ທ່ານ ຈັນເພັງ ແສງແກ້ວ ອາຍຸ 53 ປີ ກຸ່ມພັດທະນາທີ່ 6 ເມືອງປາກອູ ແຂວງຫລວງພະບາງ ໄດ້ຖື ເອົາການເຮັດທຸລະກິດການບໍລິການຂົນສົ່ງສີນຄ້າ ເປັນທາງເລືອກໜື່ງ ເປັນອາຊີບຫຼັກ ຈົນກາຍເປັນຄອບຄົວຕົວແບບ ທີ່ອົງຄະນະພັກເມືອງ ໄດ້ໃຫ້ຂື້ນປະກອບຄໍາເຫັນກ່ຽວກັບ ຕົວແບບໃນການບໍລິການ ຢູ່ໃນກອງປະຊຸມໃຫຍ່ ຂອງຜູ້ແທນແນວລາວສ້າງຊາດເມືອງປາກອູຄັ້ງທີ 5 ທີ່ໄດ້ຈັດຂຶ້ນໃນກາງເດືອນກັນຍາຜ່ານມາ ໄດ້ໃຫ້ຮູ້ວ່າ: ຄອບຄົວມີທັງໝົດ 12 ຄົນ, ຍິງ 8 ຄົນ, ມີ 7 ແຮງງານ, ອາຊີບເມື່ອກ່ອນແມ່ນເຮັດນາ ເຮັດໃຫ້ຊີວິດການເປັນຢູ່ພໍແຕ່ກຸ້ມກິນ, ການໃຊ້ຈ່າຍ, ສົ່ງລູກຮຽນຍັງບໍ່ພຽງພໍ ມາຮອດປີ 1997 ໄດ້ຫັນປ່ຽນອາຊີບຄື: ໄດ້ຊື້ລົດມາແລ່ນໂດຍສານ, ຄ້າຂາຍ, ເກັບຊື້ເຄື່ອງນາ ຂອງປ່າມາຂາຍ ສາມາດສ້າງລາຍຮັບສະເລ່ຍໄດ້ 100 ລ້ານກີບຕໍ່ປີ. ເຮັດໃຫ້ຄອບຄົວມີຊີວິດດີຂຶ້ນ ມາຮອດປີ 2007 ທ່ານ ຈັນເພັງ ແສງແກ້ວ ໄດ້ຊື້ລົດ 12 ລໍ້ ຕື່ມ 1 ຄັນ ແລະມາຮອດປີ 2009 ໄດ້ຊື້ລົດ 12 ລໍ້ຕື່ມ 1 ຄັນ ເພື່ອມາຕ່າງເຄື່ອງຂົນສົ່ງ ສາມາດສ້າງລາຍຮັບເຂົ້າຄອບຄົວສະເລ່ຍໄດ້ 300 ລ້ານກີບຕໍ່ປີ ເຫັນວ່າຊີວິດການເປັນຢູ່ດີຂຶ້ນກ່ວາເກົ່າ. ແຕ່ມາຮອດປີ 2011 ເຫັນວ່າ ການແລ່ນລົດມີລາຍຮັບຫລຸດລົງ ຈິ່ງໄດ້ຫັນປ່ຽນຈາກການແລ່ນລົດມາ ສ້າງຮ້ານສ້ອມແປງລົດໃຫຍ່ໄດ້ 1 ຫລັງ ສາມາດສ້າງລາຍຮັບເຜີ້ມສະເລ່ຍໄດ້ 400 ລ້ານກີບຕໍ່ປີ ເຮັດໃຫ້ຊີວິດການເປັນຢູ່ພາຍໃນຄອບຄົວ ຫລຸດພົ້ນອອກຈາກຄອບຄົວທຸກຍາກໄດ້ ກາຍມາເປັນຄອບຄົວພັດທະນາ. ຜ່ານການສະສົມທຶນຮອນ ມາແຕ່ລະປີມາຮອດປະຈຸບັນ ສາມາດພັດທະນາຄອບຄົວໄດ້ດີຂື້ນເປັນລຳດັບ ສະແດງອອກ ມີເຮືອນຖາວອນ 1 ຫລັງ, ມີລົດຮັບໃຊ້ຄອບຄົວ ປະເພດລົດ 12 ລໍ້ 2 ຄັນ,ລົດດ່າມ 1 ຄັນ, ລົດຮຸ່ນໄດ 2 ຄັນ, ລົດກະບະ 2 ຄັນ ແລະລົດຈັກ 2 ຄັນ, ໃນຕໍ່ໜ້າຈະສືບຕໍ່ຂະຫຍາຍກິດຈະການໃຫ້ກ້ວາງຂວາງຂຶ້ນຕື່ມ ເພື່ອສ້າງລາຍຮັບເຂົ້າຄອບຄົວໃຫ້ໄດ້ຫລາຍກ່ວາເກົ່າ, ພ້ອມນັ້ນຈະໄດ້ຊອກພະນັກງານຜູ້ທີ່ມີຄວາມຊໍານານ, ມີປະສົບການ ມາປະກອບເຂົ້າໃນການສ້ອມແປງລົດທຸກປະເພດ, ໂອກາດນີ້ ທ່ານໄດ້ຮຽກຮ້ອງເຖີງຜູ້ທີ່ມີຄວາມສົນໃຈ, ມີເງື່ອນໄຂຢາກຫັນມາເຮັດທຸລະກິດແບບດຽວກັນ ສາມາດມາຖອດຖອນບົດຮຽນນໍາໄດ້ ພ້ອມແລ້ວທີ່ຈະຖ່າຍທອດບົດຮຽນໃຫ້. ນອກຈາກເປັນຄອບຄົວຕົວແບບແລ້ວ ທ່ານ ຈັນເພັງ ແສງແກ້ວ ແມ່ນໄດ້ຮັບໜ້າທີ່ເປັນ ເລຂາພັກບ້ານ ນາຍບ້ານຫາດປາງ ເຊີ່ງເປັນອີກບ້ານໜື່ງທີ່ເປັນຕົວແບບ ກ່ຽວກັບໜ່ວຍພັກນໍາພາປະຊາຊົນຫຼຸດພົ້ນອອກຈາກຄວາມທຸກຍາກ ຂື້ນປະກອບຄໍາເຫັນ ຢູ່ກອງປະຊຸມໃຫຍ່ຜູ້ແທນອົງຄະນະພັກແຂວງຫຼວງພະບາງ ຄັ້ງທີ 8 ທີ່ໄດ້ຈັດຂຶ້ນໃນຕົ້ນເດືອນຕຸລາຜ່ານມາ ຕື່ມອີກ.

ຂ່າວ: ສົມລິດ ແສງທິວັນ ນັກຂ່າວເມືອງປາກອູ

Loading...