ວັນທີ 17 ທັນວາ 2022 ທີ່ເດີ່ນສະໜາມມ້າ ບ້ານວັງຊາຍ ເມືອງໄຊເສດຖາ ນະຄອນຫຼວງວຽງຈັນ (ນວ) ທ່ານ ອາດສະພັງທອງ ສີພັນດອນ ເຈົ້າຄອງ ນວ ແລະ ຄະນະ ໄດ້ຊົມການສະແດງສິລະປະຂອງຄະນະນັກສະແດງ ນວ ທີ່ຈະໄປສະແດງໃນພິທີມອບ-ຮັບທຸງກິລາແຫ່ງຊາດທີ່ແຂວງຊຽງຂວາງ.
ທ່ານ ບົວເງິນ ຊາພູວົງ ອະດີດຮອງລັດຖະມົນຕີກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ປະທານສະມາຄົມສິລະປິນແຫ່ງຊາດ ທັງເປັນຜູ້ນໍາພາຂະບວນການເຝິກຊ້ອມລາຍການສະແດງສິລະປະຄັ້ງນີ້ ກ່າວວ່າ: ຜ່ານການກະກຽມໄລຍະໜຶ່ງຂອງອ້າຍເອື້ອຍນ້ອງນັກສະແດງທີ່ມາຈາກກອງສິລະປະກອນກະຊວງປ້ອງກັນຄວາມສະ ຫງົບ ກອງສະແດງກາຍະສິນແຫ່ງຊາດ ແລະ ສະຫະພັນເຕັ້ນ (ສະມາຄົມຮິບຮັອບ) ໄດ້ຮ່ວມກັນເຝິກຊ້ອມ ເພື່ອກະກຽມໃຫ້ແກ່ການໄປຮັບເອົາທຸງ ກໍຄືການເປັນເຈົ້າພາບກີລາແຫ່ງຊາດຂອງ ນວ ໃນຄັ້ງຕໍ່ໄປ ຜ່ານການເຝິກຊ້ອມເຫັນວ່າມີຄວາມສະດວກສະບາຍ ໂດຍສະເພາະດ້ານວິຊາການໄດ້ມີການກະກຽມບົດຟ້ອນ ດົນຕີ ແລະ ເພງຮ້ອງ ໄດ້ພ້ອມກັນຂຸ້ນຂ້ຽວອອກແບບ ເຊິ່ງລັກສະນະການສະແດງ ໄດ້ນໍາເອົາຜາສາດເຜິ້ງນໍາໜ້າ ເພື່ອໃຫ້ເຫັນວ່າບຸນທາດຫຼວງໃນແຕ່ລະປີ ມີການແຫ່ຜາສາດເຜິ້ງ ເປັນການຖວາຍບຸນກຸສົນໃຫ້ແກ່ພະພຸດ ພະທໍາ ພະສົງ ກໍຄືການຮັກສາຮີດຄອງປະເພນີອັນດີງາມຂອງຊາວ ນວ ຫຼັງຈາກນັ້ນ ມີການສະແດງກາຍະສິນ ເຕັ້ນຮິບຮັອບ ແລະ ມີບົດເພງປະກອບໃຫ້ຊື່ວ່າ ຍິນດີຕ້ອນຮັບສູ້ນະຄອນຫຼວງເກມ ເຊິ່ງເປັນການສະແດງໃຫ້ເຫັນຊາວ ນວ ຍິນດີຕ້ອນຮັບບັນດານັກກີລາ ກໍຄືເພື່ອນມິດຈາກທົ່ວປະເທດ ກໍຄືປະເທດອ້ອມຂ້າງ ເພື່ອມາຮ່ວມງານມະຫະກໍາກີລາແຫ່ງຊາດຄັ້ງທີ XII ທີ່ ນວ ຈະຮ່ວມກັນເປັນເຈົ້າພາບ.
ນອກນີ້ ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ນວ ໃຫ້ສໍາພາດຕື່ມວ່າ: ການທົດລອງຜ່ານລາຍການສະແດ ງສິລະປະດັ່ງກ່າວຄັ້ງນີ້ ເປັນການຊ້ອມໃຫຍ່ຄັ້ງສຸດທ້າຍ ກ່ອນຈະເດີນທາງໄປສະແດງໃນພິທີປິດງານກີລາແຫ່ງຊາດຄັ້ງທີ XI ທີ່ແຂວງຊຽງຊວາງ ເຊິ່ງການກະກຽມຄັ້ງນີ້ ໄດ້ເຊີນການນໍາ ນວ ການນໍາກະຊວງ ແລະ ຄະນະກໍາມະການກ່ຽວຂ້ອງມາຊົມການຊ້ອມການສະແດງ ໂດຍການສະແດງໄດ້ນໍາເອົາຮູບແບບຕົວຈິງທີ່ຈະນໍາໄປສະແດງຮັບທຸງເຈົ້າພາບໃນງານມະຫະກໍາກີລາໃນຄັ້ງຕໍໍ່ໄປ ສະນັ້ນ ທີມນັກສະແດງຂອງ ນວ ໄດ້ມີການເຝິກຊ້ອມມາຫຼາຍຄັ້ງແລ້ວ ຖືວ່ານັກສະແດງໄດ້ຟ້ອນຢ່າງພ້ອມພຽງ ມີຄວາມກົມກຽວ ແລະ ສວຍສົດງົດງາມ ປັດຈຸບັນມີຄວາມພ້ອມສະແດງ 100%.
# ຂ່າວ – ພາບ : ຂັນທະວີ
