ກອງປະຊຸມສະຫຼຸບຕີລາຄາການຈັດຕັ້ງປະຕິບັດ ວຽກງານຂອງກອງຄຸ້ມຄອງປ່າສະຫງວນແຫ່ງຊາດ ນໍ້າປຸຍ ແຂວງ ໄຊຍະບູລີ ໄດ້ຈັດຂຶ້ນໃນວັນທີ 6 ມິຖຸນານີ້, ທີ່ພະແນກກະສິກໍາ ແລະ ປ່າໄມ້ ແຂວງ ໄຊຍະບູລີ ໂດຍການເຂົ້າຮ່ວມເປັນປະທານຂອງທ່ານ ພົງແກ້ວ ບຸນຍາວົງ ຫົວໜ້າພະແນກກະສິກໍາ ແລະ ປ່າໄມ້ ແຂວງ ໄຊຍະບູລີ, ມີຫົວໜ້າພະແນກປ່າສະຫງວນ ກົມປ່າໄມ້ ພ້ອມທີມງານ, ມີຮອງຫົວໜ້າກົມກວດກາປ່າໄມ້ ພ້ອມດ້ວຍຄະນະ, ບັນດາຫົວໜ້າ, ຮອງຫົວໜ້າພະແນກການອ້ອມຂ້າງແຂວງ, ເຈົ້າເມືອງ, ຮອງເຈົ້າເມືອງ, ຫົວໜ້າ, ຮອງຫົວໜ້າຫ້ອງການກະສິກໍາ ແລະ ປ່າໄມ້ ເມືອງ 3 ເມືອງຄື: ເມືອງພຽງ, ເມືອງປາກລາຍ ແລະ ເມືອງທົ່ງມີໄຊ ພ້ອມດ້ວຍນາຍບ້ານອ້ອມຂ້າງປ່າສະຫງວນເຂົ້າຮ່ວມ.
ໃນພິທີ ທ່ານ ພົງແກ້ວ ບຸນຍາວົງ ໄດ້ກ່າວວ່າ: ກອງປະຊຸມຄັ້ງນີ້ພວກເຮົາຈະໄດ້ຮັບຟັງການລາຍງານສະຫຼຸບວຽກງານ ການຄຸ້ມຄອງປ່າສະຫງວນແຫ່ງຊາດ ນໍ້າປຸຍ ປະຈໍາສົກປີ 2023-2024 ແລະ ແຜນວຽກງານ 6 ເດືອນ ທ້າຍ ປີ 2024 ການເຜີຍແຜ່ດຳລັດປ່າສະຫງວນ ສະບັບເລກທີ 219/ລບ, ລົງວັນທີ 20 ມິຖຸນາ 2023 ແລະ ປຶກສາຫາລືເພື່ອຄວາມເອກະພາບຮ່ວມກັນ ໃນການຈັດຕັ້ງປະຕິບັດກິດຈະກຳ ກ່ຽວກັບເຂດຄຸ້ມຄອງໃນປ່າສະຫງວນແຫ່ງຊາດ ນໍ້າປຸຍ, ເພື່ອເຮັດໃຫ້ການຈັດຕັ້ງປະຕິບັດວຽກງານຄຸ້ມຄອງປ່າສະຫງວນແຫ່ງຊາດ ນໍ້າປຸຍ ມີປະສິດທິພາບສູງ ແລະ ທຽບເທົ່າກັບສາກົນ ພ້ອມນັ້ນກໍອາດຈະເປັນການສ້າງເງື່ອນໄຂໃຫ້ກ້າວ ເປັນມໍລະດົກທາງທຳມະຊາດຂອງ ອາຊຽນ ໃນຕໍ່ໜ້າອັນໄວໆນີ້. ຈາກນັ້ນ ທ່ານ ສຸພາບ ແດນພູເຂົາ ຮອງຫົວໜ້າກອງຄຸ້ມຄອງປ່າສະຫງວນແຫ່ງຊາດ ນໍ້າປຸຍ ໄດ້ໃຫ້ຮູ້ວ່າ: ປ່າສະຫງວນແຫ່ງຊາດ ນ້ຳປຸຍ ໄດ້ສ້າງຕັ້ງຂຶ້ນຕາມດໍາລັດຂອງນາຍົກລັດຖະມົນຕີ ສະບັບເລກທີ 164/ນຍ, ລົງວັນທີ 29/10/1993 ວ່າດ້ວຍການອະນຸມັດສ້າງຕັ້ງປ່າສະຫງວນແຫ່ງຊາດ ທົ່ວປະເທດ ລວມມີ 18 ແຫ່ງ, ໃນນັ້ນ, ປ່າສະຫງວນແຫ່ງຊາດ ນໍ້າປຸຍ ຈັດເປັນແຫ່ງທີ 5 ຊຶ່ງມີຈຸດປະສົງ ໃນການປົກປັກຮັກສາຄວາມຫຼາກຫຼາຍຂອງຊີວະນາໆພັນ ປົກປັກຮັກສາແຫຼ່ງນ້ຳ, ສັດນ້ຳ ແລະ ສັດປ່າ ທີ່ໃກ້ຈະສູນພັນປ່າສະຫງວນແຫ່ງຊາດ ນ້ຳປຸຍ ອຸດົມສົມບູນເຕັມໄປດ້ວຍຊັບພະຍາກອນທຳມະຊາດ ທີ່ມີຄຸນຄ່າລາຄາແພງຫຼາຍຊະນິດເຊັ່ນ: ໄມ້ຄຳພີ້, ໄມ້ດູ່, ໄມ້ແຕ້ຄ່າ, ໄມ້ຍາງ, ໄມ້ຊີ ແລະ ໄມ້ອື່ນໆ ມີສັດປ່າທີ່ຫາຍາກ ແລະ ໃກ້ຈະສູນພັນຫຼາຍຊະນິດເຊັ່ນ: ຊ້າງປ່າ, ເສືອ, ໝີ, ເໝືອຍ, ທະນີ, ລີງ, ກວາງ, ຟານ,ໝູ, ນົກຍຸງ ແລະ ອື່ນໆນອກຈາກນັ້ນຍັງເປັນບ່ອນກຳເນີດແຫຼ່ງນ້ຳຫຼາຍສາຍທີ່ສຳຄັນເຊັ່ນ: ນ້ຳພູນ, ນ້ຳປຸຍ, ນ້ຳລາຍ, ນໍ້າຍາມ, ນໍ້າຫຼອບ, ນໍ້າສິງ, ນໍ້າງີມ ແລະ ນໍ້າອື່ນໆ; ມາຮອດປີ 2020 ທາງກົມປ່າໄມ້ໄດ້ຮັບຮອງເອົາແຜນຈັດສັນ ປ່າສະຫງວນແຫ່ງຊາດ ນໍ້າປຸຍ ຕາມຂໍ້ຕົກລົງ ສະບັບເລກທີ 6854/ກປມ, ລົງວັນທີ 18 ທັນວາ 2020 ປ່າສະຫງວນແຫ່ງຊາດ ນໍ້າປຸຍ ຕັ້ງຢູ່ແຂວງ ໄຊຍະບູລີ, ມີເນື້ອທີ່ທັງໝົດ 191.200 ເຮັກຕາ. ຄື: ເມືອງພຽງ, ເມືອງປາກລາຍ ແລະ ເມືອງທົ່ງມີໄຊ ລວມມີ 37 ບ້ານທີ່ນອນຢູ່ໃນ ແລະ ອ້ອມຂ້າງປ່າສະຫງວນແຫ່ງຊາດ ນໍ້າປຸຍ ໃນນັ້ນ ເມືອງພຽງມີ 14 ບ້ານ, ເມືອງ ປາກລາຍ ມີ 15 ບ້ານ ແລະ ເມືອງ ທົ່ງມີໄຊ ມີ 9 ບ້ານ, ປະກອບມີ 4 ຊົນເຜົ່າຄື: ຊົນເຜົ່າລາວ, ເຜົ່າກຶມມຸ, ເຜົ່າອີວມຽນ ແລະ ເຜົ່າມົ້ງ ໃນໄລຍະຜ່ານມາໄດ້ລົງສຳຫຼວດທະນີມືຂາວ ຢູ່ເຂດພູປອດ-ນໍ້າສິງ, ພູຜາດຳ, ຫ້ວຍປົ່ງນາ ແລະ ເຂດປ້ອມ 830 ແລະ ຂຸນນໍ້າຊອງໃນປ່າສະຫງວນແຫ່ງຊາດ ນໍ້າປຸຍ ເຂດເມືອງພຽງ ຜົນໄດ້ຮັບແມ່ນໄດ້ຍິນສຽງຮ້ອງປັດຈຸບັນປ່າສະຫງວນແຫ່ງຊາດ ນໍ້າປຸຍ ມີຊ້າງປ່າ ຢູ່ປະມານ 60-70 ໂຕ; ເຈົ້າໜ້າທີ່ກອງກວດກາປ່າໄມ້ ແລະ ອົງການກອງທຶນອານຸລັກທຳມະຊາດໂລກ ຈັດຕັ້ງໂຄສະນາເຜີຍແຜ່ ແລະ ປູກຈິດສຳນຶກ ການອານຸລັກຊ້າງປ່າ ຢູ່ໃນມະຫະກຳບຸນຊ້າງ ທີ່ ແຂວງ ໄຊຍະບູລີ. ສົມທົບກັບຫ້ອງການກະສິກຳ ແລະ ປ່າໄມ້ເມືອງພຽງ ກວດກາການຖາງໄຮ່ປ່າແກ່ເຂດບ້ານໂພນທອງ ແລະ ບ້ານນາກອງ ເມືອງພຽງ ເປີດກອງປະຊຸມສົນທະນາກັບເຈົ້າໜ້າທີ່ຕ່າງໆ ເພື່ອປະສານງານກິດຈະກຳ ແລະ ປັບປຸງການບັງຄັບໃຊ້ກົດໝາຍ 2 ຄັ້ງ ມີຜູ້ເຂົ້າຮ່ວມ 42 ທ່ານ. ລົງສົມທົບ ອໍານາດການປົກຄອງບ້ານ ແລະ ຄອບຄົວ ຜູ້ທີ່ຖືກຜົນກະທົບຈາກ ຊ້າງປ່າ ທໍາລາຍ ຜົນລະປູກ ແລະ ສິ່ງຂອງປະຊາຊົນ ບ້ານນາຄະຍາງ, ບ້ານໂພນງາມ, ບ້ານຫາດດ້າຍ, ບ້ານນາຕ້າ, ແລະ ບ້ານນາໂພ ເມືອງປາກລາຍ ແລະ ບ້ານໂພນສັກ ເມືອງພຽງ ຄາດຄະເນມູນຄ່າເສຍຫາຍ ປະມານ 70 ລ້ານກີບ ສົມທົບກັບອົງການປົກຄອງບ້ານນາຄະຍາງ, ບ້ານນາໂພ ອົງການປົກຄອງເມືອງ ປາກລາຍ, ລົງເກັບກໍາຂໍ້ມູນ ແລະ ສັນນະສູດສະຖານທີ່ເກີດເຫດການ ສັດປ່າທໍາລາຍຄົນ ຈໍານວນ 2 ຄັ້ງ ຄື ເຫດການຊ້າງປ່າທໍາຮ້າຍຄົນເສຍຊີວິດ 2 ຄັ້ງ ແລະ ເຫດການໝີປ່າທໍາຮ້າຍຮ່າງກາຍໄດ້ຮັບບາດເຈັບ 1 ຄົນ. ໄດ້ເຮັດແຈ້ງການຫາ ອຳນາດການປົກຄອງເມືອງປາກລາຍ ເມືອງທົ່ງມີໄຊ ແລະ ເມືອງພຽງ ເລື່ອງການຄຸ້ມຄອງ ແລະ ເຝົ້າລະວັງຊ້າງປ່າເຂົ້າທໍາຮ້າຍຄົນ ແລະ ທໍາລາຍຜົນລະປູກຂອງປະຊາຊົນ. ລົງໂຄສະນາເຜີຍແຜ່ ກົດໝາຍວ່າດ້ວຍປ່າໄມ້ ແລະ ກົດໝາຍວ່າດ້ວຍສັດປ່າ ຢູ່ບ້ານນາຄະຍາງ ເມືອງປາກລາຍ ພະນັກງານປ່າສະຫງວນເຂົ້າຮ່ວມຈຳນວນ 3 ທ່ານ, ມີປະຊາຊົນເຂົ້າຮ່ວມຈຳນວນ 158 ຄົນຍິງ 92 ຄົນ ໄດ້ສົມທົບກັບຫ້ອງການກະສິກຳ ແລະ ປ່າໄມ້ເມືອງ 3 ເມືອງ, ລົງຈັດປະຊຸມຮ່າງ, ເຜີຍແຜ່ກົດລະບຽບຄຸ້ມຄອງຈັດສັນປ່າສະຫງວນ ແລະ ຕິດຕັ້ງປ້າຍແຜນທີ່ ແລະ ປ້າຍໂຄສະນາ ຢູ່ໃນ 11 ບ້ານຕົວຢ່າງ ລວມທັງໝົດມີ 121 ປ້າຍ ໃນນັ້ນ ປ້າຍໃຫ່ຍ 11 ປ້າຍ ແລະ ປ້າຍນ້ອຍ 111 ປ້າຍ. ໄດ້ຮວ່ມກັບກອງກວດກາປ່າໄມ້ ແລະ ຫ້ອງການກະສິກຳ ແລະ ປ່າໄມ້ເມືອງປາກລາຍ ແກ້ໄຂຜົນຂອງການກວດກາການບຸກລຸກປ່າໄມ້ ເຂດບ້ານນາຄະຍາງໄດ້ 11 ຄອບຄົວ, ເນື້ອທີ່ 6,53 ເຮັກຕາ, ສົມທົບຫ້ອງການກະສິກຳ ແລະ ປ່າໄມ້ເມືອງ, ທະຫານຊາຍແດນ, ອໍານາດການປົກຄອງບ້ານກວດກາລາດຕະເວນປົກກະຕິ ໃນຂອບເຂດປ່າສະຫງວນແຫ່ງຊາດນໍ້າປຸຍ ຈໍານວນ 27 ຄັ້ງ ສະເລ່ຍ ເດືອນລະ 2 ຄັ້ງ ຍຶດອາວຸດ ແລະ ອຸປະກອນ ທີ່ໃຊ້ລ່າສັດເຊັ່ນ: ພົບເຫັນປືນແກັບ 31 ກະບອກ, ໝໍ້ຊັອດປາ 15 ເຄື່ອງ, ແຮ້ວ 55 ຫຼັງ ແລະ ຍຶດຈັກສະຕິນໄດ້ ຈໍານວນ 5 ເຄື່ອງ; ສົມທົບກັບເຈົ້າໜ້າທີ່ກ່ຽວຂ້ອງຂອງແຂວງ ແລະ ເມືອງ(ເມືອງພຽງ ແລະ ເມືອງປາກລາຍ) ກວດກາການລັກລອບລ່າຊ້າງປ່າ ຈຳວນ 8 ໂຕ ໃນນັ້ນ: ຂ້າຊ້າງປ່າຍ້ອນຈຸດປະສົງທາງການຄ້າເຖື່ອນ 6 ໂຕ (ເຂດນາແວນ ເມືອງພຽງ) ແລະ ຂ້າຊ້າງປ່າຍ້ອນສາຍເຫດມີຂໍ້ຂັດແຍ້ງກັບປະຊາຊົນ ຈຳນວນ 2 ໂຕ (ເມືອງປາກລາຍ) ສົມທົບກັບອໍານາດການປົກຄອງບ້ານໆນາຄະຍາງ, ບ້ານໂພນງາມ ແລະ ຫ້ອງການກະສິກຳ ແລະ ປ່າໄມ້ເມືອງ ດັບມອດໄຟໄໝ້ລາມປ່າ ແລະ ສ້າງແລວກັນໄຟຢູ່ເຂດປ່າສະຫງວນ ບ້ານນາຄະຍາງ ເມືອງປາກລາຍ ຈໍານວນ 1 ຄັ້ງ ມີຜູ່ເຂົ້າຮ່ວມທັງໝົດ 206 ຄົນ, ຍິງ 75 ຄົນ. ທັງໝົດນັ້ນ ກໍເພື່ອເປັນການສະກັດກັ້ນ ແລະ ຫລຸດຜ່ອນການລັກລອບຕັດໄມ້, ເຄື່ອງປ່າຂອງດົງ ແລະ ການລ່າ, ຊື້ຂາຍສັດປ່າ ໃຫ້ຫຼຸດໜ້ອຍລົງເທື່ອລະກ້າວ ແລະ ຍັງສ້າງໄດ້ຖານຂໍ້ມູນພື້ນຖານ ເພື່ອກຽມຄວາມພ້ອມສະເໜີປ່າສະຫງວນແຫ່ງຊາດ ນ້ຳປຸຍ ເຂົ້າເປັນມໍລະດົກທາງທຳມະຊາດອາຊຽນ. ຕອນທ້າຍບັນດາຜູ້ເຂົ້າຮ່ວມໄດ້ປະກອບຄໍາຄິດຄໍາເຫັນຢ່າງກົງໄປກົງມາ ເພື່ອໃຫ້ເປັນເອກະພາບຮ່ວມກັນໃນການຈັດຕັ້ງປະຕິ ບັດບັນດາກິດຈະກໍາຕ່າງໆ ກ່ຽວກັບການຄຸ້ມຄອງປ່າສະຫງວນແຫ່ງຊາດ ນໍ້າປຸຍ ໃຫ້ໄປຕາມແຜນການຈັດສັນທີ່ກົມປ່າໄມ້ໄດ້ຮັບຮອງຜ່ານມາ.
ຂ່າວ+ພາບ: ບຸນທີ
