ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງຜົ້ງສາລີ ຊຸກຍູ້ລູກຄ້າທີ່ໄດ້ຮັບຜົນກະທົບໂຄວິດ-19

ໃນສະພາບການທີ່ພະຍາດໂຄວິດ-19 ພວມລະບາດໄປໃນທົ່ວໂລກ ກໍ່ຄື່ ຢູ່ສປປລາວຂອງພວກເຮົາ ເຮັດໃຫ້ທຸລະກິດຫຼາຍພາກສວ່ນຕ້ອງໄດ້ໂຈະການດຳເນີນການຊົ່ວຄ່າວ ເຊິ່ງສົ່ງຜົນສະທ້ອນສູ່ລະບົບເສດຖະກິດ ໂດຍລວມ, ແລະ ຕໍ່ທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງຜົ້ງສາລີ ໂດຍສະເພາະກໍ່ໄດ້ຮັບຜົນກະທົບຈາກການແຜ່ລະບາດຂອງພະຍາດດັ່ງກ່າວນີ້ເຊັ່ນກັນ ເຊິ່ງທ່ານ ພອນຄໍາ ດວງບຸບຜາ, ຫົວໜ້າທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງຜົ້ງສາລີ ໃຫ້ຮູ້ວ່າ: ທະນາຄານສາຂາພວກເຮົາ ກໍ່ໄດ້ຮັບຜົນກະທົບຈາກການແຜ່ລະ ບາດຂອງເຊື້ອພະຍາດໂຄວິດ-19, ເປັນຕົ້ນແມ່ນການເຄື່ອນໄຫວຂອງລູກຄ້າ, ການປ່ອຍເງີນກູ້ຢືມໃຫ້ຜູ້ປະກອບການ ກໍ່ພົບກັບຄວາມຫຍຸ້ງຍາກຫຼາຍ ເພາະວ່າທຸລະກິດຂອງຜູ້ປະກອບການຈຳນວນໜຶ່ງໄດ້ປິດການບໍລິການຊົ່ວຄາວ ຕາມຄຳສັ່ງເລກທີ 06 ຂອງທ່ານນາຍົກລັດຖະມົນຕີ, ລູກຄ້າຈຳນວນໜຶ່ງທີ່ເຮັດບໍລິການຄ້າຂາຍກໍ່ຫຼຸດລົງ ຈຶ່ງເຮັດໃຫ້ລູກຄ້າທີ່ກູ້ຢືມເງີນບໍ່ສາມາດປະຕິບັດສັນຍາກູ້ຢືມໄດ້ຕາມກຳນົດເວລາ ສົ່ງຜົນເຮັດໃຫ້ຍອດການບໍລິການຂອງທະນາຄານບໍ່ບັນລຸຕາມຄາດໝາຍ.

ສຳລັບການປະກອບສວ່ນໃນການຕ້ານການແຜ່ລະບາດຂອງພະຍາດໂຄວິດ-19 ນັ້ນ, ທາງທະນາຄານກໍ່ໄດ້ປະກອບສວ່ນປະຕິບັດຕາມຄຳສັ່ງ 06/ນຍ ຢ່າງເຂັ້ມງວດ ໂດຍເຮັດໃຫ້ລູກຄ້າຂອງທະນາຄານຂອງຕົນ ແລະ ທຸກຄົນ ສາມາດຫຼຸດຄວາມສ່ຽງໃນການຕິດເຊື້ອພະຍາດດັ່ງກ່າວ ດ້ວຍການແນະນຳທຸກພາກສ່ວນທົ່ວແຂວງຜົ້ງສາລີ ນຳໃຊ້ຜະລິດຕະພັນ BCEL One ONE Pay, ແລະ ລະບົບ ATM ເພື່ອຊຳລະສະສາງຕ່າງໆ ໂດຍບໍ່ຈຳເປັນຕ້ອງເຂົ້າມາທະນາຄານໂດຍກົງ. ນອກນີ້, ທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງຜົ້ງສາລີ ຍັງປະກອບສວ່ນເຂົ້າຮ່ວມເປັນກຳມະການໃນຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ, ໂດຍແມ່ນຫົວຫນ້າສາຂາເຂົ້າຮ່ວມເປັນຄະນະ ເພື່ອຕິດຕາມສະພາບລາຍງານໃຫ້ຂັ້ນແຂວງ, ພ້ອມທັງລະດົມພະນັກງານໃນສາຂາ ປະກອບສວ່ນດ້ານວັດຖຸປັດໃຈ ແລະ ເງີນຄຳ ເຂົ້າໃນການຕ້ານພະຍາດດັ່ງກ່າວ. ສຳລັບລູກຄ້າກ່ອນທີຈະເຂົ້າມາເຮັດທຸລະກຳທາງການເງີນຢູ່ທະນາຄານຕົນ ແມ່ນຕ້ອງໄດ້ກວດວັດແທກອຸ່ນຫະພູມ, ແນະນຳໃຫ້ລູກຄ້າລ້າງມືດ້ວຍເຈວທີມີສ່ວນປະສົມຂອງເຫຼົ້າ ຢູ່ຈຸດກວດກາ ແລ້ວຈຶ່ງສາມາດເຂົ້າໃຊ້ບໍລີການໄດ້. ຕໍ່ກັບສະພາບການທີໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19 ແລະ ເພື່ອປະກອບສວ່ນໃນການຟື້ນຟູເສດຖະກິດຂອງແຂວງ ແລະ ຂອງຊາດ ເພື່ອເຮັດໃຫ້ທຸລະກິດສາມມາດສືບຕໍ່ດຳເນີນການນັ້ນ, ທາງທະນາຄານກໍ່ໄດ້ມີນະໂຍ ບາຍແກ່ລູກຄ້າ ເປັນຕົ້ນແມ່ນການຜ່ອນຜັນໃຫ້ລູກຄ້າທີ່ຖຶກຜົນກະທົບ ດ້ວຍການຕໍ່ສັນຍາໃຫ້ໃຫມ່ ຫຼື ເລື່ອນການຊຳລະ ຕາມສະພາບຕົວຈິງ, ທັງນີ້ເພື່ອຊ່ວຍໃຫ້ທຸລະກິດຂອງລູກຄ້າໄດ້ສືບຕໍ່ດຳເນີນ ແລະ ສ້າງຜົນກຳໄລໄດ້ຕໍ່ໄປ. ໃນໂອກາດນີ້, ທ່ານຫົວໜ້າທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງຜົ້ງສາລີ ໄດ້ຮຽກຮ້ອງມາຍັງລູກຄ້າຂອງຕົນ ແລະ ປະຊາຊົນບັນດາເຜົ່າ ໃຫ້ສືບຕໍ່ຮວ່ມໃຈກັນຕໍ່ສູ້ຕ້ານກັບພະຍາດໂຄວິດ-19 ເພື່ອເຮັດໃຫ້ປະເທດເຮົາຫຼຸດພົ້ນຈາກວິກິດໂຄວິດ-19 ນີ້ໄດ້ໂດຍໄວ ແລະ ສືບຕໍ່ເຊືອໜັ້ນໃນການບໍລິການທີ່ທັນສະໄໝ ວ່ອງໄວ ຮັບໃຊ້ຊຸມຊົນ ຂອງທະນາຄານການຄ້າທະນາຄານການຄ້າຕ່າງປະເທດລາວ ມະຫາຊົນ ຕໍ່ໄປ.

 

ໂດຍ: ຊີນນິລາ ກາວັນໄຈ ພາບ: ສົມຄິດ ແກ້ວນວນລາ