ວັນທີ 15 ສິງຫາ 2024ນີ້ ທ່ານ ນາງ ປິ່ງຄຳ ລາຊະສິມມາ ປະທານກຳມາທິການ ເສດຖະກິດ-ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍທີມງານທີ່ມາຈາກກະຊວງກ່ຽວຂ້ອງ, ຈາກແຂວງ ເຊິ່ງ ນຳໂດຍ ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ ສະມາຊິກສະພາແຫ່ງຊາດ ປະຈຳເຂດເລກຕັ້ງທີ 13 ໄດ້ລົງຕິດຕາມກວດກາຜົນກະທົບຈາກການສ້າງເຂື່ອນໄຟຟ້າເຊລະນອງ 1 ຢູ່ທີ່ກຸ່ມບ້ານແກ້ງລີ້ນ ເມືອງ ນອງ ແຂວງສະຫວັນນະເຂດ.
ທ່ານ ບົວລົມ ອິນທີທະວົງ ຮອງເຈົ້າເມືອງໆນອງ ຜູ້ຊີ້ນຳວຽກງານເສດຖະກິດຂອງເມືອງ ໄດ້ລາຍງານວ່າ: ໂຄງການດັ່ງກ່າວຕັ້ງຢູ່ລະຫວ່າງຊາຍແດນ 2 ເມືອງຄື: ເມືອງ ນອງ ແລະ ເມືອງ ພີນ, ມີກຳລັງການຕິດຕັ້ງ 70 ເມກາວັດ, ມີ 2 ບ້ານທີ່ຖືກຍົກຍ້າຍອອກຈາກໜ້າອ່າງຄື: ບ້ານປະຈະຕຽນ(ຄຸ້ມລ໋ອຍນ້ຳ) ແລະ ບ້ານ ລະເບົານ້ຳ ໂດຍມີຜູ້ໄດ້ຮັບຜົນກະທົບທັງໝົດ ຈຳນວນ 487 ຄົນ, ຍິງ249 ຄົນ, ມີ 74 ຫຼັງຄາເຮືອນ, 83 ຄອບຄົວ, ໃນໄລຍະເວລາ 3 ປີ ທາງບໍລິສັດແມ່ນໄດ້ຊົດເຊີຍທາດຊີ້ນ, ທາດປາໃຫ້ພໍ່ແມ່ປະຊາຊົນ, ສ່ວນຜົນກະທົບໄລຍະ 2 ທາງຄະນະກຳມະການນໍາຂັ້ນເມືອງ ສົມທົບກັບພາກສ່ວນກ່ຽວຂ້ອງຂັ້ນແຂວງ ໄດ້ເກັບກຳຂໍ້ມູນຜົນກະທົບທັງໝົດມີ 4 ບ້ານຄື: ບ້ານ ແກ້ງລີ້ນມີ 53 ຄອບຄົວ, ບ້ານ ໄກສອນ ມີ 23 ຄອບຄົວ, ບ້ານ ທ່າເທ 22 ຄອບຄົວ, ບ້ານ ຜູ້ໄທ 44 ຄອບຄົວ, ມີປ່າຊ້າ ຫຼື ປ່າມະເຫສັກບ້ານ 2 ແຫ່ງ, ເສັ້ນທາງຄົມມະນາຄົມ 7ຈຸດ. ຈາກນັ້ນ ອຳນາດການປົກຄອງພໍ່ແມ່ປະຊາຊົນກໍ່ໄດ້ນຳສະເໜີເຖິງຂໍ້ສະດວກ, ຂໍ້ຫຍຸ້ງຍາກ ແລະ ຂໍ້ຄົງຄ້າງ, ແຕ່ສ່ວນໃຫຍ່ທີ່ປະຊາຊົນໄດ້ນຳສະເໜີແມ່ນບັນຫານ້ຳກິນ, ນ້ຳໃຊ້ທີ່ຍັງຂາດເຂີນ ໃນລະດູແລ້ງ, ທີ່ເຫັນວ່າຍັງເປັນບັນຫາສຳຄັນໃນຂະນະນີ້, ໂອກາດນີ້ ທາງຄະນະປະທານກໍ່ໄດ້ຮັບເອົາຄຳສະເໜີດັ່ງກ່າວເພື່ອນຳສະເໜີ ຕໍ່ຂັ້ນເທິງເພື່ອຮັບຊາບ ແລະ ຈະໃຫ້ໄດ້ຮັບການແກ້ໄຂໂດຍໄວ.
ຄະນະດັ່ງກ່າວ ຍັງໄດ້ເດີນທາງໄປເບິ່ງຂົວເຊສະມວນ ບ້ານ ແກ້ງລີ້ນ ທີ່ຖືກຜົນກະທົບຈາກການຕັນນ້ຳເຂື່ອນເຮັດໃຫ້ທຸກໆປີຂອງລະດູຝົນ ແມ່ນຖືກນ້ຳຖ້ວມ ປະຊາຊົນຕ້ອງໄດ້ໃຊ້ເຮືອນ້ອຍ ແລະ ເຮືອບັກຂ້າມໄປມາ ລະຫວ່າງ ບ້ານແກ້ງລີ້ນ ແລະ 2 ບ້ານທີ່ຖືກຜົນກະທົບ.
