ທຫລ ສໍາເລັດການເປັນເຈົ້າພາບ ແລະ ປະທານຮ່ວມກອງປະຊຸມຄະນະກໍາມະການອາວຸໂສລະດັບສູງອາຊຽນ

ໃນວັນທີ 07 ມີນາ 2024, ຄະນະນໍາຂອງ ທະນາຄານແຫ່ງ ສປປ ລາວ (ທຫລ) ໂດຍ ທ່ານ ນ. ວັດທະນາ ດາລາລອຍ, ຮອງຜູ້ວ່າການ ທຫລ ໄດ້ສໍາເລັດການເປັນປະທານຮ່ວມກອງປະຊຸມຄະນະກໍາມະການລະດັບສູງອາຊຽນ ພາຍໃຕ້ການເຊື່ອມໂຍງຂະແໜງການເງິນອາຊຽນ (ASEAN Senior Level Committee on Financial Integration: SLC) ຄັ້ງທີ 27, ທີ່ ນະຄອນຫຼວງວຽງຈັນ. ເຂົ້າຮ່ວມໂດຍບັນດາຮອງຜູ້ວ່າການທະນາຄານກາງຂອງປະເທດສະມາຊິກອາຊຽນ ພ້ອມດ້ວຍຄະນະ, ທະນາຄານກາງ ຕີມໍ ເລສເຕ ໃນນາມຜູ້ສັງເກດການ, ກອງເລຂາອາຊຽນ (ASEC). ນອກນີ້, ຍັງມີຜູ້ຕາງໜ້າຈາກອົງການຈັດຕັ້ງສາກົນທີ່ກ່ຽວຂ້ອງເຂົ້າຮ່ວມເປັນຕົ້ນແມ່ນ ອົງການຄົ້ນຄວ້າເສດຖະກິດມະຫາພາກອາຊຽນ+3 (AMRO), ທະນາຄານພັດທະນາອາຊີ (ADB) ແລະ ສູນ SEACEN.

ກອງປະຊຸມ SLC ຈັດຂຶ້ນເປັນວາລະປົກກະຕິ 02 ຄັ້ງຕໍ່ປີ, ພາຍໃຕ້ການເປັນປະທານອາຊຽນຂອງ ສປປ ລາວ ໃນປີ 2024 ນີ້ ທຫລ ໃນນາມເຈົ້າພາບຈັດກອງປະຊຸມດັ່ງກ່າວໄດ້ຂຶ້ນນຳສະເໜີຫົວຂໍ້ແຜນວຽກບູລິມະສິດດ້ານເສດຖະກິດຂອງອາຊຽນ (PED) ເພື່ອນໍາສະເໜີໃຫ້ບັນດາປະເທດສະມາຊິກອາຊຽນຮັບຊາບໂດຍໄດ້ກຳນົດເອົາ 03 ແຜນຍຸດທະສາດຫຼັກປະກອບມີ: ການເຊື່ອມໂຍງ ແລະ ການເຊື່ອມຈອດດ້ານເສດຖະກິດ, ການສ້າງອະນາຄົດແບບຍືນຍົງ ແລະ ທຸກພາກສ່ວນມີສ່ວນຮ່ວມ, ແລະ ການຫັນປ່ຽນເພື່ອກ້າວໄປສູ່ດີຈີຕອລໃນອະນາຄົດ. ອີງໃສ່ແຜນຍຸດທະສາດດັ່ງກ່າວ, ຂະແໜງການທະນາຄານໄດ້ສຸມໃສ່ “ການແກ້ໄຂຄວາມຫຼຸດໂຕນການເຂົ້າເຖິງແຫຼ່ງທຶນ ແລະ ການເສີມສ້າງໃຫ້ເຂົ້າເຖິງການບໍລິການທາງການເງິນ ໃນກຸ່ມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ” ເພື່ອເພີ່ມທະວີຄວາມເຂັ້ມແຂງທາງດ້ານການເງິນໃນພາກພື້ນ.

ທີ່ປະຊຸມຍັງໄດ້ຮັບຟັງການລາຍງານຈາກອົງການຄົ້ນຄວ້າເສດຖະກິດມະຫາພາກອາຊຽນ+3 (AMRO) ກ່ຽວກັບພາບລວມຂອງເສດຖະກິດໃນພາກພື້ນ ໂດຍໄດ້ສະແດງໃຫ້ເຫັນ ອັດຕາການເຕີບໂຕຂອງ GDP ໃນຂົງເຂດອາຊຽນ ປີ 2024 ແມ່ນ 4.9% ທຽບໃສ່ປີ 2023 ແມ່ນມີທ່າອ່ຽງໃນການເຕີບໂຕ ແລະ ຂະຫຍາຍຕົວທາງເສດຖະກິດ ຕົ້ນຕໍມາຈາກຄວາມຕ້ອງການຈາກພາຍໃນທີ່ເຂັ້ມແຂງ, ແລະ ຄວາມຕ້ອງການຈາກພາຍນອກທີ່ເພີ່ມຂຶ້ນ. ພ້ອມນີ້, ທະນາຄານພັດທະນາອາຊີ (ADB) ໄດ້ຂຶ້ນນຳສະເໜີຫົວຂໍ້ທີ່ຕິດພັນກັບຕະຫຼາດພັນທະບັດສີຂຽວໃນອາຊຽນ ເຊິ່ງມີອັດຕາການຂະຫຍາຍຕົວທຽບເທົ່າກັບສາກົນໃນລະດັບ 4.5 ເທົ່າຈາກປີ 2019 ຫາປີ 2023 ແລະ ຍັງໄດ້ຍົກໃຫ້ເຫັນເຖິງຄວາມສຳຄັນຂອງວຽກງານການເງິນຍືນຍົງພາຍໃນຂະແໜງການທະນາຄານ ແລະ ບົດບາດຂອງຕົນຕໍ່ກັບການຊຸກຍູ້ວຽກງານດັ່ງກ່າວ.

ນອກຈາກນັ້ນ, ທີ່ປະຊຸມຍັງໄດ້ຮັບຊາບຄວາມຄືບໜ້າ ແລະ ແຜນການຈັດຕັ້ງປະຕິບັດຕາມບົດລາຍງານຂອງຄະນະກຳມະການທັງໝົດ (Working Committees) ແລະ ໜ່ວຍງານຕ່າງໆ (Task Force) ພາຍໃຕ້ຄະນະກໍາມະການ SLC ຊຶ່ງໄດ້ເນັ້ນໜັກເຖິງຄວາມພະຍາຍາມຂອງອາຊຽນໃນການຊຸກຍູ້ໃຫ້ວຽກງານການເງິນ-ທະນາຄານ ໃຫ້ມີຄວາມເຂັ້ມແຂງ ແລະ ສາມາດເຊື່ອມໂຍງເຂົ້າກັນຫຼາຍຂຶ້ນໃນທ່າມກາງສະພາບການເໜັງຕີງ ແລະ ຄວາມບໍ່ແນ່ນອນຂອງການເງິນໃນໂລກ.

ພ້ອມດຽວກັນນີ້, ບັນດາທ່ານຮອງຜູ້ວ່າການ ແລະ ຜູ້ຕາງໜ້າຈາກທະນາຄານກາງ 10 ປະເທດອາຊຽນ ໄດ້ເຫັນດີຮ່ວມກັນໃນການຮັບຮອງເອົາແຜນວຽກສະເໜີຂອງ 2 ຄະນະກໍາມະການ ແລະ ໜ່ວຍງານຕ່າງໆພາຍໃຕ້ຄະນະກໍາມະການ SLC ລວມທັງການສືບຕໍ່ແຜນກະກຽມກໍານົດທິດທາງໃນການທົບທວນຄືນກ່ຽວກັບແຜນວຽກຍຸດທະສາດຫຼັກໃນຂະແໜງການທະນາຄານພາຍໃຕ້ເສົາຄໍ້າປະຊາຄົມເສດຖະກິດອາຊຽນ (AEC) ເພື່ອກະກຽມແຜນພາຍຫຼັງປີ 2025 ແລະ ການຊຸກຍູ້ຄວາມເຂັ້ມແຂງດ້ານເງິນ-ທະນາຄານໃນອາຊຽນໃຫ້ຢູ່ໃນລະດັບທີ່ໝັ້ນຄົງ.

ກອງປະຊຸມ ASEAN Senior Level Committee on Financial Integration: SLC ຄັ້ງທີ 27 ໄດ້ດໍາເນີນເປັນເວລາ 1 ວັນເຕັມ ດ້ວຍບັນຍາກາດອັນຟົດຟື້ນ ແລະ ເຕັມໄປດ້ວຍຜົນສຳເລັດ. ພ້ອມນັ້ນ, ທະນາຄານກາງປະເທດອິນໂດເນເຊຍ ແລະ ທະນາຄານແຫ່ງລັດ ສສ ຫວຽດນາມ ໄດ້ສະແດງຄວາມຍິນດີຕໍ່ກອງປະຊຸມ ທີ່ຈະໄດ້ຮັບໜ້າທີ່ໃນການເປັນປະທານຮ່ວມໃນຄະນະດັ່ງກ່າວ ສົກປີ 2024-2026. ໃນທ້າຍກອງປະຊຸມ, ທ່ານ ຮອງຜູ້ວ່າການ ທຫລ ໄດ້ສະແດງຄວາມຂອບໃຈມາຍັງສະມາຊິກທີ່ເຂົ້າຮ່ວມກອງປະຊຸມ ທີ່ໃຫ້ການຮ່ວມມື ແລະ ສະໜັບສະໜຸນ ສປປ ລາວ ໃນນາມ ປະທານອາຊຽນ ປີ 2024 ນີ້ຢ່າງແໜ້ນແຟ້ນ.

ຂ່າວ-ພາບ ໂດຍ:ທະນາຄານແຫ່ງ ສປປ ລາວ