ຕອນເຊົ້າມື້ນີ້ ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ 8 ດຳເນີນພາຍໃຕ້ການເປັນປະທານຂອງ ທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ ສະມາຊິກສະພາແຫ່ງຊາດ ໄດ້ຮັບການຟັງ ແລະ ປະກອບຄຳເຫັນໃສ່ຮ່າງກົດໝາຍວ່າດ້ວຍຊັ້ນນັກການທູດ ເຊີ່ງສະເໜີຜ່ານກອງປະຊຸມໂດຍ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ເຊີ່ງບາງຕອນທ່ານກ່າວເຖິງເຫດຜົນ ແລະ ຄວາມຈຳເປັນຕ້ອງການສ້າງກົດໝາຍວ່າດ້ວຍຊັ້ນນັກການທູດວ່າ ເປັນການກຳນົດຫຼັກການ-ລະບຽບການກ່ຽວກັບການຄຸ້ມຄອງ, ຕິດຕາມກວດກາ ການປະຕິບັດໜ້າທີ່ຂອງນັກການທູດ ໃຫ້ມີປະສິດທິພາບ ແລະ ປະສິດທິຜົນ.

ທ່ານ ນາງ ທະວີໄສ ພະສະຖານ ສະມາຊິກສະພາແຫ່ງຊາດ ເຂດເລືອກຕັ້ງທີ 15 ແຂວງຈຳປາສັກ ມີຄຳເຫັນຕໍ່ກອງປະຊຸມວ່າ ໃນກົດໝາຍສະບັບນີ້ ຢາກໃຫ້ຄະນະກຳມະການຮ່າງກົດໝາຍລະບຸອາຍຸການ ຂອງນັກການທູດຄັກແນ່ ເພື່ອເປັນບ່ອນອີງໃນການປະຕິບັດວຽກງານຂອງນັກການທູດ.

ທ່ານ ເອກສະຫວ່າງ ວົງວິຈິດ ສະມາຊິກສະພາແຫ່ງຊາດເຂດເລືອກຕັ້ງທີ 13 ແຂວງສະຫວັນນະເຂດ ມີຄຳເຫັນວ່າ ການແຕ່ງຕັ້ງນັກການທູດໄປປະຈຳຢູ່ຕ່າງປະເທດຄວນຜ່ານສະພາແຫ່ງຊາດກ່ອນຈື່ງເໝາະສົມ.

ຮ່າງກົດໝາຍວ່າດ້ວຍຊັ້ນນັກການທູດເປັນຮ່າງກົດໝາຍທີ່ສ້າງຂື້ນໃໝ່ປະກອບມີ 9 ພາກ, 10 ໝວດ, 53 ມາດຕາ.

Loading...