ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຖະແຫຼງຂ່າວ ຜົນສຳເລັດກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນ ແຂວງຫຼວງພະບາງ ຊຸດທີ່ I

ທ້າຍກໍລະກົດຜ່ານມານີ້ ທ່ານ ກໍລະກັນ ພົມມະວົງ ຄະນະປະຈຳ ເລຂາທິການສະພາປະ ຊາຊົນແຂວງ ໄດ້ຖະແຫຼງຂ່າວຜົນສຳເລັດ ຂອງກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງ ຊຸດທີ I ຕໍ່ທີມງານຂ່າວແຂວງວ່າ: ກອງປະຊຸມໄດ້ດໍາເປັນເວລາ ໜຶ່ງ ວັນເຄິ່ງ ຢູ່ຫ້ອງປະຊຸມໃຫຍ່ຫ້ອງວ່າການປົກຄອງແຂວງ ໂດຍເປັນປະທານຂອງ ທ່ານ ສາຍສະໝອນ ຄົມທະວົງ ຮອງເລຂາພັກແຂວງ ປະທານສະພາປະຊາຊົາແຂວງ ພ້ອມດ້ວຍຄະນະ, ມີ ທ່ານ ຄຳຂັນ ຈັນທະວີສຸກ ກຳມະການສູນກາງພັກ ເລຂາພັກແຂວງ ເຈົ້າແຂວງຫຼວງພະບາງ, ພ້ອມດ້ວຍສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ການນຳຂອງພະແນກການກົມກອງຂອງແຂວງ ແລະແຂກຮັບເຊີນເຂົ້າຮ່ວມ. ກອງປະຊຸມຄັ້ງນີ້ ໄດ້ຮັບຟັງ ການລາຍງານກ່ຽວກັບ ການຈັດຕັ້ງປະຕິບັດວຽກງານຮອບດ້ານ ຂອງອົງການປົກຄອງແຂວງ ປະຈຳ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2020 ການສະເໜີດັດປັບເນື້ອໃນ ແຜນພັດທະນາເສດຖະກິດ-ສັງຄົມ ແລະການດັດແກ້ຕົວເລກລາຍຮັບ-ລາຍຈ່າຍລວມ ລວມຂອງແຂວງ, ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈຳ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2020, ຮັບຟັງການຊີ້ແຈງກ່ຽວກັບ ການປະຕິບັດແຜນການຜະລິດສະບຽງອາຫານ ເພື່ອບໍລິໂພກ ແລະເປັນສີນຄ້າສົ່ງອອກ ຕິດພັນກັບ ການພັດທະນາຊົນນະບົດ ແລະແກ້ໄຂຄວາມທຸກຍາກ, ການຊອກວຽກເຮັດງານທຳ ໃຫ້ປະຊາຊົນຢູ່ພາຍໃນ ແລະກັບຈາກຕ່າງປະເທດ ຍ້ອນການລະບາດຂອງພະຍາດໂຄວິດ 19, ແຜນການແກ້ໄຂໄພພິບັດທາງທຳມະຊາດ, ການປ່ອຍເງີນກູ້ ໃຫ້ແກ່ຫົວໜ່ວຍທຸລະກິດຂະໜາດນ້ອຍ ແລະຂະໜາດກາງ (SME) ແລະ ຮັບຟັງການລາຍງານ ການເຄື່ອນ ໄຫວວຽກງານ 6 ເດືອນຕົ້ນປີ ແລະວາງທິດທາງແຜນການ 6 ເດືອນທ້າຍປີ 2020 ຂອງຄະນະປະຈຳສະພາປະຊາຊົນແຂວງ. ທ່ານກ່າວຕື່ມວ່າ: ວາລະການດຳເນີນກອງປະຊຸມ ສະມາຊິກສະພາແຫ່ງຊາດປະຈຈຳເຂດເລືອກຕັ້ງ ແລະສະມາຊິກສະພາປະຊາຊົນແຂວງ ໄດ້ຄົ້ນຄວ້າ ພິຈາລະນາ ແລະຮັບຮອງເອົາບັນຫາສຳຄັນ ແລະບາງວຽກງານຈຸດສຸມຂອງແຂວງຫຼວງພະບາງຕື່ມອີກ.
ທ່ານ ກໍລະກັນ ພົມມະວົງ ກ່າວຕື່ມວ່າ: ໃນໄລຍະການດຳເນີນກອງປະຊຸມຄັ້ງນີ້ ຄະນະເລຂາທິການສະພາປະຊາຊົນແຂວງ ໄດ້ຮັບໂທລະສັບສາຍດ່ວນ ຈາກປະຊາຊົນຜູ້ມີສິດເລືອກຕັ້ງ ທີ່ສະເໜີຂໍ້ຂ້ອງໃຈ ຈຳນວນ 5 ສາຍ ມີທັງໝົດ 7 ເລື່ອງ ຕໍ່ການການນຳສະເໜີ ຄະນະປະຈຳສະພພາປະຊາຊົນແຂວງ ຈະນຳໄປພິຈາລະນາ, ຄົ້ນ ຄວ້າ ຮ່ວມກັບພາກສ່ວນກ່ຽວຂ້ອງ ເພື່ອຫາວິທີແກ້ໄຂໃຫ້ເໝາະສົມ ແລະທັນເວລາ.

ຂ່າວ: ແຫຼ້ ສຸລີນພອນ