ສະຫງວນລິຂະສິດ © ສະຖານນີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດ

Lao National Radio

ຊົມເຊີຍ ວັນສ້າງຕັ້ງພັກປະຊາຊົນປະຕິວັດລາວ
ຄົບຮອບ 65 ປີ ຢ່າງສຸດໃຈ

ຍ້ອນມີພັກຊີ້ນໍາ-ນໍາພາຢ່າງຖືກຕ້ອງ ສະຫວັນນະເຂດ ຈຶ່ງໄດ້ຮັບການພັດທະນາຢ່າງຕໍ່ເນື່ອງ

ໃນໂອກາດວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 65 ປີ (22.3.1955-22.3.2020), ສະຫາຍ ໂພໄຊ ໄຊຍະສອນ, ຮອງເລຂາອົງ ຄະນະພັກແຂວງ ແລະຮອງເຈົ້າແຂວງໆສະຫວັນນະເຂດ ໄດ້ໃຫ້ສໍາພາດຕໍ່ສື່ມວນຊົນລາວ ໂດຍສະຫາຍໄດ້ຍົກໃຫ້ເຫັນຜົນສໍາເລັດໃນການພັດທະນາເສດຖະກິດ-ສັງຄົມຂອງແຂວງ ພາຍໃຕ້ການຊີ້ນໍາ-ນໍາພາຂອງພັກ ກໍ່ຄື ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 8 ຂອງອົງຄະນະພັກແຂວງ ສະຫວັນນະເຂດ ໃນໄລຍະ 4 ປີກ່ວາຜ່ານມາ ຊຶ່ງເຫັນວ່າໄດ້ຮັບຜົນສໍາເລັດຢ່າງຕໍ່ເນື່ອງ, ໃນນີ້ ອັນພົ້ນເດັ່ນກໍ່ແມ່ນການພັດທະນາຊົນນະບົດ ແລະ ການລຶບລ້າງຄວາມທຸກຍາກ ຕິດພັນກັບວຽກງານ 3 ສ້າງ. ປັດຈຸບັນ ທົ່ວແຂວງຍັງເຫລືອບ້ານທຸກຍາກ 94 ບ້ານ, ທຽບໃສ່ປີ 2016 ຫລຸດລົງ 55 ບ້ານ, ຄອບຄົວທຸກຍາກຍັງເຫລືອ 7.048 ຄອບຄົວ, ທຽບໃສ່ປີ 2016 ຫລຸດລົງ 1.585 ຄອບຄົວ. ພິເສດໃນປີ 2019 ໄດ້ເປີດຂະບວນແຂ່ງຂັນຮັກຊາດ-ຮັກພັດທະນາແບບການມີສ່ວນຮ່ວມລະຫວ່າງພາກລັດ ແລະ ເອກະຊົນ ເພື່ອສ້າງໃຫ້ເມືອງນອງມີເງື່ອນໄຂກາຍເປັນເມືອງພົ້ນທຸກໃນປີ 2020.

ສໍາລັບການພັດທະນາເສດຖະກິດ-ສັງຄົມ ໂດຍສະເພາະແມ່ນແຜນພັດທະນາເສດຖະກິດ-ສັງຄົມ 5 ປີ, ຮອດປີ 2020 ນີ້, ຄາດວ່າເສດຖະກິດຂອງແຂວງ ຈະຂະຫຍາຍຕົວໃນລະດັບ 10-12% ສະເລ່ຍລວມຍອດຜະລິດຕະພັນພາຍໃນ ຫລື GDP ໃສ່ຫົວຄົນຈະໃຫ້ບັນລຸ 2.780 ໂດລາສະຫະລັດ. ສ່ວນການຜະລິດກະສິກໍາເປັນສິນເປັນສິນຄ້າ ມາຮອດປັດຈຸບັນ ມີ 166 ບໍລີສັດເຂົ້າໄປລົງທຶນປູກຝັງ ແລະ ລ້ຽງສັດຢູ່ແຂວງ ສະຫວັນນະເຂດ ເຊີ່ງປະກອບສ່ວນເຮັດໃຫ້ການຜະລິດກະສິກໍາຂອງປະຊາຊົນພາຍໃນແຂວງນັບມື້ເປັນຂະບວນກ້ວາງຂວາງຂຶ້ນເລື້ອຍໆ.

ດ້ານການພັດທະນາພື້ນຖານໂຄລ່າງພາຍໃນແຂວງ ສະຫວັນນະເຂດ, ມາຮອດປັດຈຸບັນ ບ້ານຕ່າງໆໃນທົ່ວແຂວງມີເສັ້ນທາງເຂົ້າເຖີງໄດ້ສອງລະດູ, ກວມ 80% ແລະ ໄດ້ຊົມໃຊ້ໄຟຟ້າຫລາຍກ່ວາ 92% ຂອງຈໍານວນບ້ານທັງໝົດ. ນອກຈາກນີ້, ວຽກງານວັດທະນະທໍາ-ສັງຄົມ, ການຕ່າງປະເທດ ແລະ ອື່ນໆ ກໍ່ໄດ້ຮັບຜົນສໍາເລັດຢ່າງຕໍ່ເນື່ອງເຊັ່ນດຽວກັນ.

ໃນໂອກາດວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 65 ປີ, ສະຫາຍ ຮອງເລຂາພັກແຂວງ ແລະ ຮອງເຈົ້າແຂວງໆສະຫວັນນະເຂດ ຍັງໄດ້ສະແດງຄວາມພາກພູມໃຈທີ່ເຫັນວ່າມາຮອດປັດຈຸບັນ ພັກປະຊາຊົນ ປະຕິວັດລາວ ນັບມື້ນັບເຕີບໃຫຍ່ເຂັ້ມແຂງຢ່າງຮອບດ້ານ, ພ້ອມທັງສະແດງຄວາມຮູ້ບຸນຄຸນຢ່າງສູງຕໍ່ພັກ ເຊີ່ງແມ່ນຕົ້ນກໍາເນີດຂອງພັກປະຊາຊົນ ໂດຍສະເພາະແມ່ນຕໍ່ສະມາຊິກພັກຮຸ່ນອ້າຍ-ຮຸ່ນເອື້ອຍ, ຮຸ່ນພໍ່ ແລະ ຮຸ່ນແມ່. ພິເສດແມ່ນຕໍ່ປະທານ ໄກສອນ ພົມວິຫານ ທີ່ເຄົາລົບຮັກ ເຊີ່ງເປັນຜູ້ນຳພາທາງບຸກເບີກ ແລະ ຊີ້ນຳນໍາພາຜ່ານຜ່າອຸປະສັກ ແລະ ຄວາມຫຍຸ້ງຍາກນາໆປະການໃນການກໍ່ສ້າງພັກ ແລະ ປັບປຸງພັກນັບຕັ້ງແຕ່ທີ່ຍັງອ່ອນນ້ອຍຈົນເຖີງກ້າວຂຶ້ນໄປສູ່ການເຕີບໃຫຍ່ເຂັ້ມແຂງ ແລະ ຂະຫຍາຍກ້ວາງອອກໃນທຸກຂັ້ນ, ຈາກການຈັດຕັ້ງຈຸພັກ, ໜ່ວຍພັກ, ຮາກຖານພັກ, ຈົນໄປເຖິງຂັ້ນຄະນະພັກເມືອງ, ອົງຄະນະພັກແຂວງ ແລະ ໃນທີ່ສຸດກໍ່ກາຍມາເປັນແກນນໍາໃນຂະບວນການເມືອງຂອງລະບອບປະຊາທິປະໄຕປະຊາຊົນຢ່າງແທ້ຈິງ.

ພວກເຮົາໃນຖານະຮຸ່ນສືບທອດຈະເຮັດທຸກສິ່ງທຸກຢ່າງ ເພື່ອພາລະກິດຂອງພັກ ແລະ ເພື່ອເຮັດໃຫ້ພັກນັບມື້ເຕີບໃຫຍ່ ແລະ ເຂັ້ມແຂງໃນທຸກດ້ານ, ທັງປອດໃສ ຂາວສະອາດ ແລະ ມີຄວາມໜັກແໜ້ນຢ່າງບໍ່ຢຸດຢັ້ງ.