ສປປ ລາວ ຈະນໍາໃຊ້ລະບົບຕິດຕາມບໍລິຫານ ກະແສເງິນຕາຕ່າງປະເທດ ຫຼື CMS ເຊິ່ງເປັນລະບົບທີ່ສ້າງຂື້ນຈາກຄວາມມຸ້ງຫວັງຂອງທະນາຄານ ແຫ່ງ ສປປ ລາວ ເພື່ອພັດທະນາລະບົບເອເລັກໂຕຼນິກ ໃຫ້ທັນສະໄໝສະດວກວ່ອງໄວ ເພື່ອຕິດຕາມກະແສເງິນຕາຕ່າງປະເທດ ຕິດພັນກັບການຄ້າ ການລົງທືນລະຫວ່າງປະເທດໃນໄຕມາດທີ ໜື່ງຂອງປີນີ້ ເຊິ່ງມີຄວາມສໍາຄັນຫຼາຍທີ່ນໍາເອົາລະບົບນີ້ມານໍາໃຊ້ ເນື່ອງຈາກຜ່ານມາ ປະເທດເຮົາໄດ້ຮັບຜົນກະທົບຢ່າງໝັກຈາກສະພາບເສດຖະກິດ, ການເງິນ ,ໄພເງິນເຟີ້ ແລະ ອື່ນໆທີ່ເກີດຂື້ນໃນທົ່ວໂລກ, ສະນັ້ນ ວຽກງານຄຸ້ມຄອງເງິນຕາຕ່າງປະເທດ ເປັນວຽກໜື່ງທີ່ມີຄວາມສໍາຄັນ ແລະ ໄດ້ຮັບການຊີ້ນໍາຢ່າງໃກ້ຊິດຈາກການນໍາພັກ-ລັດ ເຊິ່ງຜ່ານມາໄດ້ມີການປັບປຸງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ແລະ ສ້າງຕັ້ງກົມຄຸ້ມຄອງເງິນຕາຕ່າງປະເທດຂື້ນໃນກາງປີ 2023 ຜ່ານມາ, ຜ່ານການຈັດຕັ້ງປະຕິບັດເຫັນວ່າ ສະພາບກະແສເງິນຕາຕ່າງປະເທດໂດຍລວມທີ່ທ່າອ່ຽງດີຂື້ນ ຫົວໜ່ວຍສົ່ງອອກແລະ ນໍາເຂົ້າໄດ້ມາລົງທະບຽນ ແລະ ເປີດບັນຊີນໍາທະນາຄານ ບໍ່ຕໍ່າກວ່າ 1.000 ຫົວໜ່ວຍ.
ທ່ານ ວັດທະນາ ຊານຸບານ ຮອງຫົວໜ້າກົມຄຸ້ມຄອງເງິນຕາຕ່າງປະເທດ ທະນາຄານແຫ່ງ ສປປ ລາວ ຖະແຫຼງຕໍ່ສື່ມວນຊົນຕອນບ່າຍວັນທີ 20 ກຸມພາ 2024 ວ່າ : ເຖິງວ່າປະຈຸບັນການຄຸ້ມຄອງເງີນຕາຕ່າງປະເທດຈະມີທວງທ່າດີຂື້ນ ແຕ່ການຕິດຕາມກະແສເງິນຕາ ຈະຕ້ອງຫັນເຂົ້າສູ່ຄວາມທັນສະໄໝຜ່ານລະບົບເອເລັກໂຕຼນິກ ແລະ ທັນກັບສະພາບການຍິ່ງຂື້ນ ສະນັ້ນ ຈະຕ້ອງຮີບດ່ວນພັດທະນາລະບົບບໍລິການກະແສເງິນຕາຕ່າງປະເທດນີ້ຂື້ນ ເພື່ອອໍານວຍຄວາມສະດວກໃຫ້ແກ່ຜູ້ປະກອບການ ແລະ ບັນດາຜູ້ຄຸ້ມຄອງ ແລະ ຜູ້ຕິດຕາມກະແສເງິນຕາໃຫ້ສາມາດຕິດຕາມຢ່າງທັນກັບສະພາບການຂອງໂລກ .
ຍ້ອນແນວນັ້ນ, ເລີ່ມແຕ່ປີ 2023ມານີ້ ທະນາຄານແຫ່ງ ສປປ ລາວ ໄດ້ມີການສຶກສາ , ພັດທະນາສ້າງແບບຈໍາລອງຄວາມຕ້ອງການ ເຊິ່ງລະບົບດັ່ງກ່າວນີ້ ບໍ່ເຄີຍມີມາກ່ອນ ເພາະເປັນລະບົບເຊື່ອມເຂົ້າກັບຖານຂໍ້ມູນຂອງບັນດາຂະແໜງການກະຊວງການເງິນ ຂະແໜງການລົງທຶນ ເຊິ່ງໃນຕໍ່ໜ້າຈະຂະຫຍາຍໄປສູ່ກະຊວງຕ່າງໆຕື່ມອີກ.
ທ່ານ ວັດທະນາ ຊານຸບານ ໃຫ້ຮູ້ຕື່ມວ່າ : ລະບົບຕິດຕາມບໍລິຫານ ກະແສເງິນຕາຕ່າງປະເທດ ຫຼື CMS ເປັນລະບົບທີ່ມີຄວາມປອດໄພສູງ ເນື່ອງຈາກເປັນລະບົບ 3 ເທັຍ ໂດຍຈະມີການແຍກລະດັບການເຂົ້າເຖິງຂໍ້ມູນຢ່າງຊັດເຈນ ແລະ ກໍານົດສິດຂອງການເຂົ້າເຖິງລະບົບທີ່ແຕກຕ່າງກັນຂອງຜູ້ນໍາໃຊ້ ມີລະບົບຖານດາຕ້າເຊັນເຕີໃນການເກັບກໍາຂໍ້ມູນ ເຊິ່ງຮັບປະກັນທີ່ສຸດໃນການເຂົ້າເຖິງລະບົບສະເພາະຂອງຜູ້ນໍາໃຊ້ ແລະ ມີລະບົບປ້ອງກັນ ບໍ່ໃຫ້ບຸກຄົນທີ່ສາມສາມາດເຂົ້າເຖິງ ຖືຄວາມປອດໄພຂອງລະບົບຂໍ້ມູນເປັນອັນດັບສຳຄັນທີ່ສຸດຂອງຜູ້ຊົມໃຊ້. ລະບົບຕິດຕາມບໍລິຫານ ກະແສເງິນຕາຕ່າງປະເທດຈະເລີ່ມທົດລອງນໍາໄຊ້ໃນໄຕມາດທີ1ຂອງປີນີ້.
ໂດຍ: ໄພມະນີ
