ່ຍິງລາວ, ຄະນະຊາວໝຸ່ມປະຊາຊົນປະຕິວັດລາວ ແລະ ບັນດາອົງການຈັດຕັ້ງສັງຄົມ ມີສິດ ແລະ ໜ້າທີ ຕິດຕາມກວດກາ ການເຄື່ອນໄຫວຂອງສະພາແຫ່ງຊາດ, ສະພາປະຊາຊົນທ້ອງຖິ່ນ ແລະ ສະມາຊິກຂອງສະພາດັ່ງກ່າວ.

ເພື່ອທົບທວນຄືນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງແນວລາວສ້າງຊາດ ແລະອົງການຈັດຕັ້ງມະຫາ ຊົນຂັ້ນສູນກາງ ຕາມທີ່ກຳນົດໄວ້ໃນກົດໝາຍ ແລະ ນິຕິກຳໃຕ້ກົດໝາຍ ໃນການຕິດຕາມກວດກາການເຄື່ອນໄຫວວຽກງານຂອງສະພາແຫ່ງຊາດ ເພື່ອຍົກສູງຄຸນນະພາບໃນການເຄື່ອນໄຫວວຽກງານຕາມ 3 ພາລະບົດບາດ ຂອງສະພາແຫ່ງຊາດ. ພ້ອມທັງຕີລາຄາເນື້ອໃນບົດປະກອບຄຳເຫັນຜົນການຕິດຕາມກວດກາການເຄື່ອນໄຫວຂອງສະພາແຫ່ງຊາດ ທີ່ສູນກາງແນວລາວສ້າງຊາດ ຕາງໜ້າອົງການຈັດຕັ້ງມະຫາຊົນຕໍ່ກອງປະຊຸມປະຈຳປີ ຂອງສະພາແຫ່ງຊາດໄລຍະຜ່ານມາ ແລະ ແລກປ່ຽນທັດສະນະໃນການ ຍົກສູງຄຸນນະພາບເນື້ອໃນການປະກອບຄຳເຫັນ ຂອງອົງການແນວລາວສ້າງຊາດ ຕາງໜ້າອົງການຈັດຕັ້ງມະຫາຊົນຕໍ່ກອງປະ ຊຸມໃນຕໍ່ໜ້າ.

ໃນກອງປະຊຸມສຳມະນາແມ່ນໄດ້ຮັບຟັງການສະເໜີຂອງສູນ ກາງແນວລາວສ້າງຊາດ, ກຳມາທິການບັນດາເຜົ່າ, ກຳມາທິການວຽກງານສະມາຊິກສະພາແຫ່ງຊາດ, ກຳມາທິການກົດໝາຍ ແລະ ສະຖາບັນຄົ້ນຄວ້ານິຕິກຳສະພາແຫ່ງຊາດ.

ທີ່ມາ: ສື່ກໍາມະບານ