ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ແຫລ່ງຂ່າວຈາກ ແຂວງບໍ່ແກ້ວ ໃຫ້ຮູ້ວ່າ: ໜ່ວຍງານຂຶ້ນທະບຽນວັດຖຸພັນ ພະພຸດທະຮູບ ຈາກພະແນກ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງບໍ່ແກ້ວ ແລະ ຫ້ອງການ ຖວທ ເມືອງຕົ້ນເຜິ້ງ ໄດ້ພ້ອມກັນຂຶ້ນທະບຽນ ພະພຸດທະຮູບ ທີ່ໄດ້ຂຸດຄົ້ນ ເປັນເວລາ 12 ວັນ ເລີ່ມແຕ່ວັນທີ 16-28 ມີນາ 2024 ສໍາເລັດແລ້ວ 154 ອົງ ໃນນີ້, ມີທັງພະພຸດທະຮູບທີ່ສົມບູນ ແລະ ບໍ່ສົມບູນ ສ່ວນພະພຸດທະຮູບປາງລີລາ, ພະພຸດທະຮູບໃບໂພ ແລະ ສິ້ນສ່ວນອື່ນໆ ທີ່ໄດ້ຈາກການຂຸດຄົ້ນ ແມ່ນຍັງບໍ່ໄດ້ຂຶ້ນທະບຽນເທື່ອ ສໍາລັບອົງທີ່ໄດ້ຂຶ້ນລະບຽນແລ້ວສ່ວນຫລາຍມີລັກສະນະສິລະປະລາວລ້ານຊ້າງ. ສ່ວນລາຍລະອຽດຕ່າງໆຍັງຢູ່ໃນການສະຫລຸບສັງລວມ ແລະ ທາງທີມງານຂຶ້ນທະບຽນຈະລາຍງານເປັນໄລຍະ.
ກ່ອນຈະຂຶ້ນທະບຽນ ພະພຸດທະຮູບທຸກອົງ ແມ່ນ ໄດ້ທໍາຄວາມສະອາດ, ອະນາໄມ, ເຊັດຖູຂີ້ດິນ ຫລື ເອົາກ້ອນຫີນອອກ, ເສດຊາຍທີ່ຕິດກັບພະພຸດທະຮູບ ທີ່ຂຸດຄົ້ນໄດ້ມາ ໃຫ້ສະອາດສວຍງາມ ພ້ອມທັງວັດແທກລວງສູງ, ລວງຍາວ ແລະ ຊັ່ງນໍ້າໜັກ ໂດຍໜ່ວຍງານຂຶ້ນທະບຽນວັດຖຸພັນພະພຸດທະຮູບ ເຊິ່ງນໍາໂດຍທ່ານ ປອ ສົມຄິດ ວົງປັນຍາ ຫົວໜ້າພະແນກ ຖວທ ແຂວງບໍ່ແກ້ວ. ປັດຈຸບັນ, ການຂຸດຄົ້ນພະພຸດທະຮູບບູຮານ ທີ່ມີອາຍຸຫລາຍຮ້ອຍປີ ຢູ່ດອນເຜິ້ງຄໍາ ເມືອງຕົ້ນເຜິ້ງ ແຂວງບໍ່ແກ້ວ ຍັງສືບຕໍ່ຂຸດຄົ້ນຢູ່.
ຂ່າວ: ຄໍາເພັງ ສີສະຫວ່າງ