ສະມາຊິກສະພາແຫ່ງຊາດເຂດເລືອກຕັ້ງທີ 1 ນະຄອນ ຫລວງວຽງຈັນ ສະເໜີວ່າ: ຖານການເກັບລາຍຮັບເຂົ້າງົບປະມານຂອງລັດຖະບານ ຍັງບໍ່ທັນຊັດເຈນ. ຂະນະທີ່ຫລາຍຂະແໜງການຢູ່ນະຄອນຫລວງວຽງຈັນ ຍັງມີການເຊື່ອມອຳດ້ານການປະຕິບັດແຜນງົບປະມານ, ມີລາຍຮັບແຕ່ບໍ່ໄດ້ແຈ້ງ ຫລື ບໍ່ໃຫ້ຂໍ້ມູນຈະແຈ້ງເທົ່າທີ່ຄວນ.

ໃນໂອກາດປະກອບຄຳເຫັນຕໍ່ກອງປະຊຸມສະໄໝສາ ມັນເທື່ອທີ 10 ຂອງສະພາແຫ່ງຊາດ ຊຸດທີ VIII ໃນວັນທີ 29 ຕຸລາ 2020 ນີ້ ທ່ານ ປຣະຈິດ ໄຊຍະວົງ ສະມາຊິກສະ ພາແຫ່ງຊາດ ເຂດເລືອກຕັ້ງທີ 1 ນະຄອນຫລວງວຽງຈັນ ກ່າວວ່າ: ປັດຈຸບັນ ຖານການເກັບລາຍຮັບຂອງລັດຖະ ບານ ຍັງບໍ່ລະອຽດຊັດເຈນ ເຫັນໄດ້ຈາກການລົງໄປຊຸກຍູ້ຂະແໜງການເງິນ ເພື່ອປະຕິບັດແຜນງົບປະມານແຫ່ງລັດ ມີຫລາຍຢ່າງປະຕິບັດບໍ່ໄດ້ ຕົວຢ່າງທີ່ມີໃຫ້ເຫັນສະເພາະຢູ່ນະ ຄອນຫລວງວຽງຈັນ ມີຫລາຍບໍລິສັດທີ່ເຂົ້າມາລົງທຶນຈັດຕັ້ງປະຕິບັດໂຄງການລົງທຶນຂອງລັດບໍ່ໄດ້ເສຍອາ ກອນ, ຫລາຍບໍລິສັດຂອງຕ່າງປະເທດບໍ່ໄດ້ຈົດທະບຽນມີມູນຄ່າຢ່າງຫລວງຫລາຍ, ເວລາມີບັນຫາມາຈິ່ງຮູ້ວ່າບໍລິ ສັດດັ່ງກ່າວບໍ່ໄດ້ເສຍພາສີອາກອນໃຫ້ລັດ.

ນອກຈາກນີ້ ຢູ່ນະຄອນຫລວງວຽງຈັນ ມີພາຫະນະປະມານ 1.400.000 ກ່ວາຄັນ ແຕ່ເກັບຄ່າທໍານຽມທາງໄດ້ຕົວຈິງປະມານ 300.000 ຄັນ. ໃນນີ້ ສະເພາະປີ 2018 ເກັບຄ່າທຳນຽມທາງໄດ້ 120 ຕື້ກີບ, 2019 ເກັບໄດ້ 90 ຕື້ກີບ ແລະ ປີ 2020 ເກັບໄດ້ແລ້ວ 63 ຕື້ກີບ. ສ່ວນພາສີທີ່ດິນ ປີ 2018 ເກັບໄດ້ 197 ຕື້ກີບ, ປີ 2019 ເກັບໄດ້ 200 ຕື້ກີບ ແລະ ປີ 2020 ເກັບໄດ້ແລ້ວ 97 ຕື້ກີບ, ທັງ ໝົດນີ້ເຫັນວ່າລາຍຮັບທີ່ເກັບໄດ້ມີທ່າອ່ຽງຫລຸດລົງ, ໝາຍຄວາມວ່າຖານເກັບລາຍຮັບນີ້ຍັງບໍ່ທັນລະອຽດຊັດເຈນ ແລະ ບໍ່ຮູ້ວ່າຈະເກັບລາຍຮັບມາຈາກອັນໃດແທ້ ເພາະຕົວຈິງບໍ່ສາມາດເກັບໄດ້ຕາມທີ່ຄາດໄວ້.

ທ່ານ ປຣະຈິດ ໄຊຍະວົງ ກ່າວຕື່ມວ່າ: ສຳລັບຄາດ ໝາຍຂອງລັດຖະບານໃນການເກັບລາຍຮັບໃຫ້ໄດ້ 27.292 ຕື້ກີບ ໃນປີ 2021 ຖືເປັນຕົວເລກຄາດໝາຍທີ່ສູງ ແລະ ເປັນເລື່ອງດີ ແຕ່ລາຍຮັບທັງໝົດນີ້ບໍ່ຮູ້ວ່າຈະໄດ້ມາ ຈາກໃສແທ້ເພາະຖານເກັບລາຍຮັບຍັງບໍ່ທັນຊັດເຈນ. ສະນັ້ນ ຂະແໜງການທີ່ກ່ຽວຂ້ອງຕ້ອງມີຕົວເລກລະອຽດຊັດເຈນ ເພື່ອໃຫ້ສະມາຊິກສະພາແຫ່ງຊາດສາມາດຕິດ ຕາມ ແລະ ຊຸກຍູ້ການຈັດຕັ້ງປະຕິບັດແຜນງົບປະມານທີ່ວາງໄວ້ໃຫ້ໄດ້ຮັບຜົນດີ ເພາະໃນໄລຍະຜ່ານມາ ເວລາລົງໄປຕິດຕາມກວດກາການຈັດຕັ້ງປະຕິບັດແຜນງົບປະມານຕົວຈິງຢູ່ບາງຂະແໜງການໃນນະຄອນຫລວງວຽງຈັນຍັງມີ ການເຊື່ອມອຳ, ມີລາຍຮັບແຕ່ບໍ່ໄດ້ແຈ້ງ ຫລື ບໍ່ໃຫ້ຂໍ້ມູນທີ່ຈະແຈ້ງເທົ່າທີ່ຄວນ.

ໂດຍ: ມົດແດງນ້ອຍ

Loading...