ພິທີຖະແຫຼງຂ່າວ ກ່ຽວກັບສະມາຄົມນັກທຸລະກິດແມ່ຍິງ ແລະ ພິທີມອບລາງວັນພິເສດຜູ້ປະກອບການແມ່ຍິງອາຊຽນຂອງສະມາຄົມນັກທຸລະກິດແມ່ຍິງ ຈັດຂຶ້ນໃນຕອນບ່າຍວັນທີ 2 ກັນຍາ 2024 ທີ່ສະພາການຄ້າ ແລະ ອຸດສາຫະກໍາແຫ່ງຊາດ, ນະຄອນຫລວງວຽງຈັນ ໂດຍການເປັນປະທານຂອງ ທ່ານ ນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງ, ປະທານກອງປະຊຸມ “ຜູ້ປະກອບການແມ່ຍິງອາຊຽນ 2024. ມີ ທ່ານ ບົວວັນ ວິລະວົງ ຫົວໜ້າຫ້ອງການ, ກະຊວງອຸດສາຫະກຳການຄ້າ, ທ່ານ ນາງ ລາວັນສຸດທິສານ ຮອງປະທານຄະນະບໍລິຫານງານ ສູນກາງສະຫະພັນແມ່ນຍິງລາວ ພ້ອມດ້ວຍຕາງໜ້າຈາກຫົວໜ່ວຍທຸລະກິດແມ່ຍິງ ແລະ ສື່ມວນຊົນເຂົ້າຮ່ວມ.
ທ່ານ ນາງ ຈັນທະຈອນ ວົງໄຊ ໃຫ້ຮູ້ວ່າ: ການຖະແຫຼຂ່າວຄັ້ງນີ້ ເພື່ອເປັນການຊຸກຍູ້ຜູ້ປະກອບການແມ່ຍິງໃນພາກພື້ນ ກຸ່ມປະເທດອາຊຽນເວົ້າລວມໂດຍສະເພາະທຸລະກິດແມ່ຍິງລາວ, ເນັ້ນເຖິງການປະກອບສ່ວນຮ່ວມກັນຂອງຜູ້ປະກອບການຍິງໃນການຂະຫຍາຍດ້ານເສດຖະກິດ ແລະ ພັດທະນາສັງຄົມ, ເພື່ອອໍານວຍຄວາມສະດວກໃນການ ສ້າງເຄືອຂ່າຍ ເຮັດທຸລະກິດ, ສົ່ງເສີມການຮ່ວມມືລະຫວ່າງຜູ້ປະກອບ ການແມ່ຍິງ, ນັກລົງທຶນ, ຜູ້ວາງແຜນນະໂຍບາຍ ແລະພາກສ່ວນກ່ຽວຂ້ອງອື່ນໆ, ເພື່ອສະເຫຼີມສະຫຼອງຄວາມມານະພະຍາຍາມຂອງຜູ້ປະກອບການແມ່ຍິງອາຊຽນໃນການຊຸກຍູ້ການເຕີບໂຕ ທາງດ້ານເສດຖະກິດທີ່ຍືນຍົງ ແລະ ສ້າງຄວາມເຂັ້ມແຂງຂອງປະເທດອາຊຽນ ແລະການເຊື່ອມໂຍງເສດຖະ ກິດໃນພາກພື້ນ, ເພື່ອຮັບຮູ້, ຢັ້ງຢືນເຖິງຜົນສໍາເລັດອັນຊົງກຽດແກ່ຜູ້ປະກອບການແມ່ຍິງດີເດັ່ນ ທັງເປັນແຮງບັນດາໃຈໃຫ້ແກ່ ຄົນລຸ້ນໃໝ່ ດ້ວຍການມອບລາງວັນພິເສດຂອງນັກທຸລະກິດແມ່ຍິງອາຊຽນປີ 2024, ເພື່ອສັງລວມສິນຄ້າຂອງສະມາຊິກ ສະມາຄົມນັກທຸລະກິດແມ່ຍິງລາວ ແລະ ຜູ້ສະຫນັບສະຫນູນຫລັກມາ ວາງສະແດງ ເພື່ອເພີ່ມສີສັນໃນຂັ້ນຕອນຕ່າງໆ, ຕອບສະໜອງ ໃຫ້ແກ່ການຂະຫຍາຍເຄືອຂ່າຍຂອງຜູ້ປະກອບການ ແມ່ຍິງ ແລະຜູ້ມີສ່ວນຮ່ວມໃນກອງປະຊຸມດັ່ງກ່າວ, ເຊິ່ງເປັນຜົນປະໂຫຍດພອຍໄດ້ຢ່າງໃຫຍ່ຫລວງໃຫ້ທັງຜູ້ສະໜັບສະໜູນ ແລະເຈົ້າພາບຈັດກອງປະຊຸມຄັ້ງນີ້ຢ່າງແທ້ຈິງ ແລະ ເພື່ອເປັນການສະໜັບສະໜູນກອງປະຊຸມ ABIS ແລະຊົມເຊີຍທີ່ສປປລາວເຮົາເປັນເຈົ້າພາບກອງປະຊຸມສຸດຍອດອາຊຽນໃນປີ 2024.
ທ່ານ ນາງ ຈັນທະຈອນ ວົງໄຊ ໃຫ້ຮູ້ຕື່ມວ່າ: ເພື່ອເປັນການຢືນຕໍ່ສາກົນວ່າ ພັກ ແລະ ລັດຖະບານລາວເຮົາເວົ້າລວມ,ເວົ້າສະເພາະແມ່ນສະມາຄົມນັກທຸລະກິດແມ່ຍິງລາວພວກເຮົາ ມີຄວາມພ້ອມ ແລະ ພູມໃຈກະກຽມເປັນເຈົ້າພາບໃນການຈັດກອງປະຊຸມລະດັບອາຊຽນ ແລະ ກອງປະຊຸມອື່ນໆ ທີ່ປິ່ນອ້ອມໃນປີ 2024 ນີ້ ແລະ ຄາດວ່າ ກອງປະຊຸມ “ຜູ້ປະກອບການແມ່ຍິງອາຊຽນ 2024 ແລະພິທີມອບລາງວັນພິເສດຜູ້ປະກອບການແມ່ຍິງອາຊຽນ” ຈະໄດ້ຈັດຂຶ້ນຢ່າງເປັນທາງການ ໃນວັນທີ 4 ຕຸລາ 2024 ນີ້ ທີ່ໂຮງແຮມແລນມາກ ນະຄອນຫລວງວຽງຈັນ ເພື່ອເປັນການຢືນຢັນຄືນໃໝ່ຕໍ່ຄໍາໝັ້ນສັນຍາຂອງອາຊຽນໃນການຊຸກຍູ້ສົ່ງເສີມການພັດທະນາຜູ້ປະກອບ ການແມ່ຍິງແລະ ສ້າງຄວາມເຂັ້ມແຂງທາງດ້ານເສດຖະກິດໃຫ້ເປັນວາລະຂອງພາກພື້ນ ເພື່ອຮັບຮູ້ບົດບາດສໍາຄັນ, ທ່າແຮງຕ່າງໆ ແລະ ຄວາມເຂັ້ມແຂງຂອງຜູ້ນໍາແມ່ຍິງ ແລະ ແມ່ຍິງທຸກຄົນໃນ ຂອບເຂດອາຊຽນ ໃນການຫາແນວທາງເພື່ອກ້າວໄປຂ້າງໜ້າໃນການຟື້ນຟູທາງດ້ານເສດກິດຂອງແມ່ຍິງ ແລະ ສ້າງອະນາຄົດຂອງຂົງເຂດອາຊຽນໃນຊຸມປີຫຼັງໂລກເກີດພະຍາດລະບາດແລະໄພພິບັດຕ່າງໆ. ເພື່ອເປັນການສ້າງສາຍພົວພັນຮ່ວມມື ແລະ ສົມທົບລະຫວ່າງ ລັດຖະບານ, ພາກເອກະຊົນ ແລະ ບັນດາທ່ານ ຜູ້ສະ ໜັບສະໜູນທີ່ມີສ່ວນຮ່ວມທີ່ສໍາຄັນໃນການຊຸກຍູ້ກອງປະຊຸມລະດັບສາກົນໃນຄັ້ງນີ້ໃຫ້ກ້າວໄປສູ່ການມີຄໍາ ໝັ້ນສັນຍາຕໍ່ໄປເລື້ອຍໆ.
