ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຕ້າເໝົາ ຈາກໝູ່ບ້ານທໍາມະດາສູ່ຄວາມທັນສະໄໝໃນຊົນນະບົດຢູ່ນະຄອນຊານຢ້າ, ສປ ຈີນ
ຕ້າເໝົາ (Damao) ແມ່ນໝູ່ບ້ານໜຶ່ງທີ່ຕັ້ງຢູ່ເມືອງ ຈີຢາງ (Jiyang) ໃນນະຄອນຊານຢ້າ (Sanya), ສປ ຈີນ ເຊິ່ງເມື່ອກ່ອນເປັນໝູ່ບ້ານທໍາມະດາທີ່ບໍ່ໄດ້ຮັບການພັດທະນາ. ແຕ່ມາ ຮອດປັດຈຸບັນນີ້ ໄດ້ປ່ຽນໄປສູ່ໂສມໜ້າໃໝ່ ພາຍຫລັງທີ່ນະ ຄອນຊານຢ້າດໍາເນີນໂຄງການ “ຊົນນະບົດທີ່ສວຍງາມ”.
ອົງການປົກຄອງທ້ອງຖິ່ນໄດ້ປັບປຸງໝູ່ບ້ານດັ່ງກ່າວ ແລະ ເພື່ອເພີ່ມລາຍຮັບໃຫ້ປະຊາຊົນພາຍໃນໝູ່ບ້ານ ເຮັດໃຫ້ໝູ່ບ້ານດັ່ງ ກ່າວໄດ້ຮັບການຄັດເລືອກເປັນໝູ່ບ້ານຕົວແບບລະດັບປະເທດ ເຊິ່ງເປັນພຽງໝູ່ບ້ານດຽວໃນນະຄອນຊານຢ້າທີ່ໄດ້ຮັບການ ຍອມຮັບເປັນໝູ່ບ້ານຕົວແບບດັ່ງກ່າວ.
ໃນວັນທີ 24 ເມສາ 2024 ນີ້, ສື່ມວນຊົນຈີນ-ອາຊຽນ ຫລາຍກວ່າ 50 ຄົນ ທີ່ເຂົ້າຮ່ວມກິດຈະກໍາ “ຄູ່ຮ່ວມສື່ມວນຊົນອາຊຽນ ເບິ່ງຈີນຮ່ວມກັນ” ໄດ້ເຄື່ອນໄຫວຢ້ຽມຢາມໝູ່ບ້ານຕ້າເໝົາ ເຊິ່ງປັດຈຸບັນໝູ່ບ້ານດັ່ງກ່າວປະກອບມີ 23 ບ້ານທໍາມະຊາດ, ມີ 1.394 ຫລັງຄາເຮືອນ, ພົນລະເມືອງ 7.200 ກວ່າຄົນ, ມີເນື້ອທີ່ທັງໝົດ 28.590 mu (ປະມານ 1.985 ເຮັກຕາ) ເຊິ່ງນັກຂ່າວໄດ້ຢ້ຽມຢາມຫລາຍສະຖານທີ່ພາຍໃນໝູ່ບ້ານ ເຊັ່ນ: ສູນນະວັດຕະກໍາວິທະຍາ ສາດ ແລະ ເຕັກໂນໂລຊີກະສິກໍາທີ່ມີການ ຄົ້ນຄວ້າ ແລະ ທົດລອງປູກພືດ ແລະ ໝາກໄມ້ຫລາຍຊະນິດ, ເຮືອນແກ້ວອັດສະລະຍະ, ເຂດປູກໝາກໄມ້ຫລາຍຊະນິດ, ເຂດທ່ອງທ່ຽວ, ເຂດຕັ້ງເຕັ້ນບ່ອນນອນສໍາລັບນັກທ່ອງທ່ຽວ, ຂີ່ລົດຊົມເນື້ອທີ່ປູກພືດ ແລະ ໝາກໄມ້ຫລາຍຊະນິດ ແລະ ອື່ນໆ, ພ້ອມນີ້ ຍັງໄດ້ຊີມຜະລິດຕະພັນທີ່ເຮັດຈາກໝາກໄມ້ພາຍໃນສວນ ເຊັ່ນ: ໝາກລໍາໄຍ, ໝາກມັງກອນ ແລະ ອື່ນໆ.
ອາກາດທີ່ໝູ້ບ້ານ ຕ້າເໝົາ ດີຫລາຍ ແລະ ມີທີວທັດສວຍງາມ ເຊິ່ງສື່ມວນຊົນຈາກປະເທດສະມາຊິກອາຊຽນທີ່ເຂົ້າຮ່ວມກິດຈະກໍານີ້ ຕ່າງຍົກຍ້ອງວ່າເປັນໂຄງການພັດທະນາທີ່ດີຫລາຍ ແລະ ສະແດງຄວາມເຫັນວ່າ ນະຄອນຊານ ຢ້າ ບໍ່ພຽງແຕ່ໄດ້ປັບປຸງລາຍຮັບຂອງຊາວບ້ານໃຫ້ດີຂຶ້ນເທົ່ານັ້ນ ແຕ່ຍັງເຮັດໃຫ້ເຂົາເຈົ້າມີຄວາມຢູ່ດີກິນດີໃນການດໍາລົງຊີ ວິດໃນປັດຈຸບັນ ແລະ ໃນອະນາ ຄົດ.
ອີງຕາມຂໍ້ມູນຈາກຜູ້ຕາງໜ້າໝູ່ບ້ານດັ່ງກ່າວ ໄດ້ອະທິບາຍຕໍ່ຄະນະສື່ມວນຊົນທີ່ໄປຢ້ຽມຢາມໃນຄັ້ງນີ້ວ່າ: ພາຍໃຕ້ແຜນຍຸດ ທະສາດແຫ່ງຊາດໃນການຟື້ນຟູຊົນນະບົດ, ພາກສ່ວນທີ່ກ່ຽວ ຂ້ອງຂອງເມືອງໄດ້ເອົາໃຈໃສ່ໃນການພັດທະ ນາໝູ່ບ້ານຕ້າເໝົາ ໃຫ້ມີການພັດທະນາຢ່າງຕໍ່ເນື່ອງ ທັງທາງດ້ານກະສິກໍາ ແລະ ອຸດ ສາຫະກໍາທີ່ນໍາໃຊ້ເຕັກໂນໂລຊີທີ່ທັນສະໄໝ ເຮັດໃຫ້ມາຮອດປັດຈຸບັນ ພາຍໃຕ້ການຜະລິດກະສິກໍາ ແລະ ອຸດສາຫະກໍາແບບປະສົມປະສານ ໂດຍນໍາໃຊ້ເຕັກໂນໂລຊີທັນສະໄໝ ໄດ້ຫັນປ່ຽນການຜະລິດຂອງໝູ່ບ້ານໄປສູ່ຄວາມທັນສະໄໝແບບກ້າວກະ ໂດດ.
ໃນຊຸມປີບໍ່ດົນມານີ້, ມີການປ່ຽນແປງທີ່ໜ້າປະທັບໃຈໃນທຸກທີ່ຂອງໝູ່ບ້ານ ຕ້າເໝົາ, ທັງໃນດ້ານການເງິນສາທາລະນະ, ພື້ນທີ່ດ້ານໜ້າ ແລະ ດ້ານຫລັງຂອງໝູ່ບ້ານສະອາດງາມຕາດີ, ມີຖະ ໜົນຫົນທາງທີ່ໄດ້ຄຸນນະພາບ,ທັງມີການສ້າງທາງສໍາລັບການຂີ່ລົດຖີບອອກກໍາລັດກາຍຂອງນັກທ່ອງທ່ຽວ ແລະ ເຮັດໃຫ້ໝູ່ບ້ານຕ້າເໝົາ ກາຍເປັນສະຖານທີ່ທ່ອງທ່ຽວທີ່ດຶງດູດນັກທ່ອງ ທ່ຽວທັງພາຍໃນ ແລະ ຕ່າງປະເທດເຂົ້າໄປທ່ຽວຊົມເປັນຈໍານວນຫລາຍໃນແຕ່ລະປີ.
ໝູ່ບ້ານ ຕ້າເໝົາ ໄດ້ຊື່ມາຈາກພູຕ້າເໝົາ ທີ່ຕັ້ງໂອບລ້ອມບັນ ດາບ້ານພາຍໃນໝູ່ບ້ານດັ່ງກ່າວ ທີ່ຕັ້ງຢູ່ຢ່າງກະແຈກກະຈາຍ ມີແມ່ຍນໍ້າ ແລະ ທົ່ງນາລຸ່ມແມ່ນໍ້າ ເຊິ່ງເໝາະສົມທີ່ສຸດໃນການຜະລິດກະສິກໍາ, ອຸດສາຫະກໍາ, ລວມເຖີງການທ່ອງທ່ຽວ ຈຶ່ງເປັນເງື່ອນ ໄຂທີ່ດີຕໍ່ການພັດທະນາໝູ່ບ້ານດັ່ງກ່າວໃຫ້ຈະເລີນກ້າວຫນ້າມາຮອດປັດຈຸບັນນີ້.
ອີງຕາມການລາຍງານຂ່າວຂອງສື່ມວນຊົນໃນນະຄອນຊານຢ້າ ໃຫ້ຮູ້ວ່າ: ໝູ່ບ້ານ ຕ້າເໝົາ ໄດ້ຮັບການຄັດເລືອກໃຫ້ເປັນໜຶ່ງໃນຈໍານວນ 255 ບ້ານໃນທົ່ວປະເທດຈີນ ທີ່ເປັນບ້ານພັກຜ່ອນທີ່ສວຍງາມປະຈໍາປີ 2022 ຈຶ່ງເຮັດໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດຮູ້ຈັກ ແລະ ມາທ່ອງທ່ຽວຢູ່ໝູ່ບ້ານ ຕ້າເໝົາ ນັບມື້ເພີ່ມຂຶ້ນຢ່າງຕໍ່ເນື່ອງ.