ຕຳຫຼວດຈະລາຈອນ ແຂວງສະຫວັນນະເຂດ ພ້ອມອໍານວຍຄວາມສະດວກການສັນຈອນໃນໄລຍະບຸນປີໃໝ່ລາວ

ຕາມການໃຫ້ສຳພາດຂອງທ່ານ ພັທ ໄຊຊະນະ ໄຊປັນຍາ ຫົວໜ້າພະແນກຕຳຫຼວດຈະລາຈອນແຂວງ ໃຫ້ສຳພາດຕໍ່ນັກຂ່າວວິທະກະຈາຍສຽງແຂວງສະຫວັນນະເຂດ ໃນຄັ້ງວັນທີ 11 ເມສາ 2024 ນີ້ວ່າ: ທາງພະແນກຕຳຫຼວກຈະລາຈອນແຂວງຈຶ່ງໄດ້ອອກໜັງສືແຈ້ງການເຖິງ ກອງບັນຊາການ ປກສ 14 ຕົວ ເມືອງ ແລະ ນະຄອນໄກສອນ ໃຫ້ສ້າງແຜນ ປ້ອງກັນບຸນປີໃໝ່ລາວ ເລີ່ມແຕ່ວັນທີ 11 ຫາ 17 ເມສາ 2024 ຈັດຕັ້ງການ ເຄື່ອນໄຫວໂຄສະນາ ເຜີຍແຜ່ກົດລະບຽບຈະລາຈອນທາງບົກໃຫ້ແກ່ຜູ້ໃຊ້ລົດໃຊ້ຖະໜົນ ຕາມສຳນັກງານຫ້ອງການ, ສະຖາບັນການສຶກສາ ແລະ ໂຮງຮຽນ ມຕົ້ນ, ມປາຍ ໂດຍ ສົມທົບກັບ ຍທຂ ແຂວງ ແລະ ຊຸກຍູ້ໃຫ້ບັນດາເມືອງໄດ້ເຄື່ອນໄຫວກ່ອນຈະຮອດປີໃໝ່ລາວ. ໄດ້ເປີດກອງປະຊຸມສະຫຼຸບວຽກງານ ປີ 2023 ແລະ ຖອດຖອນບົດຮຽນວຽກງານ ປ້ອງກັນປີໃໝ່ລາວທີ່ຜ່ານມາ ໂດຍເຊີນເອົາກອງຈະລາຈອນ 14 ຕົວເມືອງ ແລະ ນະຄອນ ເຂົ້າຮ່ວມ ເພື່ອ ເຮັດໃຫ້ສະພາບການສັນຈອນໃນຊ່ວງປີໃໝ່ລາວປີນີ້ ມີຄວາມສະດວກປອດໄພຫຼຸດຜ່ອນການ ເກີດອຸປະຕິເຫດລົງກວ່າປີຜ່ານມາ ພ້ອມທັງຄາດກະສະພາບການທີ່ອາດຈະເກີດຂຶ້ນຕິດພັນກັບຄວາມປອດໄພທາງຖະໜົນ ເຮັດໃຫ້ກຳລັງຕຳຫຼວດຈະລາຈອນແຕ່ລະສະຫາຍ ມີຄວາມ ເອົາໃຈໃສ່ຕໍ່ວຽກງານວິຊາສະເພາະໃນຊ່ວງປີໃໝ່ລາວໃຫ້ຫຼາຍຂຶ້ນກວ່າເກົ່າ ດ້ານວຽກງານປະຈຳການ ໄດ້ຈັດຕັ້ງກໍາລັງເຂົ້າປະຈຳການລໍຄອຍເຫດການ ຕະຫຼອດ 24 ຊົ່ວໂມງ ຢູ່ພາຍໃນຫ້ອງການ ຮັບແຈ້ງຄວາມ, ສະພາບອຸປະຕິເຫດ ເພື່ອແກ້ໄຂໃຫ້ທ່ວງທັນກັບສະພາບທີ່ອາດຈະເກີດຂຶ້ນ.

ໃນໄລຍະບຸນປີໃໝ່ທີ່ຜ່ານມາມີຄະດີອຸປະຕິເຫດເກີດຂຶ້ນ 25 ລາຍ ທຽບໃສ່ປີ 2022 ເພີ່ມຂຶ້ນ 3 ລາຍເທົ່າກັບ 13,63%, ເສຍຊີວິດ 06 ຄົນ ຖ້າທຽບໃສ່ ປີ 2022 ເພີ່ມຂຶ້ນ 03 ຄົນ ເທົ່າກັບ 50%. ສໍາລັບມາດຕະການ ແລະ ລະບຽບການຄວບຄຸມປ້ອງກັນການເກີດອຸປະຕິເຫດ ທາງພະແນກຕໍາ ຫຼວດຈະລາຈອນ ກໍ່ໄດ້ຖືເອົາວຽກງານໂຄສະນາເປັນຫຼັກ ຄວບຄູ່ກັບການເຮັດວຽກ ງານ ກວດກາບັງຄັບໃຊ້ກົດໝາຍໄປພ້ອມໆກັນ ເພື່ອໃຫ້ຜູ້ຂັບຂີ່ມີສະຕິ ແລະ ຄວາມລະມັດລະວັງໃນ ການໃຊ້ລົດໃຊ້ຖະໜົນຢ່າງມີຄວາມປອດໄພ ເຊິ່ງໃນປີນີ້ ໄດ້ອອກຕັ້ງຈຸດກວດກາ ຢູ່ 3 ຈຸດ ໃນ 2 ເສັ້ນທາງ ຄື: ເສັ້ນທາງເລກທີ 9 ມີຈຸດ ເມືອງອຸທຸມພອນ, ອາດສະພັງທອງ ແລະ ພະ ລານໄຊ, ຈຸດທີ 2 ມີ ເມືອງ ພີນ ແລະ ເມືອງ ເຊໂປນ, ເສັ້ນທາງເລກທີ 13 ໃຕ້ ແມ່ນເຄື່ອນໄຫວ ແຕ່ ເມືອງ ສອງຄອນ ເຖິງ ເມືອງໄຊບູລີ ເຊິ່ງໄດ້ເລີ່ມຈັດຕັ້ງປະຕິບັດແຕ່ ວັນທີ 8 ຫາ 21 ເມສາ 2024 ເພື່ອເຕືອນສະຕິຂອງຜູ້ໃຊ້ລົດໃຊ້ຖະໜົນ ໃຫ້ມີຄວາມເຂັ້ມງວດໃນການຈັດຕັ້ງ ປະຕິບັດກົດລະບຽບຈະລາຈອນທາງບົກ, ລະບຽບການຂົນສົ່ງທາງບົກ ແລະ ນິຕິກຳອື່ນໆທີ່ພົວພັນກັບຄວາມປອດໄພທາງຖະໜົນ ກໍ່ຄືການສະເຫຼີມສະຫຼອງສົ່ງທ່າຍປີເກົ່າ-ຕ້ອນຮັບປີໃໝ່ລາວ ພສ 2567 ຢ່າງມີຄວາມເບີກບານມ່ວນຊື່ນຕະຫຼອດປອດໄພ.

ທ່ານ ພັທ ໄຊຊະນະ ໄຊປັນຍາ ຫົວໜ້າພະແນກຕຳຫຼວດຈະລາຈອນແຂວງ ຍັງໄດ້ຮຽກຮ້ອງ ມາຍັງພໍ່ແມ່ປະຊາຊົນ, ຜູ້ໃຊ້ລົດໃຊ້ຖະໜົນທຸກທົ່ວໜ້າ ຈົ່ງມີສະຕິ, ມີຄວາມລະມັດລະວັງໃນການໃຊ້ລົດໃຊ້ຖະໜົນ ເຄົາລົບ ແລະ ປະຕິບັດລະບຽບກົດໝາຍຢ່າງເຂັ້ມງວດ ໂດຍສະເພາະແມ່ນກົດລະບຽບການ ສັນຈອນທາງບົກ ແລະ ຂໍ້ຫ້າມຕ່າງໆ ໃນຊ່ວງການສະເຫຼີມສະຫຼອງບຸນປີໃໝ່ລາວ, ເພື່ອລີກລ່ຽງບັນຫາການເກີດອຸປະຕິເຫດ ທີ່ຈະສ້າງຄວາມ ເສຍຫາຍທາງດ້ານຊີວິດ, ຊັບສິນ ຂອງບຸກຄົນ ແລະ ລວມໝູ່.