ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຕາດກວາງຊີ ເລີ່ມກັບມາມີບັນຍາກາດຄືກຄື້ນດ້ວຍນັກທ່ອງທ່ຽວອີກຄັ້ງ

ການທ່ອງທ່ຽວຢູ່ຕາດກວາງຊີ ເລີ່ມກັບມາຄຶກຄື້ນດ້ວຍນັກທ່ອງທ່ຽວອີກຄັ້ງ ຫລັງຈາກລັດຖະບານໄດ້ມີມາດຕະການຜ່ອນຜັນໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຕ່ເກືອບຮ້ອຍສ່ວນ ຮ້ອຍແມ່ນນັກທ່ອງທ່ຽວພາຍໃນປະເທດ. ຂະນະທີ່ຜູ້ຮັບຜິດຊອບສະຖານທີ່ທ່ອງທ່ຽວແຫ່ງນີ້ ໄດ້ເຊີນຊວນໃຫ້ຄົນລາວຫັນມາທ່ອງທ່ຽວລາວໃຫ້ຫລາຍຂຶ້ນກ່ວາເກົ່າ.

ທ່ານ ບຸນມີ ອຸ່ນນາທີ, ພະນັກງານຮັບຜິດຊອບຕາດກວາງຊີ ໃຫ້ຮູ້ວ່າ: ກ່ອນໜ້າເກີດການລະບາດຂອງພະຍາດ ໂຄວິດ-19 ຕາດກວາງຊີ ສາມາດສ້າງລາຍຮັບຈາກການບໍລິການຕ່າງຯ ໄດ້ບໍ່ຫລຸດ 10 ລ້ານກີບຕໍ່ວັນ, ໃນນີ້ ຖ້າແມ່ນວັນ ຫລື ໂອກາດສໍາຄັນຕ່າງຯ ສາມາດສ້າງລາຍຮັບໄດ້ບໍ່ຕໍ່າກວ່າ 15 ລ້ານກີບຕໍ່ວັນ ຍ້ອນມີນັກທ່ອງທ່ຽວຕ່າງປະເທດເຂົ້າມາທ່ອງທ່ຽວເປັນຈໍານວນຫລາຍ, ໃນນັ້ນ ຫລາຍກ່ວາໝູ່ແມ່ນນັກທ່ອງທ່ຽວຈີນ. ຕໍ່ມາຍ້ອນການລະບາດຂອງພະຍາດໂຄວິດ-19 ຕາດກວາງຊີ ໄດ້ປິດບໍລິການໄລຍະໜຶ່ງຕາມຄໍາສັ່ງຂອງລັດຖະບານເພື່ອປ້ອງກັນການລະບາດຂອງພະຍາດດັ່ງກ່າວ. ແຕ່ຫລັງຈາກທີ່ລັດຖະບານມີມາດຕະການຜ່ອນຜັນໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ເຫັນວ່ານັກທ່ອງ ທ່ຽວເລີ່ມເຂົ້າມາທ່ອງທ່ຽວຕາດກວາງຊີນັບມື້ເພີ່ມຂຶ້ນ ແຕ່ສ່ວນໃຫຍ່ແມ່ນນັກທ່ອງທ່ຽວພາຍໃນປະເທດ, ສ່ວນນັກທ່ອງທ່ຽວຕ່າງປະເທດມີຫນ້ອຍ ເພາະເປັນພຽງນັກທ່ອງ ທ່ຽວຕ່າງປະເທດທີ່ເປັນວິຊາການ ຫລື ຊ່ຽວຊານທີ່ມາເຮັດວຽກຢູ່ລາວເທົ່ານັ້ນ ເຊີ່ງສະເລ່ຍແລ້ວມື້ຫນຶ່ງສາມາດສ້າງລາຍຮັບໄດ້ຫລາຍກວ່າ 1 ລ້ານກີບ, ລາຍຮັບນີ້ເຖີງວ່າບໍ່ຫລາຍເມື່ອທຽບໃສ່ທີ່ເຄີຍໄດ້ຮັບໃນໄລຍະກ່ອນໜ້າມີ ການລະບາດຂອງພະຍາດໂຄວິດ-19 ແຕ່ຖືເປັນສັນຍານທີ່ດີຂຶ້ນ ເພາະນັກທ່ອງທ່ຽວພາຍໃນປະເທດທີ່ເຂົ້າມາທ່ຽວຊົມຕາດກວາງຊີ ມີທ່າອ່ຽງເພີ່ມຂຶ້ນໂດຍສະເພາະໃນໄລຍະທ້າຍອາທິດ.

ທ່ານ ບຸນມີ ອຸ່ນນາທີ ຍັງໄດ້ເຊີນຊວນນັກທ່ອງທ່ຽວພາຍໃນປະເທດເຂົ້າມາທ່ອງ ທ່ຽວຕາດກວາງຊີ ກໍຄື ສະ ຖານທີ່ທ່ອງທ່ຽວແຫ່ງອື່ນຯ ພາຍໃນແຂວງຫລວງພະບາງ ໃຫ້ຫລາຍຂຶ້ນກ່ວາເກົ່າ ເພາະເປັນແຂວງທີ່ມີສະຖານ ທີ່ທ່ອງທ່ຽວທາງທໍາມະຊາດ, ວັດທະນະທໍາ ແລະ ປະຫວັດ ສາດຫລາຍແຫ່ງທີ່ໜ້າສົນໃຈ, ໃນນີ້ ສະເພາະຕາດກວາງຊີ ໄດ້ຖືໂອກາດທີ່ປິດໃຫ້ບໍລິການຊົ່ວຄາວໃນໄລຍະເກີດການລະບາດຂອງພະຍາດໂຄວິດ-19 ປັບປຸງຫລາຍຢ່າງໃຫ້ດີຂຶ້ນ ແລະ ມີຄວາມສວຍງາມກ່ວາເກົ່າ.

ຕາດກວາງຊີ ຢູ່ຫ່າງຈາກເທດສະບານນະຄອນຫລວງພະບາງ ໄປທາງທິດຕະເວັນຕົກສ່ຽງໃຕ້ປະມານ 30 ກິໂລ ແມັດ, ຕາດແຫ່ງນີ້ເປັນນ້ຳຕົກຫີນປູນຂະໜາດໃຫຍ່ ທີ່ສູງປະມານ 81 ແມັດ, ກ້ວາງສຸດ 35 ແມັດ, ປະກອບດ້ວຍ 6 ຊັ້ນ, ມີສາຍນ້ຳໄຫລອາບມາຕາມໜ້າຜາຜ່ານຫີນນ້ອຍໃຫຍ່ ຮູບຊົງແປກຕາລົງສູ່ແອ່ງນ້ຳເບື້ອງລຸ່ມຕະຫລອດປີ. ສໍາລັບຄ່າເຂົ້າຊົມຄົນລາວ 10.000 ກີບ ແລະ ຕ່າງປະເທດ 20.000 ກີບ, ສ່ວນເດັກນ້ອຍອາຍຸຕໍ່າກ່ວາ 8 ປີ ບໍ່ໄດ້ເສຍຄ່າເຂົ້າຊົມ.

ໂດຍ: ບຸນຕຽງ ຈັນທະວົງ