ວັນທີ 12 ມີນາ 2000, ທ່ານສີຈົ້ງຊຸ່ນ (ພໍ່ຂອງທ່ານສີຈິ້ນຜິງ) ທີ່ມີອາຍຸ 87 ປີພ້ອມດ້ວຍຄອບຄົວ ໄດ້ຮ່ວມກັນປູກຕົ້ນໄຮຕົ້ນໜຶ່ງຢູ່ໃນສວນ “ລານຢວນ” ທີ່ເປັນບ່ອນພັກອາໄສຢູ່ນະຄອນເຊີ່ນເຈີ້ນ ແຂວງກວາງຕຸ້ງ. ທ່ານສີຈົ້ງຊຸ່ນໄດ້ເວົ້າກັບພະນັກງານໃກ້ຊິດວ່າ: “ຂ້າພະເຈົ້າກໍຈະຕັ້ງຫຼັກປັກຖານຢູ່ເຊີ່ນເຈີ້ນຄືກັນ”
ໃນຖານະເປັນໜຶ່ງໃນບັນດາຜູ້ບຸກເບີກຕົ້ນຕໍ ແລະ ຜູ້ກໍ່ຕັ້ງສຳຄັນຂອງພາລະກິດການປະຕິຮູບ ແລະ ເປີດປະຕູສູ່ພາຍນອກຂອງແຂວງກວາງຕຸ້ງ, ທ່ານ ສີຈົ້ງຊຸ່ນ ໄດ້ປູກຕົ້ນໄມ້ນີ້ເພື່ອສະແດງໃຫ້ເຫັນເຖິງຄວາມມຸ່ງຫວັງຂອງເພິ່ນ ທີ່ຢາກຝັງຮາກເລິກຢູ່ດິນແດນການປະຕິຮູບ ແລະ ເປີດປະຕູສູ່ພາຍນອກແຫ່ງນີ້.
ໃນໄລຍະເຮັດວຽກຢູ່ແຂວງກວາງຕຸ້ງເປັນເວລາ 2 ປີປາຍ, ທ່ານ ສີຈົ້ງຊຸ່ນ ໄດ້ເຮັດວຽກທີ່ມີລັກສະນະປະດິດສ້າງຫຼາຍຢ່າງ. ພຶດຕິກຳຕົວຈິງອັນຍິ່ງໃຫຍ່ຂອງເພິ່ນ ທີ່ໄດ້ນຳພາປະຊາຊົນກວາງຕຸ້ງ ປົດປ່ອຍແນວຄິດ, ດຳເນີນການປະຕິຮູບຢ່າງໝາຍໝັ້ນກ້າແກ່ນ ນັ້ນໄດ້ສົ່ງອິດທິພົນໃຫ້ແກ່ ທ່ານ ສີຈິ້ນຜິງ ຢ່າງເລິກເຊິ່ງ.
ປີ2012, ພາຍຫຼັງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກກອມມູນິດຈີນສຳເລັດລົງ, ທ່ານ ສີຈິ້ນຜິງ ທີ່ຫາກໍ່ໄດ້ຮັບເລືອກຕັ້ງເປັນເລຂາທິການໃຫຍ່ ຄະນະກຳມະການສູນກາງພັກກອມມູນິດຈີນ ໄດ້ເລືອກເອົາແຂວງກວາງຕຸ້ງ ເປັນບ່ອນທຳອິດທີ່ເພິ່ນລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ທ້ອງຖິ່ນ. ຢູ່ສວນສາທາລະນະພູຫຼຽນຮວາ ນະຄອນເຊີ່ນເຈີ້ນ, ທ່ານ ສີຈິ້ນຜິງ ໄດ້ປູກຕົ້ນໄຮຕົ້ນໜຶ່ງຢູ່ສະໜາມຫຼວງຈອມພູຫຼຽນຮວາ.
ທຸກມື້ນີ້, ຕົ້ນໄຮສອງຕົ້ນທີ່ ທ່ານ ສີຈົ້ງຊຸ່ນ ແລະ ທ່ານ ສີຈິ້ນຜິງ ໄດ້ປູກຢູ່ນະຄອນເຊີ່ນເຈີ້ນ ນັ້ນຕ່າງກໍເຕີບໃຫຍ່ຂຶ້ນກາຍເປັນຮົ່ມໄຊທີ່ມີກິ່ງກ້ານດົກໜາ. ເມື່ອເບິ່ງໃນປັດຈຸບັນແລ້ວເຫັນວ່າ: ຈີນກຳລັງລົງເລິກການປະຕິຮູບຢ່າງຮອບດ້ານຕື່ມອີກ, ສິ່ງທີ່ຕ້ອງການນັ້ນແມ່ນເສີມຂະຫຍາຍຈິດໃຈເຂັ້ມແຂງ ຂອງຕົ້ນໄຮທີ່ຝັງຮາກເລິກລົງໄປໃຕ້ດິນ, ບໍ່ຢ້ານກົວຕໍ່ຄວາມຫຍຸ້ງຍາກລຳບາກ.
