ນັບແຕ່ປີ 2022 ເປັນຕົ້ນມາເມືອງຫຼ້າ ແຂວງຢຸນນານ ສປປ ຈີນ ກັບ ປະເທດລາວໄດ້ຮ່ວມກັນຈັດງານແລກປ່ຽນວັດທະນະ ທໍາ ລະຫວ່າງປະຊາຊົນຢູ່ຕາມຊາຍແດນ ລາວ-ຈີນ ເຊິ່ງໄດ້ຮັບຄວາມສົນໃຈຈາກປະຊາຊົນ ເປັນຢ່າງດີ ເຊິ່ງມີຜູ້ເຂົ້າຮ່ວມຫຼາຍ ກວ່າ 200.000ຄົນ ແລະ ກາຍເປັນເວທີຂອງການແລກປ່ຽນຊື້ຂາຍ ທັງເປັນການສົ່ງເສີມມິດຕະພາບ ການຮ່ວມມື ແລະການພັດທະນາລະຫວ່າງປະເທດໂດຍສະເພາະງານແລກປ່ຽນວັດທະ ນະທໍາ ລະຫວ່າງປະຊາຊົນຢູ່ຕາມຊາຍແດນ ລາວ-ຈີນ.
ໂອກາດເຂົ້າຮ່ວມ ງານແລກປ່ຽນວັດທະນະທຳ ລະຫວ່າງປະ ຊາຊົນຢູ່ຕາມຊາຍແດນ ລາວ-ຈີນ ປະຈຳປີ 2024 ໃນລະຫວ່າງວັນທີ 20-23 ມິຖຸນາ 2024ນີ້ ທີ່ເມືອງຫລ້າ ກິ່ງແຂວງສິບສອງພັນນາ ແຂວງຢຸນນານ ສປ ຈີນ ຄະນະສື່ມວນຊົນລາວ ໄດ້ຖືໂອ ກາດເດີນທາງໄປຢ້ຽມຊົມ ຕະຫລາດນັດແລກປ່ຽນສິນຄ້າ ຂອງປະຊາຊົນລາວ-ຈີນ ທີ່ດ່ານເມືອງມານ ກິ່ງແຂວງສິບສອງພັນນາ ເຊິ່ງເປັນຈຸດດຶງດູດນັກທ່ອງທ່ຽວແຫ່ງໜຶ່ງທີ່ລືຊື່ ເປັນຕະຫລາດນັດແຫ່ງມິດຕະພາບລະຫວ່າງປະຊາຊົນສອງຊາດລາວ-ຈີນ.
ຕະຫລາດແຫ່ງນີ້ ທັງຜູ້ຊື້ ແລະ ຜູ້ຂາຍ ລວມທັງນັກທ່ອງ ທ່ຽວ ສ່ວນຫລາຍແມ່ນຄົນລາວ, ຄົນຈີນ, ຄົນຈີນເຊື້ອສາຍລາວ ແລະ ຄົນລາວເຊື້ອສາຍຈີນ ໂດຍສະເພາະແມ່ນຊົນເຜົ່າໄຕລື້ ທີ່ມີສຳນຽງສຽງປາກເວົ້າແບບລາວ. ຈຸດເດັ່ນຂອງຕະຫລາດແຫ່ງນີ້ ສ່ວນຫລາຍແມ່ນຂາຍອາຫານສຸກທ້ອງຖິ່ນ ໂດຍສະເພາະ ປີ້ງໄກ່, ປີ້ງປາ ແລະ ແຈ່ວ, ອີກໜຶ່ງຈຸດເດັ່ນແມ່ນການນັ່ງກິນອາຫານຢູ່ກ້ອງຕາລ່າງເຮືອນທີ່ຕິດກັບຮ້ານ ດ້ວຍບັນຍາກາດທີ່ເປັນກັນເອງ ສ້າງຄວາມປະທັບໃຈໃຫ້ລູກຄ້າ ແລະ ນັກທ່ອງທ່ຽວ, ຕະຫລາດແຫ່ງນີ້ ມີປະມານ 450-500 ຮ້ານ ໂດຍເປີດ ທຸກວັນສຸກ, ພາຍ ໃນງານຕະຫລາດ ນອກຈາກການຊື້ຂາຍສິນຄ້າແລ້ວ ຍັງມີກິດຈະກໍາການສະແດງສິລະປະພື້ນເມືອງປະຈຳທ້ອງຖິ່ນ ທັງລາວ ແລະ ຈີນ ບາງຄັ້ງກໍເຊີນເອົາສິລະປິນທີ່ມີຊື່ສຽງມາສ້າງສີສັນໃຫ້ງານ, ທີ່ຕັ້ງຂອງຕະຫລາດນັດແຫ່ງນີ້ຍັງໄດ້ຮັບສົມຍານາມເປັນບ້ານວັດທະນະທຳ ຍ້ອນປະຊາຊົນຮັກສາໄດ້ມູນເຊື້ອປະເພນີອັນດີງາມ ທີ່ເປັນມໍລະດົກຂອງຊາດ.
ນາງ ກຽງໄຂ ແມ່ຄ້າຊາວຈີນ ເຜົ່າໄຕລື້ ທີ່ໄດ້ຮັບລາງວັນຄອບຄົວຕົວແບບ ຄູ່ຮ່ວມມືມິດຕະພາບ ລະຫວ່າງ ປະຊາຊົນເຂດຊາຍແດນລາວ-ຈີນ ຈາກຫ້ອງການສະຫະພັນແມ່ຍິງເມືອງສິງ ແຂວງຫລວງນໍ້າທາ ແລະ ສະຫະພັນແມ່ຍິງເມືອງຫລ້າ ກິ່ງແຂວງສິບສອງພັນນາ ແຂວງຢຸນນານ ເຊິ່ງຜູ້ທີ່ໄດ້ຮັບລາງວັນນີ້ ແມ່ນເປັນຄອບຄົວທີ່ມີສາຍສຳພັນຮັກແພງກັບຄອບຄົວຍາດຕິພີ່ນ້ອງ ທີ່ໄປ-ມາຫາສູ່ຢ້ຽມຢາມກັນເປັນປະຈໍາ, ປະຕິບັດໄດ້ລະບຽບກົດໝາຍທີ່ຖືກຕ້ອງປອງດອງ ແລະ ເພີ່ມພູນຄູນສ້າງຄວາມຮັກແພງຢ່າງໝັ້ນຄົງ. ທ່ານ ນາງ ກຽງໄຂ ກ່າວວ່າ: ດີໃຈຫລາຍທີ່ໄດ້ຮັບລາງວັນນີ້ ແລະ ຈະຮັກສາມູນເຊື້ອໃຫ້ຍຶນຍົງຊົ່ວລູກຊົ່ວຫລານຕະຫລອດໄປ ປະຊາຊົນສ່ວນຫລາຍໃນເຂດນີ້ແມ່ນມີເຊື້ອສາຍລາວ ຈາກລຸ້ນປູ່ຍ່າສືບທອດກັນມາຫລາຍສິບປີ ທ່ານ ນາງ ກຽງໄຂ ໃຫ້ຮູ້ອີກວ່າ: ນອກຈາກປະກອບອາຊີບຄ້າຂາຍແລ້ວ ຍັງໄດ້ຮັດສວນ ແລະເອົາຜົນຜະລິດລົງມາຂາຍຢູ່ຕະຫລາດນັດ, ເຫັນວ່າມີຜົນຕອບຮັບທີ່ດີຈາກລູກຄ້າ ສ່ວນ ປະຊາຊົນເຜົ່າໄຕລື້ທ່ານອື່ນໆ ໂດຍສະເພາະຜູ້ອາຍຸສູງ ທີ່ເປັນແບບຢ່າງໃຫ້ລູກຫລານ ໃນການຮັກສາວັດທະນະທຳ, ປະເພນີ, ວິຖີຊີວິດທີ່ເປັນເອກະລັກ ຕ່າງກໍສະແດງຄວາມດີໃຈທີ່ໄດ້ອາໄສຢູ່ທີ່ນີ້ ມີຄວາມສະຫງົບສຸກ ຍຸທາງທຳມາຫາກິນ ແລະ ຝາກເຖິງລູກຫລານຊາວລາວ ແລະ ແຂກນັກທ່ອງທ່ຽວ ເມື່ອໄດ້ມາສິບສອງພັນນາ ຢ່າລືມມາແອ່ວມາຢາມແດ່ເນີ!!
ໃນຕະຫລາດນັດແລກປ່ຽນສິນຄ້າ ‘’ສ່ຽວສາກົນ’’ຂອງປະຊາຊົນລາວ-ຈີນ ແຫ່ງນີ້ ຍັງມີແມ່ຄ້າຊາວລາວຈຳນວນໜຶ່ງ ໄດ້ເອົາຜົນຜະລິດຈາກລາວມາວາງຈຳໜ່າຍ ເປັນຕົ້ນ ຜົນຜະລິດດ້ານກະສິກໍາ, ສິນຄ້າຫັດຖະກຳ ແລະ ອາຫານລາວ ເຫັນວ່າຂາຍໄດ້ດີສົມຄວນ.
