ກຸ່ມບໍລິສັດທາງລົດໄຟແຫ່ງຊາດຈີນແຈ້ງຂ່າວວ່າ: ທາງລົດໄຟຈີນ-ລາວຈະເປີດຂະບວນລົດໄຟໂດຍສານສາກົນລະຫວ່າງສະຖານີຄຸນໝິງໃຕ້ຂອງຈີນ ແລະ ສະຖານີວຽງຈັນຂອງລາວ ນັບແຕ່ວັນທີ 13 ເມສານີ້ເປັນຕົ້ນໄປ ໂດຍລະຫວ່າງສອງສະຖານີດັ່ງກ່າວຂີ່ລົດໄຟຈາກສະຖານີຕົ້ນທາງໄປຫາສະຖານີປາຍທາງ, ມື້ດຽວກໍຈະສາມາດເດີນທາງໄປເຖິງແລ້ວ. ເວລາ 8 ໂມງຂອງວັນທີ 11 ເມສານີ້ຕາມເວລາວຽງຈັນ, ພາກສ່ວນທາງລົດໄຟຂອງສອງປະເທດຈະເລີ່ມຂາຍປີ້ລົດໄຟໂດຍສານສາກົນໃນເວລາດຽວກັນ.
ຂະບວນລົດໄຟໂດຍສານສາກົນຕາມທາງລົດໄຟຈີນ-ລາວໄດ້ແລ່ນລົດແບບອອກເດີນທາງໃນຕອນເຊົ້າແລະເດີນທາງເຖິງຈຸດໝາຍປາຍທາງໃນຕອນແລງ, ຕ່າງເປີດມື້ລະ 1 ຂະບວນຈາກນະຄອນຫຼວງວຽງຈັນ ແລະ ນະຄອນຄຸນໝິງ, ຈະຈອດລົດ 8 ສະຖານີ ຄື: ສະຖານີຄຸນໝິງໃຕ້, ສະຖານີຜູເອີ, ສະຖານີສິບສອງພັ່ນນາ, ສະຖານີບໍ່ຫານ, ສະຖານີບໍ່ເຕ່ນ, ສະຖານີຫຼວງພະບາງ, ສະຖານີວັງວຽງ ແລະ ສະຖານີວຽງຈັນ, ໃຊ້ເວລາເດີນທາງ 10 ຊົ່ວໂມງ 30 ນາທີ ເຊິ່ງລວມທັງເວລາແຈ້ງຜ່ານດ່ານຢູ່ຕາມດ່ານຊາຍແດນບໍ່ຫານ-ບໍ່ເຕ່ນ. ໃນນັ້ນ, ຂະບວນລົດໄຟ D887 ຈາກສະຖານີຄຸນໝິງໃຕ້ຫາສະຖານີວຽງຈັນ, ເດີນທາງອອກຈາກສະຖານີຄຸນໝິງໃຕ້ໃນເວລາ 7 ໂມງ 08 ນາທີ ຕາມເວລາວຽງຈັນ ແລະ ເດີນທາງເຖິງນະຄອນຫຼວງວຽງຈັນໃນເວລາ 17 ໂມງ 38 ນາທີຂອງມື້ດຽວກັນ; ຂະບວນລົດໄຟ D888 ຈາກສະຖານີວຽງຈັນຫາສະຖານີຄຸນໝິງໃຕ້, ເດີນທາງອອກຈາກນະຄອນຫຼວງວຽງຈັນໃນເວລາ 8 ໂມງ 08 ນາທີ ຕາມເວລາວຽງຈັນ ແລະ ເດີນທາງເຖິງສະຖານີຄຸນໝິງໃຕ້ໃນເວລາ 18 ໂມງ 38 ນາທີ ຂອງມື້ດຽວກັນ.
ຂະບວນລົດໄຟໂດຍສານສາກົນຕາມທາງລົດໄຟຈີນ-ລາວໄດ້ປະຕິບັດຕາມຮູບການຜ່ານດ່ານ “ກວດກາສອງເທື່ອຢູ່ສອງດ່ານ”. ຍົກຕົວຢ່າງຄື: ຖ້າຂີ່ລົດໄຟໂດຍສານສາກົນຈາກສະຖານີຄຸນໝິງໃຕ້ຫາສະຖານີວຽງຈັນ, ຂັ້ນຕອນຜ່ານດ່ານລະອຽດແມ່ນ: ພາຍຫຼັງຂະບວນລົດໄຟເດີນທາງເຖິງສະຖານີບໍ່ຫານຂອງຈີນແລ້ວ, ຜູ້ໂດຍສານຂ້າມຊາຍແດນຕ້ອງຖືເຄື່ອງຂອງຕົນລົງລົດ, ເຂົ້າສູ່ເຂດກວດຄົນເຂົ້າ-ອອກເມືອງ, ພາຍຫຼັງປະສານສົມທົບກັບພະນັກງານຢູ່ດ່ານຊາຍແດນຝ່າຍຈີນສຳເລັດການກວດຄົນອອກເມືອງແລ້ວ ໃຫ້ຂຶ້ນລົດເດີນທາງຕໍ່ໄດ້; ພາຍຫຼັງຂະບວນລົດໄຟເດີນທາງໄປເຖິງສະຖານີບໍ່ເຕ່ນຂອງປະເທດລາວແລ້ວ, ຜູ້ໂດຍສານຕ້ອງຖືເຄື່ອງຂອງຕົນລົງລົດ, ເຂົ້າສູ່ເຂດກວດຄົນເຂົ້າ-ອອກເມືອງ, ປະສານສົມທົບກັບພະນັກງານຢູ່ດ່ານຊາຍແດນຝ່າຍລາວສຳເລັດການກວດຄົນເຂົ້າເມືອງແລ້ວ, ຜູ້ໂດຍສານທີ່ສະຖານີປາຍທາງແມ່ນບໍ່ເຕ່ນນັ້ນ ສາມາດເດີນທາງອອກຈາກສະຖານີລົດໄຟໄດ້ເລີຍ, ສ່ວນຜູ້ໂດຍສານທີ່ເດີນທາງໄປສະຖານີອື່ນໆຂອງປະເທດລາວນັ້ນ ສາມາດຂຶ້ນລົດເດີນທາງຕໍ່ໄດ້. ຂະນະທີ່ຂັ້ນຕອນການແຈ້ງຜ່ານດ່ານຂອງຜູ້ໂດຍສານເດີນທາງຕາມຂະບວນລົດໄຟໂດຍສານສາກົນຈາກສະຖານີວຽງຈັນຫາສະຖານີຄຸນໝິງໃຕ້ກໍເຊັ່ນດຽວກັນ. ເວລາກວດກາຜູ້ໂດຍສານເຂົ້າ-ອອກເມືອງເທື່ອໜຶ່ງຕ່າງຕ້ອງໃຊ້ເວລາປະມານ 1 ຊົ່ວໂມງເຄິ່ງ, ເວລາແຈ້ງຜ່ານດ່ານເຂົ້າ-ອອກເມືອງລວມທັງໝົດຕ້ອງໃຊ້ເວລາປະມານ 3 ຊົ່ວໂມງ.
Loading...