ໃນວັນທີ 8 ສິງຫາ 2024, ທີ່ຫ້ອງປະຊຸມວິທະຍຸກະຈາຍສຽງແຫ່ງຊາດລາວ, ຄະນະບໍລິຫານງານຊາວໜຸ່ມ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມທາບທາມ ຄະນະບໍລິຫານງານຊາວໜຸ່ມ ກະຊວງ ຖວທ ສະໄໝທີ IX ຮອບທີ 2 ເພື່ອປຶກສາຫາລື ແລະ ປ່ອນບັດທາບທາມຄັດ ເລືອກເອົາບຸກຄະລາກອນ ລົງສະໝັກເລືອກຕັ້ງ ເປັນຄະນະບໍລິ ຫານງານ ຊາວໜຸ່ມກະຊວງ ຖວທ ສະໄໝທີ IX ໂດຍການເປັນປະທານຂອງ ສະຫາຍ ບົວໄລ ພານຸວົງ ເລຂາຄະນະບໍລິຫານງານຊາວໜຸ່ມກະຊວງ ຖວທ, ສະຫາຍ ອາລຸນ ບຸນມີໄຊ ຄະນະປະຈຳພັກກະຊວງ, ຫົວໜ້າກົມຈັດຕັ້ງ-ພະນັກງານ ກະຊວງ ຖວທ, ມີບັນດາເລຂາ, ຮອງເລຂາ ຈາກຮາກຖານຊາວໜຸ່ມ ແລະ ໜ່ວຍຊາວໜຸ່ມຮາກຖານ ທີ່ຂຶ້ນກັບກະຊວງ ຖວທ ເຂົ້າຮ່ວມ.
ກອງປະຊຸມຄັ້ງນີ້, ໄດ້ຜ່ານບົດສະຫລຸບການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ VIII ຜູ້ແທນຊາວໜຸ່ມປະຊາຊົນປະຕິວັດລາວ ໄລຍະແຕ່ປີ 2020 ຫາ 2024 ແລະ ທິດທາງແຜນການວຽກງານຊາວໜຸ່ມປະຊາຊົນປະຕິວັດລາວ ແຕ່ປີ 2025-2030 ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ; ຜ່ານ ຮ່າງບົດສຳຫລວດ ຂອງຄະນະບໍລິຫານງານຊາວໜຸ່ມກະຊວງ ຖວທ ຕໍ່ກອງປະຊຸມໃຫຍ່ຜູ້ແທນຊາວໜຸ່ມ ປະຊາຊົນປະຕິວັດລາວ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຄັ້ງທີ IX ຫລັງຈາກນັ້ນ, ບັນດາສະຫາຍ ຈາກໜ່ວຍຊາວໜຸ່ມຮາກຖານ ທີ່ຂຶ້ນກັບກະຊວງ ຖວທ ໄດ້ສຸມໃສ່ປະກອບຄຳຄິດຄຳເຫັນ ໃສ່ບົດສະຫລຸບ ແລະ ບົດສຳຫລວດດັ່ງ ກ່າວ, ເພື່ອໃຫ້ມີເນື້ອໃນຄົບຖ້ວນ, ສົມບູນ, ຈະແຈ້ງ ໃຫ້ສາມາດນໍາໄປສະເໜີ ແລະ ຮັບຮອງເອົາ ໃນກອງປະຊຸມໃຫຍ່ຜູ້ແທນຊາວ ໜຸ່ມ ກະຊວງ ຖວທ ທີ່ຈະຈັດຂຶ້ນໃນເດືອນກັນຍາ 2024 ທີ່ຈະມາເຖິງນີ້.
ໃນໂອກາດນີ້, ບັນດາສະຫາຍ ເລຂາ, ຮອງເລຂາ ຈາກຮາກ ຖານຊາວໜຸ່ມ ແລະ ໜ່ວຍຊາວໜຸ່ມຮາກຖານ ທີ່ຂຶ້ນກັບກະຊວງ ຖວທ ໄດ້ພ້ອມກັນ ປ່ອນບັດທາບທາມ ເພື່ອຄັດເລືອກ ເອົາບຸກຄະລາກອນລົງສະໝັກເລືອກຕັ້ງ ເປັນຄະນະບໍລິຫານງານ ຊາວໜຸ່ມກະຊວງ ຖວທ ສະໄໝທີ IX.
