ຖ້ຳຈອມອອງ ຕັ້ງຢູ່ບ້ານຈອມອອງ ຫ່າງຈາກເທດສະ ບານເມືອງໄຊ ປະມານ 43 ກິໂລແມັດ, ເປັນຖໍ້າຫີນປູນໃຫຍ່, ຍາວ ແລະ ສວຍງາມອີກແຫ່ງຫນຶ່ງຂອງແຂວງອຸດົມໄຊ ແລະ ເປັນອີກຖໍ້າທີ່ມີຄວາມຍາວໃນອາຊີຕາເວັນອອກສ່ຽງໃຕ້ ເຊິ່ງມີຄວາມຍາວທັງຫມົດ 16 ກວ່າກິໂລແມັດ, ປະກອບດ້ວຍສີສັນຕ່າງໆ ແບບທຳມະຊາດທີ່ອັດສະຈັນ, ມີຫຼາຍຮູ ເຂົ້າ-ອອກ, ຄວາມກວ້າງຂອງຖ້ຳ ປະມານ 15-50 ແມັດ ແລະ ຄວາມສູງປະມານ 25-100 ແມັດ.
ພາຍໃນຖ້ຳ ບາງບ່ອນມີສາຍນ້ຳໄຫຼຜ່ານ, ມີນົມຜາ, ຫີນຍ້ອຍທີ່ມີລວດລາຍສວຍງາມ, ຫີນແກ້ວເປັນສີຂາວເຫຼື້ອມ ຄືກັບເພັດພອຍ ເປັນກ້ອນໃຫຍ່ປະດັບປະດາ ຫ້ອຍຢູ່ຕາມຝາຫີນຄືກັບດອກໄຟຟ້າຢ່າງສວຍງາມ.
ຖ້ຳແຫ່ງນີ້ ໄດ້ຄົ້ນພົບໃນປີ ຄສ 2005 ແລະ ເປີດບໍລິການປີ ຄສ 2007. ຖໍ້າຈອມອອງ ແມ່ນເອີ້ນຕາມຊື່ຂອງບ້ານ, ປະຊາຊົນທ້ອງຖິ່ນ ເຄີຍເອີ້ນຊື່ຖ້ຳນີ້ໃນເມື່ອກ່ອນວ່າ ”ຖ້ຳເຈຍ” ຫຼື ຖ້ຳຂີ້ເຈຍ ຍ້ອນວ່າສະໄໝກ່ອນມີໂຕເຈຍມາອາໄສຢູ່ເປັນຈຳນວນຫຼວງຫຼາຍ, ປະຊາຊົນເຂດຈອມອອງ ໄດ້ພາກັນຂຸດເອົາຂີ້ໂຕເຈຍຢູ່ໃນຖ້ຳມາເຮັດໝື້ປືນແກັບ. ດັ່ງນັ້ນ, ປະຊາຊົນເຂດຈອມອອງ ຈຶ່ງພາກັນເອີ້ນຊື່ຂອງຖ້ຳນີ້ວ່າ ຖ້ຳເຈຍ ຫຼື ຖ້ຳຂີ້ເຈຍ. ແຕ່ທາງພະແນກທ່ອງທ່ຽວແຂວງອຸດົມໄຊ ໄດ້ໂຄສະນາໃຫ້ເອີ້ນຊື່ວ່າ: ຖ້ຳຈອມອອງ ຕາມຊື່ຂອງບ້ານຈົນເຖິງປັດຈຸບັນນີ້.
ມາຮອດປີ 2015 ແຂວງອຸດົມໄຊ ໄດ້ຮັບການຊ່ວຍ ເຫລືອຈາກທະນາຄານພັດທະນາອາຊີ ຫລື ADB ໂດຍຜ່ານ ໂຄງການພັດທະນາພື້ນຖານໂຄງລ່າງເພື່ອສົ່ງເສີມການທ່ອງທ່ຽວໄລຍະ I (2015-2020) ເພື່ອກໍ່ສ້າງເສັ້ນ ທາງປູຢາງ 2 ຊັ້ນ ຈາກຫລັກ 24 ບ້ານນໍ້າບໍ່ຕາໄກ່ ແລະ ຈາກອ່າງນໍ້າຫີນໄປຫາຖໍ້າດັ່ງກ່າວ ພ້ອມທັງກໍ່ສ້າງສິ່ງອໍາ ນວຍຄວາມສະດວກດ່ານຕ່າງໆ ພາຍໃນ ແລະ ພາຍນອກຖໍ້າ.
ປັດຈຸບັນ ຖໍ້າແຫ່ງນີ້ ກໍາລັງໄດ້ຮັບການພັດທະນາ ເພື່ອໃຫ້ກາຍເປັນແຫລ່ງທ່ອງທ່ຽວອັນດັບ 1 ຂອງແຂວງອຸດົມໄຊ.
Source: ຖວທ ອຸດົມໄຊ
