5 ໂຮງຮຽນມັດທະຍົມສຶກສາທີ່ຕັ້ງຢູ່ເຂດຫ່າງໄກສອກຫຼີກຂອງເມືອງມາລິໂປ (Malipo), ແຂວງຢຸນນານ, ສປ ຈີນ ໄດ້ຮັບການຊ່ວຍເຫລືອກໍ່ສ້າງເຮືອນຄົວທີ່ທັນສະໄໝ ແລະ ເດີ່ນກິລາບານບ້ວງໃໝ່ ເຊີ່ງເປັນການຊ່ວຍເຫລືອຈາກສະມາຄົມການທູດປະຊາຊົນຈີນ, ກະຊວງການຕ່າງປະເທດຈີນ ແລະ ບໍລິດສັດ ຢຳໄຊນາ ໃນປະເທດຈີນ.
ພິທີມອບ-ຮັບການຊ່ວຍເຫລືອດັ່ງກ່າວຈັດຂຶ້ນເມື່ອບໍ່ດົນມານີ້, ທີ່ໂຮງຮຽນມັດທະຍົມຕອນຕົ້ນຕ້າຜິງ(Daping) ເຊີ່ງນອກຈາກມີການນໍາຂັ້ນທີ່ກ່ຽວຂ້ອງຈາກກະຊວງການຕ່າງປະເທດຈີນ, ແຂວງຢຸນນານ ແລະ ເມືອງມາລິໂປ, ພ້ອມດ້ວຍຄູອາຈານ ແລະ ນັກຮຽນ, ສື່ມວນຊົນຈາກອາຊຽນ ແລະ ອາຊີໃຕ້ ທີ່ເຂົ້າຮ່ວມໂຄງການສູນຂ່າວສາກົນຈີນກໍໄດ້ເຂົ້າຮ່ວມດ້ວຍ.
ເຮືອນຄົວທີ່ໄດ້ຮັບການຊ່ວຍເຫລືອດັ່ງກ່າວເປັນເຮືອນຄົວທີ່ທັນສະໄໝ ມີອຸປະກອນແຕ່ງກິນທີ່ທັນສະໄໝ, ມີບ່ອນເກັບມຽ້ນທີ່ດີ ເຊີ່ງຮັບປະກັນໃຫ້ນັກຮຽນໄດ້ກິນອາຫານທີ່ປອດໄພ, ມີໂພຊະນາການ, ແລະ ສົດໃໝ່ທຸກທັງຖືກກັບຫລັກສຸຂະອະນາໄມດີ, ສ່ວນສະໜາມກິລາບານບວ້ງ ກໍເຊັ່ນດຽວກັນເປັນສະໜາມທີ່ໄດ້ມາດຕະຖານທີ່ມີລານແຂ່ງຂັນກິລາແລ່ນ-ລານຂະໜາດ 100 ແມັດ 3 ເສັ້ນທາງແລ່ນຢູ່ສອງຂ້າງ ເພື່ອໃຫ້ນັກຮຽນໄດ້ອອກກຳລັງກາຍເພື່ອຊ່ວຍໃຫ້ເຂົາເຈົ້າມີສຸຂະພາບແຂງແຮງ ແລະ ມີພັດທະນາການທີ່ສົມບູນ.
ການຊ່ວຍເຫລືອທັງໝົດນີ້ ແມ່ນຜົນງານການປະກອບສ່ວນຂອງຫຼາຍພາກສ່ວນ ພາຍໃຕ້ໂຄງການ“ຄູ່ຮ່ວມກັນຊ່ວຍເຫຼືອເພື່ອພັດທະນາຊົນນະບົດ” ທີ່ໃຫ້ການຊ່ວຍເຫລືອໂດຍສະມາຄົມການທູດປະຊາຊົນຈີນ, ກະຊວງການຕ່າງປະເທດຈີນ ແລະ ບໍລິດສັດ ຢຳໄຊນາ (Yum China).
ທ່ານ ຫູ ເຈິງຢູເອີ (Hu Zhengyue), ຮອງປະທານ ສະມາຄົມການທູດປະຊາຊົນຈີນ ໄດ້ກ່າວຊົມເຊີຍ ມຸນນິທິຈີນ ເພື່ອການພັດທະນາຊົນນະບົດ, ບໍລິສັດ ເອັນບີເອໄຊນາ (NBA China), ບໍລິສັດ ຢຳໄຊນາ, ເວັບໄຊຫວນຊ້ຽວ, ມຸນນິທິພັດທະນາອິນເຕີເນັດຈີນ, ໜັງສືພິມ ໂກໂບທາມ ອອນລາຍ, ຫ້ອງການໂຄງການຮ່ວມຊ່ວຍເຫຼືອ ແລະ ກົມຂ່າວ ກະຊວງການຕ່າງປະເທດຈີນ, ອຳນາດການປົກຄອງກ່ຽວຂ້ອງ ພາຍໃນແຂວງຢຸນນານ ແລະ ພາກສ່ວນກ່ຽວຂ້ອງອື່່ນໆກໍຄືນັກຮຽນ ແລະ ຄູອາຈານຂອງໂຮງຮຽນ ຕ້າຜິງ ທີ່ໄດ້ປະກອບສວ່ນເຂົ້າໃນການຈັດຕັ້ງປະຕິບັດໂຄງການ ກໍຄືການພັດທະນາຢູ່ພາຍໃນເມືອງມາລິໂປ. ການເປີດນຳໃຊ້ໂຄງການຫ້ອງຄົວທັນສະໃໝ ແລະ ໂຄງການພັດທະນາບານບວ້ງຢູ່ບັນດາໂຮງຮຽນທີ່ໄດ້ຮັບການຊ່ວຍເຫລືອແມ່ນມາດຕະການທີ່ເປັນຮູບປະທຳເພື່ອລະດົມຂົນຂວາຍການປະກອບສ່ວນຈາກທຸກພາກສ່ວນໃນສັງຄົມເພື່ອຈັດຕັ້ງປະຕິບັດເປົ້າໝາຍຂອງລັດຖະບານຈີນບົນເສັ້ນທາງສູ່ການພັດທະນາຊົນນະບົດ.
ສ່ວນ ທ່ານ ນາງ ອາລິສ ຫວາງ (Alice Wang) ຫົວໜ້າຝ່າຍປະຊາສຳພັນ ບໍລິສັດຢຳໄຊນາ ກ່າວວ່າ: ການມອບອຸປະກອນເຮືອນຄົວທີ່ທັນສະໃໝໃຫ້ໂຮງຮຽນພາຍໃນທ້ອງຖິ່ນທັງ 5 ແຫ່ງ ໃນຄັ້ງນີ້ ແມ່ນລວມທັງໂຮງຮຽນມັດທະຍົມຕົ້ນ ຕ້າຜິງ ຢູ່ດ້ວຍ ແລະ ປີນີ້ ເປັນປີຄົບຮອບ 30 ປີ ທີ່ສະມາຄົມການທູດປະຊາຊົນຈີນ, ກະຊວງການຕ່າງປະເທດຈີນ ໄດ້ໃຫ້ການຊ່ວຍເຫຼືອ ເມືອງມາລິໂປ ແລະ ບໍລິສັດ ຍຳໄຊນາ ຮູ້ສຶກເປັນກຽດທີ່ໄດ້ປະກອບສ່ວນເຂົ້າໃນການພັດທະນາເມືອງດັ່ງກ່າວນີ້.
ເຮືອນຄົວຫຼັງໃໝ່
ກ່ອນໜ້ານີ້ 15 ປີ ບໍລິດສັດ ຢຳໄຊນາ ເຊິ່ງເປັນບໍລິສັດບໍລິການຮ້ານອາຫານທີ່ໃຫຍ່ທີ່ສຸດໃນສປຈີນ ໄດ້ທຳການສຳຫຼວດ ແລະ ພົບວ່າ ເດັກນ້ອຍໃນເຂດທຸກຍາກໃນຂອບເຂດທົ່ວປະເທດຈີນຂາດສານອາຫານເປັນສ່ວນໃຫຍ່ ແລະ ດ້ວຍເຫດຜົນດັ່ງກ່າວ ບໍລິສັດ ໄດ້ຮ່ວມມືກັບມຸນນິທິພັດທະນາຊົນນະບົດຈີນເປີດໂຄງການເພື່ອການກຸສົນ ມີຊື່ວ່າ “ບໍລິຈາກໜຶ່ງຢວນ – One Yuan Donation” ປຸກລະດົມໃຫ້ສັງຄົມ ບໍລິຈາກ ເພື່ອນຳເງິນມາຊ່ວຍປັບປຸງວຽກງານໂພຊະນາການຂອງເດັກນ້ອຍໃນເຂດທຸກຍາກຫ່າງໄກສອກຫຼີກ. ໂຄງການບໍລິຈາກດັ່ງກ່າວ ໄດ້ຂະຫຍາຍໄປທົ່ວປະເທດຈີນ ເພື່ອຊ່ວຍປັບປຸງເຮືອນຄົວໂຮງງຮຽນໃນເຂດຊົນນະບົດໃຫ້ທັນສະໄໝແລະ ໄດ້ມອບ ແລະ ຕິດຕັ້ງອຸປະກອນເຮືອນຄົວທີ່ທັນສະໄໝ ທີ່ປະຢັດພະລັງງານແລະ ເປັນມິດຕໍ່ສິ່ງແວດລ້ອມໃຫ້ໂຮງຮຽນທີ່ດ້ອຍໂອກາດ.
ມາຮອດທ້າຍເດືອນຕຸລາປີນີ້ ມີຄົນເຂົ້າຮ່ວມບໍລິຈາກຜ່ານໂຄງການແລ້ວຫຼາຍລ້ານຄົນ ມີເງິນບໍລິຈາກທັງໝົດຫຼາຍກວ່າ 240 ລ້ານຢວນ ເຮັດໃຫ້ເດັກນ້ອຍໃນເຂດຫ່າງໄກສອກຫຼີກໄດ້ກິນອາຫານທີ່ມີໂພຊະນາການປະມານ55 ລ້ານຄາບເຂົ້າ ແລະ ເຮັດໃຫ້ໂຮງຮຽນເກືອບ 1.400 ຫຼັງ ໄດ້ຮັບການຕິດຕັ້ງອຸປະກອນເຮືອນຄົວທີ່ທັນສະໄໝ.
ສະໜາມກິລາແຫ່ງໃໝ່
ໜຶ່ງປີກ່ອນໜ້ານີ້ ສະມາຄົມການທູດປະຊາຊົນຈີນແລະ ບໍລິສັດ ເອັນບີເອໄຊນາໄດ້ຮ່ວມກັນເປີດພິທີບໍລິຈາກສະໜາມບານບວ້ງ ແລະ ສະໜາມແລ່ນລານ ໃຫ້ໂຮງຮຽນມໍຕົ້ນຕ້າຜິງ ພາຍໃຕ້ຄຳຂວັນ “ການຊ່ວຍເຫຼືອທາງການທູດ ເພື່ອສ້າງຄວາມຝັນໃຫ້ຊາວໜຸ່ມ”, ພ້ອມທັງເປີດໂຄງການ ເອັນບີເອ ແຄ (NBA Cares) ເພື່ອຊ່ວຍພັດທະນາກິລາຊາວໜຸ່ມຂອງເມືອງຕ້າຜິງ. ການສ້າງສະໜາມກິລາບານບ້ວງ ແລະ ສະໜາມແລ່ນລານ ພ້ອມດ້ວຍການປະກອບອຸປະກອນກິລາ ເປັນການແກ້ໄຂບັນຫາການຂາດສະໜາມກິລາທີ່ມາດຕະຖານ ແລະ ສ້າງສະພາບແວດລ້ອມການຮຽນການສອນທີ່ປອດໄພ ແລະ ສະດວກສະບາຍໃຫ້ກັບຄູອາຈານ ແລະ ນັກຮຽນ ເຊິ່ງມີບົດບາດສຳຄັນໃນການສົ່ງເສີມການພັດທະນາການສຶກສາຊົນນະບົດ.
ໃນ 30 ກວ່າປີຜ່ານມາ ກະຊວງການຕ່າງປະເທດຈີນ ໄດ້ມີບົດບາດສຳຄັນໃນການຫຼຸດຜ່ອນຄວາມທຸກຍາກຂອງເມືອງມາລິໂປ ໂດຍໄດ້ປຸກລະດົມທຸກພາກສ່ວນທົ່ວສັງຄົມລະດົມທຶນຮອນປະມານ 236 ລ້ານຢວນຜ່ານຮູບແບບຕ່າງໆ, ຈັດຕັ້ງປະຕິບັດໂຄງການຊ່ວຍເຫຼືອຈາກຕ່າງປະເທດຈຳນວນ 727 ໂຄງການ, ໃນນັ້ນລວມທັງການຊ່ວຍເຫຼືອດ້ານອາຫານ ແລະ ເຄື່ອງນຸ່ງ, ການສຶກສາ, ການແພດ, ການຝຶກອົບຮົມ, ແລະ ການຊ່ວຍເຫຼືອທາງດ້ານອຸດສາຫະກຳ ອັນເປັນການຊ່ວຍປັບປຸງສະພາບການດຳລົງຊີວິດ, ການສຶກສາ, ແລະ ສະພາບເງື່ອນໄຂດ້ານການແພດ ແລະ ສາທາລະນະສຸກຂອງປະຊາຊົນຜູ້ດ້ອຍໂອກາດ，ສ້າງຄວາມເຂັ້ມແຂງໃຫ້ແກ່ພື້ນຖານທາງດ້ານອຸດສາຫະກຳກະສິກຳ, ການສຶກສາ ແລະ ການບໍລິການດ້ານສາທາລະນະສຸກຂອງທ້ອງຖິ່ນຢ່າງຕໍ່ເນື່ອງ，ເສີມຂະຫຍາຍຢ່າງຮອບດ້ານຜົນສຳເລັດຂອງການຫຼຸດຜ່ອນຄວາມທຸກຍາກກໍຄືການພັດທະນາຊົນນະບົດ.
ຍ້ອນການຊ່ວຍເຫຼືອຢ່າງຈິງຈັງຈາກຫຼາຍພາກສ່ວນໂດຍມີກະຊວງການຕ່າງປະເທດຈີນເປັນຜູ້ນຳໜ້າພາທາງ, ເມືອງມາລິໂປສາມາດຫຼຸດພົ້ນອອກຈາກຄວາມທຸກຍາກຕາມຄາດໝາຍໃນປີ 2019. ເມືອງ ມາລິໂປ ພ້ອມກັບນະຄອນຄຸນໝິງ ແລະ ທົ່ວປະເທດຈີນ ສາມາດຍາດໄດ້ຜົນສຳເລັດໃນການສ້າງສັງຄົມອີ່ມໜຳສຳລານລະດັບກາງໃນທຸກດ້ານ ແລະ ໄດ້ຮ່ວມກັນຂຽນປະຫວັດສາດໜ້າໃໝ່ຂອງການພັດທະນາຊົນນະບົດ.