ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ທະນາຄານ ອຸດສາຫະກໍາ ແລະ ການຄ້າຈີນ ຈໍາກັດ ມອບອຸປະກອນການແພດໃຫ້ລັດຖະບານລາວ ເພື່ອຕ້ານ ໂຄວິດ-19

ໃນຕອນບ່າຍ ວັນທີ 08 ເມສາ 2020 ທີ່ກະຊວງສາທາລະນະສຸກ, ນະຄອນຫຼວງວຽງຈັນ, ທະນາຄານ ອຸດສາຫະກໍາ ແລະ ການຄ້າຈີນ ຈໍາກັດ (ທະນາຄານໄອຊີບີຊີ) ໄດ້ມອບອຸປະກອນການແພດຕ້ານພະຍາດ COVID-19 ໃຫ້ກະຊວງສາທາລະນະສຸກ ລວມມີຜ້າອະນາໄມອັດປາກອສໍາລັບແພດ 150.000 ອັນ, ເຄື່ອງກວດຫາເຊື້ອໄວຣັດ 2 ເຄື່ອງ, ມູນຄ່າທັງໝົດ 120.000 ໂດລາສະຫະລັດຫຼື ປະມານ 1 ຕື້ 68 ລ້ານກີບ, ຊຶ່ງກ່າວມອບໂດຍທ່ານ Sun Feng Lei, ຜູ້ອໍານວຍການທະນາຄານ ICBC ສາຂານະຄອນຫລວງວຽງຈັນ, ແລະ ກ່າວຮັບໂດຍທ່ານ ຮສຈ ປອ ບຸນກອງ ສີຫາວົງ, ລັດຖະມົນຕີກະຊວງສາທາລະນະສຸກ, ໂດຍມີພະນັກງານວິຊາການຂອງສອງຝ່າຍເຂົ້າຮ່ວມ.

ໃນວັນທີ 24 ມີນາ 2020, ພາຍຫຼັງທີ່ສປປ ລາວ ໄດ້ປະກາດຢ່າງເປັນທາງການວ່າມີຜູ້ຕິດເຊື້ອ ໂຄວິດ-19 ຄົນທໍາອິດ, ທ່ານສີຈິ້ນຜິງ, ເລຂາທິການໃຫຍ່ສູນກາງພັກຄອມມຸນິດຈີນ ແລະ ປະທານປະເທດສປ ຈີນ ໄດ້ມີຄວາມຫ່ວງໃຍເປັນຢ່າງຍິ່ງຕໍ່ຄວາມຫຍຸ້ງຍາກໃນການຄວບຄຸມ ແລະ ປ້ອງກັນການແຜ່ລະບາດຂອງເຊື້ອພະຍາດ ໂຄວິດ-19 ຢູ່ ສປປ ລາວ, ທ່ານຈຶ່ງໄດ້ມີຄໍາສັ່ງໃຫ້ຈັດສົ່ງຄະນະຊ່ຽວຊານເພື່ອໄປເຮັດວຽກຊ່ວຍ ສປປ ລາວ ໃຫ້ໄວທີ່ສຸດ, ພ້ອມທັງໄດ້ຊ່ວຍເຫຼືອມອບອຸປະກອນການແພດ, ໂດຍອີງຕາມສະພາບຄວາມຈໍາເປັນຕົວຈິງຂອງລາວ, ໂດຍຝ່າຍຈີນຈະສືບຕໍ່ໃຫ້ການສະໜັບສະໜັບໜູນ ແລະ ຊ່ວຍເຫຼືອ ສປປ ລາວຢ່າງຮອບດ້ານ ຈົນກ່ວາສະພາບຈະກັບເຂົ້າສູ່ປົກກະຕິ. ດັ່ງນັ້ນ, ທະນາຄານ ໄອຊີບີຊີ ຈຶ່ງໄດ້ປຸກລະດົມສາຂາທົ່ວ ສປ ຈີນ ເພື່ອຊ່ວຍຊອກຫາແຫຼ່ງຈໍາໜ່າຍອຸປະກອນ, ໂດຍແຕ່ລະສາຂາກໍ່ໄດ້ຕອບສະໜອງຢ່າງຕັ້ງໜ້າ; ແລະພາຍ ໃນ 1 ມື້ ເທົ່ານັ້ນ ສາຂາຈ່ຽງຊີກໍ່ສາມາດຈັດຊື້ຜ້າອະນາໄມອັດປາກສໍາລັບທາງການແພດໄດ້ 150.000 ອັນ.

ຈາກນັ້ນ ກໍ່ໄດ້ຕິດຕໍ່ພົວພັນຢ່າງໃກ້ຊິດມາຫາກະຊວງສາທາລະນະສຸກລາວ, ໃນຂະນະທີ່ບໍລິສັດຂົນສົ່ງ, ແລະ ສາຂາທະນາຄານໃນ ສປ ຈີນ, ກໍ່ໄດ້ຕິດຕາມສະພາບການຂົນສົ່ງ ແລະ ໃຫ້ຄວາມຮ່ວມມືໃນການແຈ້ງສິນຄ້າຂາເຂົ້າ, ການຂໍຍົກເວັ້ນພາສີ ແລະ ຂັ້ນຕອນນໍາເຂົ້າອື່ນໆ, ທັງຊ່ວຍປະສານງານແກ້ໄຂບັນຫາສະເພາະໜ້າທີ່ເກີດມີໃນເວລາຂົນສົ່ງ, ພາຍໃຕ້ການຮ່ວມມື ແລະ ການສະໜັບສະໜູນຈາກແຕ່ລະຝ່າຍ ເຮັດໃຫ້ອຸປະກອນທັງໝົດສາມາດມາຮອດ ສປປ ລາວ ໃນຕົ້ນເດືອນເມສານີ້. ທະນາຄານ ໄອຊີບີຊີ ໄດ້ປະຕິບັດພັນທະຕໍ່ສັງຄົມຢ່າງຕັ້ງໜ້າ, ການຮ່ວມມືກັບສັງຄົມລາວຕ້ານເຊື້ອພະຍາດ ໂຄວິດ-19 ນີ້ ແມ່ນການສະແດງອອກທີ່ເປັນຮູບປະທໍາຂອງຄູ່ຮ່ວມຊະຕາກໍາ, ຄືດັ່ງກັບຄໍາເວົ້າຂອງທ່ານ ຈຽງຈ້າຍຕົ່ງ, ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ທີ່ກ່າວວ່າ: ພະຍາດເຖິງຈະຮ້າຍແຮງປານໃດ, ແຕ່ຄວາມຮັກແພງຈະເອົາຊະນະໄດ້, ການທີ່ມີພູຜາສາຍນໍ້າຕິດຈອດກັນ, ຕ່າງຊ່ວຍຊູຍູ້ໜູນ ຊຶ່ງກັນ ແລະ ກັນ ເປັນພຶດຕິກໍາຕົວຈິງທີ່ສ່ອງແສງໃຫ້ເຫັນເຖິງຄູ່ຮ່ວມຊະຕາກໍາລາວ-ຈີນຢ່າງແທ້ຈິງ, ແລະ ລາວ-ຈີນ ກໍ່ຈະມີອະນາຄົດທີ່ສົດໃສກວ່າເກົ່າຢ່າງແນ່ນອນ.