ກອງປະຊຸມເຜີຍແຜ່ນະໂຍບາຍສິນເຊື່ອ ເພື່ອກະຕຸ້ນເສດຖະກິດໄດ້ຈັດຂຶ້ຍໃນຕອນເຊົ້າວັນທີ 30 ພຶດສະພາ 2023 ທີ່ຫ້ອງວ່າການສຳນັກງານນາຍົກລັດຖະມົນຕີ ພາຍໃຕ້ການເປັນປະທານຂອງທ່ານ ບຸນເຫຼືອ ສິນໄຊວໍລະວົງ ຜູ້ວ່າການທະນາຄານແຫ່ງ ສປປ ລາວ ໂດຍມີ ບັນດາຮອງເຈົ້າແຂວງ, ຮອງເຈົ້າຄອງນະຄອນຫຼວງວຽງຈັນ, ຜູ້ຕາງໜ້າຈາກບັນດາກະຊວງ ແລະ ຕາງໜ້າຈາກທະນາຄານທຸລະກິດ ເຂົ້າຮ່ວມ.
ທ່ານ ບຸນເຫຼືອ ສິນໄຊວໍລະວົງ ຜູ້ວ່າການທະນາຄານແຫ່ງ ສປປ ລາວ ໄດ້ໃຫ້ຮູ້ວ່າ : ກອງປະຊຸມໃນຄັ້ງນີ້ ແມ່ນເພື່ອເຜີຍແຜ່ນະໂຍບາຍສິນເຊື່ອ ເພື່ອກະຕຸ້ນເສດຖະກິດ ໂດຍຜັນຂະຫຍາຍເນື້ອໃນຈິດໃຈຂອງມະຕິກອງປະຊຸມຂອງສະພາແຫ່ງຊາດ ສະບັບເລກທີ 56/ສພຊ, ລົງວັນທີ 08 ກໍລະກົດ 2022, ມະຕິຂອງລັດຖະບານ ເພື່ອຜັນຂະຫຍາຍເນື້ອໃນວາ ລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ (ປີ 2021 – 2023) ໂດຍສະເພາະວຽກຈຸດສຸມທີ 04 ສ້າງສະເຖຍລະພາບດ້ານເງິນຕາ ຊຶ່ງນະໂຍບາຍດັ່ງກ່າວ ໄດ້ຮັບການຮັບຮອງ ແລະ ເຫັນດີຈາກລັດຖະບານ ຕາມມະຕິຕົກລົງຂອງ ກອງປະຊຸມລັດຖະບານສະໄໝສາມັນ ປະຈຳເດືອນ ມີນາ 2023 ແລະ ມອບໃຫ້ ທຫລ ເປັນເຈົ້າການຊີ້ນຳໃນການຈັດຕັ້ງປະຕິບັດ ຕາມແຈ້ງການສະບັບເລກທີ 790/ຫສນຍ ລົງວັນທີ 08 ພຶດສະພາ 2023 ແລະ ເພື່ອຮັບປະກັນຂອດຈັດຕັ້ງປະຕິບັດໂຄງການດັ່ງກ່າວ ເປັນເອກະພາບກັນໃຫ້ມີປະສິດທິຜົນສູງສຸດ ແລະ ໃຫ້ນະໂຍບາຍສິນເຊື່ອ ກະຈາຍແຫຼ່ງທຶນສູ່ທ້ອງຖິ່ນ
ນະໂຍບາຍສິນເຊື່ອ ເພື່ອກະຕຸ້ນເສດຖະກິດ ມີເປົ້າໝາຍສຸມໃສ່ຂະແໜງການຜະລິດ, ການຄ້າ ແລະ ການບໍລິການ ທີ່ເປັນປາຍແຫຼມ ເພື່ອທົດແທນການນໍາເຂົ້າ – ສົ່ງເສີມການຜະລິດເພື່ອສົ່ງອອກ, ສ້າງວຽກເຮັດງານທຳ ແລະ ປະກອບສ່ວນ ເຂົ້າໃນການຮັກສາສະຖຽນລະພາບມະຫາພາກ ດ້ານການເງິນ-ເງິນຕາ ໃຫ້ເຂັ້ມແຂງ ແລະ ການພັດທະນາເສດຖະກິດ ໃຫ້ມີການຂະຫຍາຍຕົວແບບຍືນຍົງ, ແນໃສ່ສ້າງເງື່ອນໄຂໃຫ້ຫົວໜ່ວຍທຸລະກິດ (ຈຸລະວິສາຫະກິດ, ວິສາ ຫະກິດຂະໜາດນ້ອຍ, ກາງແລະ ວິສາຫະກິດຂະໜາດໃຫຍ່ຈຳນວນໜຶ່ງ) ໃນຂະແໜງບູລິມະສິດຂອງລັດ ສາມາດເຂົ້າຫາແຫຼ່ງທຶນທີ່ມີຕົ້ນທຶນເໝາະສົມໃນການສ້າງ, ຂະຫຍາຍ ແລະ ປັບປຸງຖານການຜະລິດ-ປຸງແຕ່ງ, ບໍລິການການຄ້າຂອງຕົນ ທັງຮັບປະກັນການຜະລິດສະໜອງສະບຽງອາຫານ ແລະ ເຄື່ອງອຸປະໂພກ-ບໍລິໂພກພາຍໃນ.
ຜ່ານການຄົ້ນຄວ້າ ນະໂຍບາຍສິນເຊື່ອ ເພື່ອກະຕຸ້ນເສດຖະກິດ ໄດ້ແບ່ງອອກເປັນ 2 ນະ ໂຍບາຍ ສະເພາະຄື: ນະໂຍບາຍສິນເຊື່ອ ຖົມຂຸມດອກເບ້ຍ ແລະ ນະໂຍບາຍສິນເຊື່ອ ກະຈາຍແຫຼ່ງທຶນສູ່ທ້ອງຖິ່ນ, ເປົ້າໝາຍຂະແໜງບູລິມະສິດ ທີ່ຈະໄດ້ຮັບນະໂຍບາຍສິນເຊື່ອ ເພື່ອກະຕຸ້ນເສດຖະກິດນີ້ ຕ້ອງເປັນຂະແໜງການທີ່ຜ່ານການຢັ້ງຢືນຈາກພາກສ່ວນກ່ຽວຂ້ອງຂອງລັດ ເຊັ່ນ: ຂະ ແໜງກະສິກຳ-ປ່າໄມ້: ການປູກຝັງ, ການລ້ຽງສັດ ແລະ ການປຸງແຕ່ງຜະ ລິດຕະພັນກະສິກຳ ທີ່ຄຸ້ມຄອງໂດຍ ຂະແໜງກະສິກຳ-ປ່າໄມ້, ອຸດສາຫະກຳ-ປຸງແຕ່ງ: ປຸງແຕ່ງອາຫານ ແລະ ເຄື່ອງດື່ມ, ເຄມີອຸດສາຫະກຳ ແລະ ເຄື່ອງໃຊ້ປະຈໍາວັນແລະ ເຄື່ອງຫຸ້ມຫໍ່, ບໍລິການ-ທ່ອງທ່ຽວ ແລະ ຫັດຖະກຳ, ການຄ້າ: ທຸລະກິດທີ່ຕິດພັນການສົ່ງອອກເປັນຕົ້ນແມ່ນ ການເກັບຊື້ສິນຄ້າກະສິກໍາ, ການຂົນສົ່ງ-ຄ່ຽນຖ່າຍສິນຄ້າສົ່ງອອກ ແລະ ການຄ້າ-ການບໍລິການ ປິ່ນອ້ອມ.
