ໃນບົດຊີ້ແຈງຂອງທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ (ຖວທ) ຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ ວັນທີ 14 ມິຖຸນາ 2024 ໄດ້ຍົກໃຫ້ເຫັນມາດຕະການຂອງລັດຖະບານໃນການຄຸ້ມຄອງໂຄງການພັດທະນາ ຫຼື ກິດຈະກໍາການເຄື່ອນໄຫວທາງດ້ານເສດຖະກິດ-ສັງຄົມ ທີ່ອາດກໍ່ໃຫ້ເກີດມີຜົນກະທົບທາງລົບຕໍ່ມໍລະດົກແຫ່ງຊາດ ໂດຍກົງ ຫຼື ທາງອອ້ມ.
ທ່ານຊີ້ແຈງວ່າ: ໂດຍເຫັນໄດ້ຄວາມສໍາຄັນຕໍ່ກັບການປົກປັກຮັກສາມໍຣະດົກ ທາງດ້ານວັດທະນະທຳ, ປະຫວັດສາດ ແລະ ທຳມະຊາດ ຂອງຊາດ ທີ່ອາດຈະໄດ້ຮັບຜົນກະທົບໃນທາງກົງ ຫຼື ທາງອ້ອມ ຈາກການດໍາເນີນໂຄງການພັດທະນາ ຫຼື ກິດຈະກຳ ການເຄື່ອນໄຫວ ທາງດ້ານເສດຖະກິດ-ສັງຄົມ. ໃນໄລຍະຜ່ານທຸກໆໂຄງການ ທີ່ນອນຢູ່ໃນພື້ນທີ່ມໍຣະດົກ ຫຼື ເຂດພື້ນທີ່ອ້ອມຂ້າງແຫຼ່ງມໍຣະດົກ ຈະຕ້ອງໄດ້ຮັບການພິຈາລະນາ ແລະ ອະນຸມັດຈາກຄະນະກຳມະການມໍຣະດົກທ້ອງຖິ່ນ ແລະ ຄະນະກຳມະການຄຸ້ມຄອງມໍຣະດົກແຫ່ງຊາດ ຕາມລໍາດັບ.
ພ້ອມນັ້ນ ລັດຖະບານ ໄດ້ມອບໃຫ້ກະຊວງ ຖວທ ດໍາເນີນການສຶກສາ, ຄົ້ນຄວ້າ ເພື່ອສ້າງເຄື່ອງມື ແລະ ກົນໄກໃນການຈັດຕັ້ງປະຕິບັດວຽກງານປະເມີນຜົນກະທົບ ຕໍ່ມໍຣະດົກ ມາຮອດປະຈຸບັນ ໄດ້ສໍາເລັດແລ້ວ ແລະ ໄດ້ນໍາເອົາມາດຕະການໃນການປະເມີນຜົນກະທົບດັ່ງກ່າວ ກຳນົດເຂົ້າຢູ່ໃນ ພາກທີ 6, ມາດຕາ 65 ແລະ ມາດຕາ 66 ຂອງກົດໝາຍວ່າດ້ວຍມໍຣະດົກແຫ່ງຊາດ (ສະບັບປັບປຸງ) ທີ່ຖືກຮັບຮອງໃນປີ 2021 ທີ່ຜ່ານມາ; ພ້ອມນັ້ນໄດ້ສໍາເລັດການສ້າງຄູ່ມື ພື້ນຖານໃນການຈັດຕັ້ງປະຕິບັດວຽກງານປະເມີນຜົນກະທົບດັ່ງກ່າວ.
ທ່ານ ນາງ ສວນສະຫວັນ ວິຍະເກດ ຊີ້ແຈງຕື່ມວ່າ: ຕິດພັນກັບການທ່ອງທ່ຽວໃນການດໍາເນີນໂຄງການພັດທະນາ ຫຼື ກິດຈະກຳການເຄື່ອນໄຫວທາງດ້ານ ເສດຖະກິດ-ສັງຄົມ ທີ່ອາດກໍ່ໃຫ້ເກີດມີຜົນກະທົບທາງລົບ ຕໍ່ມໍລະດົກແຫ່ງຊາດໂດຍກົງ ຫຼື ທາງອ້ອມ: ຜົນກະທົບຈາກການພັດທະນາເສດຖະກິດຂອງຂະແໜງການອື່ນ ຕໍ່ສະຖານທີ່ທ່ອງທ່ຽວ ແລະ ຈຸດໝາຍປາຍທາງການທ່ອງທ່ຽວ ໂດຍສະເພາະແມ່ນການສ້າງເຂື່ອນ, ການຂຸດຄົ້ນແຮ່ທຳມະຊາດ, ການສຳປະທານຜາຫີນ, ການບຸກເບີກໜ້າດິນທີ່ຂາດການວາງແຜນທີ່ດີ ຍັງເປັນສິ່ງທ້າທາຍຫຼາຍຕໍ່ການພັດທະນາການທ່ອງທ່ຽວ ໃນໄລຍະສັ້ນ ແລະ ໄລຍະຍາວ. ສົ່ງຜົນກະທົບຕໍ່ການທ່ອງທ່ຽວ ທັງທາງກົງ ແລະ ທາງອ້ອມ.
